Łukašenka pravioŭ naradu pa vynikach pieramoŭ z Pucinym. Havorka pra «dva varyjanty» pastavak naftapraduktaŭ
Biełaruska-rasijskija pieramovy ŭ Sočy byli ciažkija, ale vynikovyja. Pra heta Alaksandr Łukašenka zajaviŭ 22 vieraśnia na naradzie z udziełam členaŭ urada ŭ Minsku, paviedamlaje pres-słužba prezidenta.
«Asnoŭnaja častka pieramoŭ była sam-nasam z prezidentam. Pieramovy doŭžylisia 6 hadzin, navat bolš. I kali ščyra, to heta byli navat nie składanyja, a ciažkija pieramovy. Ale vynikovyja», — skazaŭ Alaksandr Łukašenka.
U farmacie sam-nasam abmiarkoŭvalisia palityčnyja pytańni, uzajemaadnosiny Rasii i Biełarusi ŭ ramkach JEAES, SND, ADKB i dalejšaha budaŭnictva Sajuznaj dziaržavy.
«Kankretnyja pytańni ŭ nas, viadomyja pytańni, pa ADKB, pierš za ŭsio, staršynstva ŭ ADKB i raźvićcia hetaj arhanizacyi. Šmat uvahi my nadali balučych pytańniach u ramkach SND, jakija datyčać našych abiedźviuch dziaržaŭ.
Pierš za ŭsio — Ukraina. U vielmi pazityŭnym klučy byŭ dyjałoh», — zajaviŭ Alaksandr Łukašenka.
«Dumaju, što hetyja pytańni buduć jašče abmiarkoŭvacca pierš za ŭsio ŭ Dušanbe praz tydzień [na samicie SND]. Nu i nie abydziem my ich 12 kastryčnika ŭ Mahilovie padčas Forumu rehijonaŭ Biełarusi i Rasii, na jakim buduć abodva prezidenty i kiraŭniki ŭradaŭ», - dadaŭ Łukašenka.
«Samaje hałoŭnaje pytańnie, jakoje abmiarkoŭvałasia, było źviazana ź viartańniem hrašovych srodkaŭ ad «pieramytnieńnia» syroj nafty ŭ biełaruski biudžet.
A taksama pytańnie pierapracoŭki ŭ Biełarusi ciomnych naftapraduktaŭ, da prykładu, mazuty, jakaja kuplałasia našymi kampanijami ŭ rasijskich, pierapracoŭvałasia, a naftapradukty pradavalisia na biełaruskim i zamiežnych rynkach», — adznačyŭ Łukašenka.
«Heta niaprostaje, składanaje pytańnie. My vypracavali dva varyjanty i damovilisia z prezidentam Rasii, što my hetyja dva varyjanty abmiarkujem u Minsku. I ŭ Dušanbe [na palach samita SND] kančatkova ŭzhodnim rašeńnie hetaha pytańnia», — zajaviŭ Łukašenka.
«Ale faktyčna jano vyrašana. Treba vybrać toj ci inšy varyjant. Siońnia my i abmiarkujem z vami, jaki varyjant, pahłybiŭšysia ŭ tyja damoŭlenaści, jakich my dasiahnuli z Rasiejaj», — dadaŭ Alaksandr Łukašenka.
Havaryłasia taksama pra płan uzajemnych pastavak sielhaspradukcyi, raskazaŭ jon. «My pryjšli da vysnovy, što litaralna na praciahu tydnia budzie vypracavany indykatyŭny bałans, heta značyć płan uzajemnych pastavak sielhaspradukcyi. Heta hałoŭnaje», — zajaviŭ Łukašenka.
Alaksandr Łukašenka zajaviŭ, što vystupaje za kaapieracyju z Rasijaj i ŭ pramysłovaści. «Havorka išła ab viadomych prablemach mašynabudaŭničych kompleksaŭ. My asabliva šmat uvahi nadali hetamu na pieramovach u farmacie sam-nasam. U tym klučy, što nam nie treba było b paŭtarać adnu i tuju ž vytvorčaść, stvarajučy pradpryjemstva, asabliva ŭ Rasii», — adznačyŭ Łukašenka.
Jon pryvioŭ prykład, što kali ŭ Biełarusi jość pradpryjemstva BiełAZ, to navošta padobnaje pradpryjemstva pa vypusku aŭtamabilaŭ vialikaj hruzapadymalnaści stvarać u Rasii. «Niama takoj nieabchodnaści. Źviernuta była ŭvaha na pracu pa kaapieracyi, jak heta było i raniej».
Alaksandr Łukašenka zajaviŭ, što Biełaruś u bližejšym časie atrymaje šosty tranš, $200 młn kredytu, pa linii Jeŭrazijskaj fondu stabilizacyi i raźvićcia. «Ja nie baču nijakich prablem z vyłučeńniem šostaha tranšu, i, jak było zajaŭlena, možna vyrašyć pytańnie pa siomym tranšy», — zajaviŭ Alaksandr Łukašenka.
«My abmiarkoŭvali pytańnie ab refinansavańni doŭhu na $1 młrd. I tut taksama adprečvańnia nie było nijakaha», — zajaviŭ Alaksandr Łukašenka.
«My taksama abmierkavali pytańnie ab padaŭžeńni terminu viartańnia kredytu na budaŭnictva atamnaj stancyi i źnižeńnia pracentavaj staŭki», — skazaŭ jon.
Alaksandr Łukašenka rastłumačyŭ, što biełaruski bok heta matyvuje tym, što terminy pa budaŭnictvie rasiejskim bokam parušany.
«Pakul adkładajecca zapusk pieršaha błoka až na hod. Bajusia, jak mianie infarmujuć kantralory, što, moža być, Rasija paprosić jašče ssoŭvańnia hetaha terminu, što ŭžo naohuł niedapuščalna.
I kali terminy byli sarvanyja (my, viadoma, nie chočam iści ŭ sudy, sudzicca, jak heta pa damovie), my damovilisia ab tym, što termin viartańnia kredytu treba padoŭžyć. i pracentnaja staŭka pavinna być nie horšaja, čym dla inšych dziaržaŭ. Da prykładu, Armienii, Banhładeš, Vienhryi i hetak dalej».
«Heta prykładna da 3%. Niepryniaćcia nijakaha. Treba prosta dapracavać hetaje pytańnie. I ja dumaju, što my možam vyrašyć hetaje pytańnie ŭ tym klučy, u jakim ja skazaŭ», — dadaŭ Łukašenka.
«My taksama abmiarkoŭvali pytańnie našych hruzapieravozčykaŭ», — skazaŭ Łukašenka. «Darečy, heta ździviła prezidenta Rasii, i ja tak razumieju, što jaho prosta nie infarmavali pa hetym pytańni. My hetaje pytańnie abmiarkoŭvali i sam-nasam. I što my pavinny vypravić hetuju situacyju. znoŭ ža, pytańnie za adpaviednymi členami uradaŭ Biełarusi i Rasi», — dadaŭ Łukašenka.
Łukašenka raskazaŭ, što havaryłasia taksama pra pierasiačeńnie hramadzianami trecich krain biełaruska-rasijskaj miažy. «U hetym napramku nam treba budzie pracavać, i razumieńnie ŭ hetym jość. Heta ŭ intaresach i Rasii, i Biełarusi», — cytuje pres-słužba Łukašenku.
Nijakaj kankretyki pra toje, jakija vyniki abmierkavańnia «palityčnych pytańniaŭ», pres-słužba nie pryvodzić.
Kamientary