Ci ŭpiknie Łukašenka Kosinca za syna? Piać faktaŭ pra novaha kiraŭnika Administracyi Alaksandra Kosinca
Alaksandra Kosinca viarnuli ź Viciebska ŭ Minsk. Ciapier jon kiraŭnik Administracyi prezidenta.
Ź vioski Roski Sialec
Alaksandr Kosiniec naradziŭsia ŭ 1959 hodzie ŭ vioscy Roski Sialec, u 15 kiłamietrach ad Oršy. Letaś byŭ apublikavany nievialiki repartaž z radzimy Alaksandra Kosinca na sajcie belhist.ru. Ź jaho vynikaje, što ŭ vioscy pa-raniejšamu žyvie rodnaja ciotka Kosinca Viera Mikałajeŭna Łapo. A voś maci staršyni abłvykankama pierajechała ŭ horad. A baćki ŭ žyvych užo niama.
Alaksandr Kosiniec zrabiŭ vydatnuju karjeru ŭ miedycynie. Jon byŭ viadomym u krainie chirurham. Užo ŭ 37 hadoŭ staŭ prafiesaram. Mała chto ź miedykaŭ moža pachvalicca takim. Kažuć, što ŭsio heta było zasłužana. Jon aŭtar mnosta navukovych publikacyj i manahrafij. Naprykład, «Nyračna-kletačny rak» (2002), «Prateinazy i ich inhibitary ŭ hnojnaj chirurhii i ankałohii» (2003). U 1997-m staŭ rektaram Viciebskaha mieduniviersiteta.
Syn taksama miedyk, ale ŭ Maskvie
Syn Alaksandra Kosinca Uładzimir pajšoŭ darohaj taty. Jon pastupiŭ u Viciebski miedunivier, na lačebny fakultet, jaki skončyŭ u 2006 hodzie. A ŭžo ŭ 2009 abaraniŭ kandydackuju rabotu na temu «Karekcyja bijaenierhietyčnych pracesaŭ u myšačnaj tkancy tonkaj kiški pry raspaŭsiudžanym hnojnym pierytanicie».
Na hetym svaju adukacyju Uładzimir Alaksandravič Kosiniec nie zaviaršyŭ. Udaskanalvać jaje jon pajechaŭ u Rasiju, dzie ŭ 2013-m abaraniŭ doktarskuju dysiertacyju ŭ Pieršym Maskoŭskim dziaržaŭnym miedycynskim ŭniviersitecie imia Siečanava. Jamu ŭsiaho 32 hady, ale na rachunku maładoha miedyka zvyš 80 navukovych rabot, u tym liku «adzin padručnik, try manahrafii i piać vynachodnictvaŭ».
Pracuje jon taksama ŭ Maskvie, u Jeŭrapiejskim miedycynskim centry, u adździaleńni płastyčnaj chirurhii.
Pryjarytetam u pracy Uładzimira Kosinca źjaŭlajecca: pavieličeńnie hrudziej pry dapamozie impłantantaŭ, padciažka hrudziej, konturnaja płastyka cieła.
Cikava, ci budzie aburacca Łukašenka tym faktam, što syn Kosinca źjechaŭ za miažu, jak niadaŭna aburaŭsia dziećmi byłoha ministra adukacyi Maskieviča, jakija žyvuć u ZŠA?
Baraćba z pjanicami i darmajedami
Staršynia Viciebskaha abłvykankama zaŭsiody byŭ na piarednim płanie hetaj baraćby. Dziaržaŭnyja telekanały navat demanstravali kadry, jak Kosiniec asabista abychodziŭ kvatery ałkaholikaŭ.
Hetym samym jon adznačaŭsia i pracujučy ŭ Minsku. Padčas sustrečy z baćkami, čyje dzieci znachodziacca na dziaržaŭnym vychavańni, Kosiniec stroha papiaredziŭ ich: «Dva-try razy prahulaŭ pracu — na dva hady ŭ kałoniju».
Nie moh viciebski načalnik zastacca ŭbaku ad zusim niadaŭniaj palityki baraćby z «darmajedami». «Nie treba ni z kim cyrymonicca, nie chočać pracavać — značyć treba prymusić».
Ale samaj cikavaj prapanovaj enierhičnaha «hubiernatara» było štrafavać ludziej, jakija admaŭlajucca sačyć za ŭłasnym zdaroŭjem.
Dom u Drazdach
Kali Kosinca pieraviali ŭ Viciebsk u 2008-m, to jon, zdajecca, ni na chvilinku nie zasumniavaŭsia ŭ tym, što vierniecca nazad u Minsk. Nie admaŭlaŭsia i ad učastku ŭ Drazdach, inšych staršyni abłvykankamaŭ takoj majomaści ŭ Minsku nie majuć.
«Cikavy elemient, jaki pryjšoŭ da nas z rasijskich katałohaŭ, — vierchniaje akno na haryščy ŭ vyhladzie paŭkoła, jakoje ŭrezana ŭ inšaje paŭkoła. Heta pierasiačeńnie dźviuch niemahčymych fihur», - piša architektar Alaksandra Bajaryna, jakaja vysoka acaniła estetyku doma kiraŭnika Viciebščyny.
Alhierd u Viciebsku
U Viciebsku Kosiniec raźvioŭ burnuju dziejnaść. Naprykład, na centralnaj płoščy pastaviŭ samuju vialikuju ŭ krainie navahodniuju jołku. Vidavočna, što rabiłasia heta, kab źviarnuć na Viciebsk uvahu. «Viciebskaja jołka nie sastupaje minskaj», — pisali ŭ 2009-m hodzie abłasnyja vydańni.
Praŭda, ź jalinkaj toj vyjšaŭ kazus. I ŭ historyju jana ŭvajšła tym, što na jaje bieł-čyrvona-bieły ściah uźniaŭ aktyvist KCHP-BNF Siarhiej Kavalenka, jakoha paźniej sudzili za heta.
Kosiniec patrabavaŭ adkryvać u Viciebsku dobryja kaviarni. Naturalna, što pa vyšejšamu razradu jon staraŭsia pravodzić piesienny konkurs «Słavianski bazar».
Siarod pazityŭnych rečaŭ – adkryćcio ŭ Viciebsku pomnika vialikamu kniaziu Alhierdu, choć spadary rusafiły i pisali šmatlikija listy abureńnia.
«Hety čałaviek — vialiki palityk i dziaržaŭny dziejač. Jon adyhraŭ vialikuju rolu ŭ raźvićci biełaruskaj dziaržaŭnaści, u raźvićci samaha Viciebska. Pa sutnaści spravy, kamienny Viciebsk byŭ pabudavany im. I ŭ tyja časy litvinami nazyvalisia biełarusy. Jon šmat što zrabiŭ dla razhromu ardy i vyzvaleńnia Kijeŭskaj Rusi «, - pieraličyŭ zasłuhi kniazia Alaksandr Kosiniec na adkryćci pomnika.
Ciapier čytajuć
Departavanyja pry pasiarednictvie amierykancaŭ palitviaźni zaviśli miž piekłam i ziamloju — biez DNŽ i mahčymaści pracavać3
Kamientary