Abrany prezident ZŠA Donald Tramp prapanavaŭ svajmu ziaciu Džaredu Kušnieru zaniać pasadu adnaho sa staršych daradcaŭ ŭ Biełym domie, piša Bi-bi-si.
35-hadovy Kušnier aktyŭna ŭdzielničaŭ u vybarčaj kampanii Trampa, na pasadzie ŭ Biełym domie jamu pryjdziecca zajmacca pytańniami jak unutranaj, tak i źniešniaj palityki.
U Kušniera, jak i ŭ Trampa, niama vopytu dziaržaŭnaha kiravańnia.
Jaho pryznačeńnie na pasadu ŭ administracyju prezidenta nie stała niečakanaściu, adnak vyklikała supiarečlivuju reakcyju. Amierykanskija ŚMI adznačajuć, što pakul niezrazumieła, ci nie parušaje hetaje pryznačeńnie zakona, jaki zabaraniaje kumaŭstvo, i ci nie pryviadzie jano da kanfliktu intaresaŭ.
«Džared unios vialiki ŭkład i byŭ davieranaj daradcam na praciahu ŭsioj kampanii i pierachodnaha pieryjadu, i ja hanarusia, što jon budzie zajmać klučavuju rolu ŭ majoj administracyi», - zajaviŭ Tramp.
Džared Kušnier — unuk jaŭrejaŭ, što vyžyli ŭ Navahrudskim hieta.
«Ja — unuk ludziej, što acaleli u Chałakoście, — pisaŭ jon, baroniačy svajho cieścia Donalda Trampa ad abvinavačvańniaŭ u antysiemityźmie. … — U 1943 hodzie ŭ noč pierad judejskim Novym hodam 250 čałaviek — usio, što zastałosia ad 20-tysiačnaha jaŭrejskaha nasielnictva horada, zadumali ŭciačy praz vykapany imi padziemny chod, jaki vyvodziŭ za aharodžu. Jany abiastočyli pražektary i vyniali ćviki ź blašanaj strachi, kab jana hrukatała na vietry i zahłušała huki ŭciokaŭ… Babula dabrałasia da lesu, dzie ŭstupiła ŭ partyzanski atrad bratoŭ Bielskich. Tam jana sustrełasia ź dziadulem, jaki ŭciok z pracoŭnaha łahiera. Da taho jon try hady pražyŭ u lesie ŭ ziamlancy — faktyčna ŭ jamie, jakuju jon sam vykapaŭ — siłkujučysia padnožnym kormam, chavajučysia i načujučy ŭ hetaj jamie navat surovaj zimoju».
Dzied Džareda Zejdel mieŭ u Navahrudku dźvie majsterni pa pašyvie hałaŭnych uboraŭ, a baćka Džareda Čarlz niekalki hadoŭ tamu dvojčy pryjazdžaŭ u Navahrudak i akazvaŭ sponsarskuju dapamohu muzieju.
Ciapier čytajuć
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram18
«Pryhraziła pajści da inšaha». U MUS raskazali padrabiaznaści zabojstva 43‑hadovaj ciažarnaj žančyny chakiejnym arbitram
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary