Juryj Žyhamont ahučyŭ Jevanhielle pa-biełarusku. Treba dapamoha ŭ vydańni zapisu

Biełaruski akcior i televiadučy Juryj Žyhamont, viadomy pa pieradačy «Padarožžy dyletanta», padrychtavaŭ aŭdyjoviersiju Jevanhiella na biełaruskaj movie. Prajekt byŭ ažyćciaŭlony ŭ supracoŭnictvie z pravasłaŭnym bractvam u honar Vilenskich mučanikaŭ, sacyjalna-kulturnaj ustanovaj «MocArt» i kampanijaj «Prastora.by».

Inicyjataram stvareńnia aŭdyjozapisu biełaruskaha Jevanhiella staŭ sam Juryj Žyhamont. U jakaści asnovy byŭ uziaty pierakład Jevanhiella, vykanany členami Biblejskaj kamisii Biełaruskaj pravasłaŭnaj carkvy. Padrychtoŭka zapisu zaniała niekalki hod, na praciahu jakich u studyi kampanii «Prastora.by» było zapisana niekalki dziasiatkaŭ hadzin aŭdyjomateryjału. Kančatkovaja viersija zapisu, jaki ŭklučaje čatyry Jevanhielli (pavodle Matfieja, Marka, Łuki i Iaana), maje praciahłaść bolš za 11 hadzin.

— Śviatary prasłuchali padrychtavany zapis i byli pierakananyja, što heta vartasny prajekt, — raskazvaje supracoŭnik vydavieckaha adździeła bractva ŭ honar Vilenskich mučanikaŭ Kastuś Antanovič. — Jevanhielle ŭ farmacie, padrychtavanym Juryjem Žyhamontam, hučyć bolš dastupna i dobra ŭsprymajecca ŭ tych situacyjach, kali čałavieku bolš zručna prasłuchać Jevanhielle, čym pračytać. Tym bolš u zamiežžy žyvie šmat biełarusaŭ, jakija dobra ŭsprymajuć rodnuju movu, ale im ciažka čytać na kirylicy, i taki prajekt daść im mahčymaść pačuć rodnaje słova, nie prykładajučy nijakich dadatkovych namahańniaŭ.

Padrychtoŭka zapisu ažyćciaŭlałasia pry padtrymcy placoŭki «MocArt» — arhanizacyi, aryjentavanaj na dapamohu ludziam z abmiežavanymi mahčymaściami. Pa słovach Kastusia Antanoviča, prajekt pa ahučvańni Jevanhiella taksama zadumvaŭsia z metaj taho, kab dać mahčymaść pačuć słova Božaje nieviduščym i ludziam, chto pa stanie zdaroŭja nie maje mahčymaści čytać. Jašče adna z met prajekta — papularyzacyja Jevanhiella na biełaruskaj movie siarod moładzi, i isnujuć płany raspaŭsiudžvańnia častki zapisu ŭ adkrytym dostupie.

Na siońniašni dzień vypuščanyja tolki niekalki dyskaŭ z zapisam biełaruskaha Jevanhiella. U stvaralnikaŭ prajekta jość meta raspaŭsiudžvać dyski siarod ludziej z abmiežavanymi mahčymaściami, ale dla hetaha zaraz nie chapaje srodkaŭ, i tamu ažyćciaŭleńnie hetaha dabračynnaha prajekta zaležyć ad nas z vami. Vašy achviaravańni mohuć dapamahčy ŭ vyrabie dyskaŭ, jakija potym pry padtrymcy placoŭki «MocArt» buduć pieradadzienyja ludziam z prablemami zdaroŭja, i mahčyma niechta ź ich upieršyniu pačuje Jevanhielle na rodnaj, biełaruskaj movie.

Pa pytańniach padtrymki prajekta vy možacie źviartacca da bractva ŭ honar Vilenskich mučanikaŭ, adras elektronnaj pošty [email protected].

• 0
• 0
• 0
• 0
• 0
• 0
• 0
• 0