Kali niešta nie padabajecca — pasprabuj heta źmianić. Mnohija źjechali z krainy, kali da ŭłady pryjšoŭ Łukašenka, i tolki adzinki kinuli systemie vyklik. Ja nie admaŭlaju vojska. Ale mnie nie padabajecca, jak jaho vykarystoŭvajuć ŭ jakaści palityčnaj raspravy, jak zabirajuć u maładych ludziej najlepšyja hady žyćcia.
Ja pasprabuju tezisna akreślić, čamu ja nie chacieŭ iści ŭ hetaje vojska.
Bo ja chaču vučycca. Adukacyja robić čałavieka — čałaviekam, palityka — palitykam. Najpierš — vučoba, paśla vojska i ŭsio astatniaje. Mianie pazbavili prava na adukacyju: paśla čarhovaj adsiedki na Akreścina vyklučyli z žurfaka BDU. Pastupiŭ u EHU (Eŭrapiejski humanitarny universytet), ale adterminoŭki pa adukacyi mnie bolš nie dali.
Zakon — adziny dla ŭsich. Niahledziačy na heta, kvitnieje karupcyja j chabarnictva. Ad pryzyŭnikoŭ čuŭ, što «adkos» kaštuje 1500‑2000$. A dla tych, chto pry «suviaziach», dastatkova adnaho zvanka. Pavodle radyjokropki, konkurs u armiju — 8 čałaviek na miesca. Dyk pry takim konkursie možna sfarmavać mocnaje prafesijnaje vojska, a nie zajmacca prafanacyjaj. Chiba nie?
Vojska patrabuje mocnaha zdaroŭja. Dyk voś vajenna‑ŭračebnaja kamisija ceły hod nia moža vyznačyć stupień majoj prydatnaści da słužby ŭ vojsku. Mnie trojčy davali adterminoŭki pa stanie zdaroŭja, i dvojčy vyšejstajačaja kamisija ich skasoŭvała. Hetym razam mianie «abśledujuć» u Respublikanskim vajennym špitali. Načalnik Kardyjalahičnaha adździaleńnia Vodčyc H.V. admoviŭsia znajomić mianie z vynikami abśledavańniaŭ majho stanu zdaroŭja, arhumentujučy prosta: «Nie vašie dieło!» Hety samy Vodčyc H.V. kaliści «vylečyŭ» pryzyŭnikoŭ Alesia Kalitu i Źmitra Žaleźničenku ad aneŭryzmy serca i hipertanii.
Praviły padčas hulni nie mianiajucca. 21 lipienia 2008 hoda ministr abarony Leanid Malcaŭ padpisaŭ novy pieralik medyčnych patrabavańniaŭ da pryzyŭnikoŭ. Paŭhoda nazad mianie abśledavali pa adnym dakumencie, pryznali nie prydatnym, a siońnia — ja ŭžo im padychodžu? Jany chočuć pierahledzieć spravy dziasiatkaŭ tysiačaŭ ludziej, jakija ŭ svoj čas atrymali «nieprydatnaść» i zhodna z hetym zaplanavali svajo žyćcio.
Mnohija skažuć, što vojska — vydatny dośvied. Nie zapiareču. Ale, jak kaža «dzied» Žaleźničenka, kali jość mahčymaść, hetaha «dośviedu» lepš paźbiehnuć. U vojsku musiać vučyć baranić Radzimu, a nie składać śnieh kubikami. Zaraz Moładź BNF pravodzić kampaniju «Za prafesijnaje vojska», tak jak u Polščy ci Litvie. Dziela pačatku treba padniać zarobki vajskoŭcam pa kantraktu, skaracić kolkaść pryzyŭnikoŭ i zadbać pra sučasnuju vajskovuju techniku, a nie pierapradavać jaje krainam treciaha śvietu.
Toje, što słužyć — hanarovy abaviazak, — viedajuć usie. A kolki ludziej za hetym «abaviazkam» stanoviacca kalekami ci navat raźvitvajucca z žyćciom? Ja dvojčy lažaŭ u Respublikanskim vajskovym špitali, nasłuchaŭsia roznych historyjaŭ… Hetaha pabili, u hetaha — sardečny prystup, u hetaha — traŭma ad niaspraŭnaści abstalavańnia i h.d. Zdajecca, i vajny nie viadziem, a kojki ŭsie zaniatyja. Namieśnik načalnika špitala pałkoŭnik V. Žaryn u intervju BT skazaŭ, što tolki 30% sałdataŭ — zdarovyja. Jak ža my z takim vojskam budziem baranić Radzimu?
Kamientary