Dzied Baradzied, Buślik i Topa: «Kałychanka» adznačaje 35-hodździe FOTA
Adzin z najstarejšych prajektaŭ biełaruskaha telebačańnia i ŭ toj ža čas prahrama, jakaja zastajecca zaŭždy maładoj, bo raźličana na dziciačuju aŭdytoryju, — «Kałychanka» — na pačatku studzienia adznačaje svajo 35-hodździe.
Novy 2016 hod biełarusy sustrakajuć vialikim jubilejem nacyjanalnaha telebačańnia, jakoje isnuje 60 hadoŭ. Za hety čas było padrychtavana šmat dziciačych prajektaŭ, ale, biez sumnieńniaŭ, pieršaj prahramaj, što ŭzhadaje kožny, budzie «Kałychanka».
Dzied Baradzied, chłopčyk Bulbinka, sabačka Cimošyk i Dziadula Lesavičok — heta daloka nie poŭny śpis hierojaŭ, na jakich vyrasła nie adno pakaleńnie.
«U 1981 hodzie my chacieli stvaryć viačerniuju kazku, maksimalna nie padobnuju da «Spokojnoj noči, małyši!», jakaja budzie mieć nacyjanalny kałaryt», — padzialiłasia ŭspaminami stvaralnica «Kałychanki» Nina Viačasłavaŭna Šoba, jakaja doŭhi čas była hałoŭnym redaktaram prahram dla dziaciej i junactva. Mienavita jana padała ideju pieršaj biełaruskaj viačerniaj kazki dla dziaciej, prydumała kancepcyju prahramy i nazvu «Kałychanka». Razam ź vialikaj kamandaj, u pieršuju čarhu ź Vieraj Ruckaj, Ludmiłaj Tarasavaj, Leanidam Kačankam, Alenaj Fursavaj, jana ažyćciaviła svaju aryhinalnuju zadumku.
Adnymi ź pieršych piersanažaŭ «Kałychanki» byli žartaŭnik i kazačnik Dziadula Baj, a siarod lalek — Buślik. Darečy, 1 studzienia Buślik vierniecca z doŭhaha padarožža na teleekrany, ci heta ŭžo chutčej budzie jaho praŭnuk. Jon znoŭ pazabavić maleńkich hledačoŭ kanała «Biełaruś 3» razam ź lisičkaj Janaj (Inaj Hančar) i miedźviedzianiatkam Topam (Uładzimiram Varankovym). Kali raniej lalečnych hierojaŭ ahučvali supracoŭniki dziciačaj redakcyi Biełaruskaha telebačańnia, to siońnia heta prafiesijnyja akciory, i Buślik zahavoryć hołasam aktrysy Emilii Pranskute, jakaja raniej ahučvała Splušyka ŭ «Kałychancy».
Adpraŭlaje chłopčykaŭ i dziaŭčynak u čaroŭny śviet kazki zładžanaja prafiesijnaja kamanda: Fieja snoŭ (Alena Bikreniova), Dziadula Dabradziej (Valancin Sałaŭjoŭ), vandroŭnik Niestar (Siarhiej Žbankoŭ) i niania Palinka (Taćciana Čardyncava). Redaktary ŭvieś čas znachodziacca ŭ tvorčym pošuku, vydumlajuć raznastajnyja cikavyja formy padačy materyjału, stvarajuć novyja dekaracyi. Hieroi «Kałychanki» taksama ŭvieś čas abnaŭlajucca, bo prahrama kročyć razam z sučasnymi dziećmi, jakija raźbirajucca ŭ najnoŭšych kampjutarnych technałohijach i, viadoma, multyplikacyi.
U studzieni kanał «Biełaruś 3» pačnie pakazvać 12-sieryjny multsieryjał «Prodki», vytvorcami jakoha źjaŭlajucca maładyja biełaruskija animatary. Stvaralniki «Kałychanki» ŭpeŭnieny, što novy multfilm pryjdziecca daspadoby maleńkim hledačam.
«My nabyvali sieryjał na ruskaj movie, ale pieraahučvajem na biełaruskuju, što stanie padarunkam dla dzietak u jubilej «Kałychanki». Dla našych prychilnikaŭ padrychtavana šmat siurpryzaŭ. Naprykład, u kancy studzienia płanujem adkryć vystavu, pryśviečanuju 35-hodździu lubimaj prahramy, u Muziei historyi teatralnaj i muzyčnaj kultury Biełarusi, kudy abaviazkova zaprosim našych hledačoŭ. Padčas vystavy budzie pakazany videafilm pra historyju «Kałychanki», stvorany Biełteleradyjokampanijaj», — raspaviała vykanaŭčy pradziusar telekanała «Biełaruś 3» Łarysa Jesarcija.
«Kałychanka» ščyra vinšuje svaich maleńkich i darosłych hledačoŭ z cudoŭnymi zimovymi śviatami i žadaje ŭsiaho samaha dobraha.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Kamientary