Hałoŭnymi placoŭkami dla pakazaŭ ciaham 7 dzion stanuć kinateatry «Mir» u Minsku i Viciebsku.
Heta ŭžo treciaje pa liku «Paŭnočnaje źziańnie» dla Biełarusi. Sioleta ŭsie kinapadziei adbuducca pad łozunham «Suśviet unutry». «My vierym, što kožny z nas — heta ceły suśviet. A fiestyval kino paŭnočnych i bałtyjskich krain — ceły suśviet unutry kampaktnaha kinafiestyvalu», — kažuć arhanizatary.
Ahułam hledačoŭ čakaje 14 stužak z Narviehii, Šviecyi, Danii, Finlandyi, Isłandyi. Upieršyniu biełarusam tut prezientujuć filmy ź Litvy, Łatvii i Estonii.
Voś tolki niekalki cikavinak z taho, što nam abiacajuć arhanizatary. Upieršyniu ŭ prahramie pradstaviać dva dakumientalnyja filmy: estonski «Murašnik» pra haražy ŭ Talinckim rajonie Łaśniamiae, jaki źjaŭlajecca pabracimam Partyzanskaha rajona ŭ Minsku, i isłandski dakumientalny film «Usim vidoviščam vidovišča», muzyku dla jakoha pisali hihanty isłandskaj muzyčnaj sceny «Sigur Ros».
Akramia pakazaŭ, fiestyval prapanuje pašyranuju prahramu dadatkovych mierapryjemstvaŭ: majstar-kłasy kiniematahrafistaŭ, kinakrytykaŭ i dyzajnieraŭ. Imiony zaprošanych haściej sapraŭdy ŭražvajuć: finski pradziusier Kaarle Acho, naminavany na Oskar za najlepšy film na zamiežnaj movie, rasijski kinakrytyk, śpiecyjalist pa skandynaŭskim kino Anton Dolin i inš.
Aficyjnaje adkryćcio fiestyvalu — 20 krasavika ŭ Minsku. Ceny na ŭsio heta vidovišča demakratyčnyja, usiaho 5 rubloŭ.
Z poŭnaj prahramaj možna paznajomicca na aficyjnym sajcie mierapryjemstva.
Kamientary