Deputat rasijskaj Dumy ad partyi Žyrynoŭskaha Raman Chudziakoŭ nakiravaŭ zvarot hienprakuroru Rasiei Juryju Čajku z prośbaj pravieryć vykazvańni salista biełaruskaha hurtu «Lapis Trubiackoj» na kancercie ŭ Ižeŭsku. Tam Siarhiej Michałok, jak pisali ŚMI, vyhukvaŭ słovy «Słava Ukrainie!» i svaryŭ «impierskich imbiecyłaŭ».
Pavodle słovaŭ deputata, «treba zabaranić hetaj hrupie naohuł vystupać na estradzie» ŭ Rasii.
«My prosim pakarać jaho pa ŭsioj strohaści zakona, — cytuje deputata hazieta «Iźviestija», jakaja naležyć «Hazpromu». — Bo heta jak minimum niecenzurnaja łajanka ŭ hramadskim miescy. Niachaj prakuratura raźbirajecca, jakoje ŭ jaho hramadzianstva, mahčyma, jon stanie piersona non hrata dla Rasii».
Deputat u zvarocie adznačyŭ, što Siarhiej Michałok — hramadzianin Biełarusi, a ŭ Maskvie jon «chavajecca ad prakurorskaj pravierki, jakaja pravodzicca ŭ dačynieńni da jaho biełaruskaj Hienieralnaj prakuraturaj». Na samoj spravie pravierka nie vyjaviła składu złačynstva ŭ vykazvańniach. Jana pravodziłasia z nahody vykazvańniaŭ Michałka z asudžeńniem dyktatury ŭ Biełarusi i Łukašenki.
«Iźviestija» cytujuć pres-ataše hurtu Alaksandr Bierhier, jaki paśla kancerta zajaviŭ, što nie bačyć padstaŭ rasceńvać vykazvańni Michałka jak abraźlivyja. «Ad imia hrupy «Lapis Trubiackoj» chaču paprasić prabačeńnia ŭ imbiecyłaŭ, a taksama rodnych i blizkich ludziej, jakija žyvuć z hetaj ciažkaj chvarobaj. My nie chacieli ich pakryŭdzić», — pryvodzić hazieta jahonyja słovy.
Pradziusar hurtu Jaŭhien Kałmykoŭ ŭ razmovie z vydańniem abvierh infarmacyju pra toje, što incydent adbyŭsia ŭ Rasii. «My nie razumiejem, što adbyvajecca, bo ŭ Ižeŭsku nie było takoha. Heta nie ź Ižeŭska. Heta z Hiermanii, dzie Michałku fašysty zihavali, potym pakazali nieprystojnyja žesty», — skazaŭ jon.
Siarhiej Michałok abviaściŭ ab rospusku hurtu «Lapis Trubiackoj» z 1 vieraśnia. Kancerty «Lapisaŭ» byli admienienyja ŭ Ciumieni i Pskovie. U Biełarusi vystupy hrupy zabaronienyja daŭno. U vyniku hurt źbiraje poŭnyja zały biełarusaŭ u susiednich Vilni i Varšavie.
«Lapisy» vystupali na Majdanie. Usie apošnija albomy hurtu byli prasiaknutyja idejami svabody i nacyjanalnaha vyzvaleńnia. Pieśni «Voiny śvieta, voiny dabra» i «Nie być skotam» masava śpiavajuć ukraincy.
U Rasii razharnułasia kampanija ckavańnia tych hramadskich dziejačoŭ i tvorcaŭ, jakija asudzili anšlus Kryma i ŭmiašańnie va Ukrainie. Pad udar trapili śpiavak Andrej Makarevič i vizijanier, stvaralnik Ukantakcie Pavieł Duraŭ.
Ciapier čytajuć
«Ja jedu natchnicca ŭkraincami». Śviatłana Cichanoŭskaja pačała aficyjny vizit va Ukrainu16
Kamientary