Błohiera, aŭtara bajavitaha sajta 1863x.com, zatrymali ŭ Rasii. Pra heta pišuć u sacyjalnych sietkach jahonyja siabry.
Jany miarkujuć, što jaho tudy vyklikali ludzi, jakija abiacali jamu cikavuju infarmacyju.
«Usio vyhladaje vielmi dziŭna», — pryznaje hramadski aktyvist Pavieł Juchnievič.
Sa słovaŭ Juchnieviča, ciapier Jhon Silver moža znachodzicca ŭ SIZA adnaho z haradoŭ Rasiei i čakać ekstradycyi ŭ Biełaruś.
Kantakta ź im niama ni ŭ koha, navat u žonki. Jak stała viadoma pra jahonaje zatrymańnie, pakul niezrazumieła.
Błohier nazyvaŭ siabie Jhon Silver. Svajho sapraŭdnaha imia dla publiki jon nie raskryvaŭ, choć pravaachoŭnym orhanam jano było viadomaje. Pa jahonych słovach, suprać jaho ŭ Biełarusi letaś byli zaviedzienyja kryminalnyja spravy, a jon parušyŭ padpisku pra niavyjezd i razam z žonkaj vyjechaŭ va Ukrainu, dzie chacieŭ atrymać palityčny prytułak.
Poŭny varyjant jahonaha artykuła-spoviedzi na 1863x.com čytajcie tut.
Błohier raskazvaŭ, što ŭ Biełarusi jaho spačatku abvinavacili pa 130 artykule KK RB — raspalvańnie varožaści pa nacyjanalnaj prykmiecie za hety materyjał na sajcie 1863ch.com, a taksama za inšyja artykuły ŭ padtrymku Ukrainy na sajcie. Śledčyja interpretavali zaklik «Zabi «Ruski śviet» jak zaklik da zabojstva ŭsich ruskich.
Jhon Silver piša, što bajaŭsia za svaich rodnych i niaviestu — jakuju taksama šmat razoŭ dapytvali, bo jana była adzinym śviedkam jahonaj dziejnaści. Jon pryznaŭsia, što jon i jość stvaralnikam i administrataram sajta.
Paśla jahonych pryznańniaŭ, zapisanych na kamieru, chłopca na miesiac adpravili ŭ «Navinki» na dobraachvotnuju sudova-psichičnuju ekśpiertyzu. Tam jamu dazvalali sustrečy z rodnymi i siabrami, tam jon i daznaŭsia, što jahonaje źniknieńnie ź sieciva zaŭvažyli ŚMI. Jon miarkuje, što rozhałas u ŚMI i dapamoh jamu.
Paśla miesiaca ŭ «durcy» jaho adpuścili pad padpisku ab niavyjeździe.
Adnak paśla taho jak jon adnaviŭ publikacyi 1863ch.com, śćviardžaŭ jon, praź niekatory čas suprać jaho zaviali jašče adnu kryminalnuju spravu, za parnahrafiju, jakuju znajšli ŭ niekatorych fotažabach — čužych, jakija jon pieradrukavaŭ z rasijskaha šavinistyčnaha resursu ŭ jakaści prykładu rasijskaj prapahandy.
Paśla hetaha chłopiec vyrašyŭ pierajechać va Ukrainu razam z žonkaj. «Ja viarnusia pry pieršaj mahčymaści», — kazaŭ jon.
Pavieł Juchnievič taksama nie viedaje proźvišča błohiera, choć i sustrakaŭsia ź im užyvuju. Bačyŭ Silviera i žurnalist Pavieł Šaramiet.
Na pytańnie «Našaj Nivy», čamu jon zachoŭvaje ananimnaść, jon praz fejsbuk adkazaŭ: «Show Must Go On. Prajekt zadumvaŭsia jak ananimny ad pačatku i da kanca. Tamu, kolki zmahu, stolki i budu padtrymlivać atmaśfieru».
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj30
Kamientary