Jak armianin zapuściŭ biznes pa-biełarusku i dapamoh kursam «Mova Nanova»
Kolki tydniaŭ tamu dyrektar kursaŭ «Mova Nanova» Hleb Łabadzienka abviaściŭ pra patrebu ŭ kresłach i łavach dla naviednikaŭ zaniatkaŭ u Minsku. Achvotnych vučyć movu stanovicca ŭsio bolš, na apošnija, sotyja zaniatki, pryjšło kala 350 čałaviek! Mnohim daviałosia słuchać stojačy.
Hleb mierkavaŭ sabrać na łavy 700 rubloŭ, ale achvotnych dapamahčy nie słovam, a spravaj, akazałasia nie tak šmat. Nieviadoma, ci atrymałasia b naźbirać patrebnuju sumu, kali b usiu jaje nie achviaravaŭ armianski biznesoviec Vahan Kierabian.
Tydzień tamu jon daŭ start svajmu prajektu ŭ Biełarusi — dastaŭcy ježy pa Minsku menu.by. Sajt zapuścili adrazu ŭ troch viersijach: biełaruskaj, anhlijskaj i ruskaj. Apieratar, jakaja prymaje zamovy, taksama vałodaje biełaruskaj movaj.
Sa stvareńniem biełaruskamoŭnaj viersii sajta i dadatku dla smartfona biznesoŭcu dapamahła «Chutkaja moŭnaja dapamoha», jakaja pracuje ŭ miežach kursaŭ «Mova Nanova». Dla ŭsich hramadska-značnych prajektaŭ jana całkam biaspłatnaja. Adnak kali Vahan Kierabian daznaŭsia pra toje, što kursam samim patrebna dapamoha, adrazu pieraličyŭ hrošy.
«Ja liču, što luby sajt u Biełarusi pavinien mieć biełaruskuju viersiju, tamu što heta rodnaja mova ludziej, jakija tut žyvuć, — prakamientavaŭ svajo rašeńnie biznesoviec. — Zrabić hodnuju biełaruskamoŭnuju viersiju nam dapamahli kursy «Mova Nanova», i ja vielmi zadavoleny, što jana ŭ nas pracuje ad samaha pačatku. Kali ja daviedaŭsia, što kursam patrebnaja dapamoha, vyrašyŭ abaviazkova dapamahčy, pakolki jany imknucca zachavać biełaruskuju movu».
Hleb užo nabyŭ łavy na achviaravanyja hrošy, ale pakul što niezrazumieła, ci budzie ich dastatkova.
«Akramia Vahana Kierabiana zrabili achviaravańni jašče dzieviać čałaviek, tamu my naźbirali navat krychu bolš, čym treba, i nabyli bolš łavaŭ, čym płanavali, — kaža Łabadzienka. — Kali abviaścili zbor srodkaŭ, našy suajčyńniki pačali davać parady. Adzin paraiŭ kupić kresły zamiest łavaŭ, druhi — kupić došak i zrabić łavy. Treci — pasadzić dziaŭčat chłopcam na kaleni, a čaćviorty — dalej siadzieć na padłozie, bo i tak narmalna. A voś armianin mała taho što svoj biznes adrazu zapuściŭ pa-biełarusku, jašče i kursy našy padtrymaŭ. Dziakuj jamu vialiki, što jon pastupiŭ u hetaj situacyi najlepšym čynam — dapamoh».
Naźbiraŭšy tak niečakana ŭsiu patrebnuju sumu, Hleb staŭ šukać, dzie nabyć łavy pa samym vyhadnym košcie. I tut jaho znoŭ čakaŭ pryjemny bonus.
«Ja znajšoŭ u adnoj firmie łavy pa 39 rubloŭ. Patelefanavaŭ tudy, zapytaŭsia pra ich, a čałaviek, što źniaŭ słuchaŭku, pierajšoŭ na biełaruskuju movu i skazaŭ: «Sapraŭdy, adna łava kaštuje 39 rubloŭ, ale vam za biełaruskuju movu — 30 rubloŭ», — raspaviadaje Hleb Łabadzienka.
— Siońnia pryjechaŭ na skład zabirać łavy i zapytaŭsia, z kim razmaŭlaŭ učora pa telefonie. Akazałasia, z dyrektaram. Ja jamu na radaściach padpisaŭ knižku «Mova Nanova: 20 krokaŭ da biełaruskaj movy». Vielmi pryjemna ŭ niečakanych situacyjach sustrakać ludziej, jakija pryjazna nastrojenyja da biełaruskaj movy. Časta ludzi pamyłkova kažuć: jak sa mnoj, tak i ja. Voś havaryŭ by ja ź im pa-rusku, pa 39 rubloŭ atrymaŭ by łavy».
Kursy ciapier pracujuć u 11 haradach Biełarusi, i aproč łavaŭ, jość patreba ŭ łaziernym pryntary, prajektary, dvuch ekranach, troch noŭtbukach, kałonkach ci kombiku dla muzykaŭ, kampjutarnych kałonkach.
Kali vy možacie achviaravać hetyja rečy, listujcie na [email protected] albo telefanujcie pa numary 8 (029) 112-93-74.
Pamior palitviazień Valancin Štermier. «Ledź chadziŭ paśla insultu — a jaho kinuli ŭ ŠIZA»7
Kamientary