11 maja ŭ Minsku adkryvajecca vystava časopisa «Imiony». Na joj pakažuć 10 instalacyj, jakija biełaruskija mastaki i fotamastaki zrabili razam z hierojami internet-prajekta. U dni vystavy možna budzie ŭbačyć nie tolki instalacyi, ale i pahladzieć sacyjalnaje kino, uziać udzieł u «Žyvoj biblijatecy» i pabyvać na kirmašy ramieśnikaŭ.
Dziesiać biełaruskich mastakoŭ u pary z hierojami prajektaŭ internet-časopisa «Imiony» stvaryli tvory mastactva: instalacyi, fatahrafii, aŭdyjo- i videainstalacyi. Praca doŭžyłasia paŭhoda. Zaraz tvory pakažuć na vystavie ŭ kulturnym centry «Korpus» (Minsk, praśpiekt Mašerava, 9, korpus 8).
U prajekcie ŭdzielničajuć mastaki i fotamastaki: Andrej Lankievič, Alaksandr Vasiukovič, Siarhiej Hudzilin, Siarhiej Šabochin, Maryja Śviatahor, Antanina Słabodčykava, Maksim Jasinski, Kirył Dziamčyła, Volha Sasnoŭskaja, hrupa «Chutka-smačna».
«Imiony» pišuć pra biełarusaŭ, jakim patrebna dapamoha, i ab sacyjalnych prajektach, jakim patrebna padtrymka. Hieroi materyjałaŭ źbirajuć hrošy praz kraŭdpłatformu Talaka.by. Krychu bolš čym za hod svajho isnavańnia «Imiony» zapuścili 22 hramadska značnyja, vostrasacyjalnyja prajekty i sabrali ŭ ich padtrymku (uklučajučy i sam prajekt «Imiony») — 283 tysiačy rubloŭ.
U dni vystavy zapłanavany asobnyja mierapryjemstvy. Naprykład, 14 maja projdzie niadzielny kirmaš, dzie možna budzie kupić tavary ŭ ramieśnikaŭ, jakija tak ci inakš źviazany z temami, jakija padymaje časopis. U prahramie jość i śpiektakl, pryśviečany prablemie inkluzii, i navat 3D prajekcyja multfilmaŭ «Asablivaj multstudyi» na fasad «Korpusa» ŭviečary 20 traŭnia. Zapłanavana i «Žyvaja biblijateka» — prajekt, u jakim ludzi «čytajuć» historyi adno adnaho.
Siońnia, 11 traŭnia, vystava budzie pracavać z 19.00 da 22.00. Padrabiaznaści ab mierapryjemstvie tut. U inšyja dni, da 25 traŭnia, vystava budzie pracavać z 12.00 da 21.00. Raskład padziej u vystavačnaj prastory možna pahladzieć tut.
Uvachod na vystavu budzie arhanizavany pa sistemie achviaravańniaŭ (bilet moža kaštavać ad troch rubloŭ). Usia suma ad pradadzienych biletaŭ budzie nakiravana na raźvićcio časopisa «Imiony».
U Minsku vystava praciahniecca da 25 traŭnia, a potym pierajedzie ŭ Brest i Viciebsk.
Ciapier čytajuć
U Minsku pamior adzin z samych viadomych zabojcaŭ Rasii. Jon žyŭ pad čužym imieniem i staŭ piśmieńnikam-fantastam5
Kamientary