I ŭsia karaleŭskaja rać

11 lutaha ŭ vystavačnym paviljonie «Biełekspa» ŭ Minsku adčyniłasia mižnarodnaja vystava-kirmaš «Knihi Biełarusi-2009».

Krainy-ŭdzielnicy (a zajaŭlena ich było 25) akramia knižak aktyŭna prezientavali svaju kulturu. La stendu Paŭdniovaj Karei možna było na papirusnym arkušy svaimi rukami na admysłovym prystasavańni adcisnuć karejski ałfavit, jaki pavodle słovaŭ karejskaj pradstaŭnicy «całkam aryhinalny, zusim nie padobny da kitajskaha». Ź izrailskaj stojki chutka razychodziłasia brašura pra zahadkavy «Novy hod dla drevaŭ», jaki niadaŭna śviatkavali judei.

Na stendzie Słavaččyny, krainy, jakaja ŭ apošnija časy aktyŭna zaniataja padvyšeńniem svajho turystyčnaha imidžu, akramia mastackich vydańniaŭ možna było atrymać padrabiaznuju infarmacyju pra słavutyja kurortnyja miaściny. Jak zaŭsiody pradstaŭničy niamiecki budan, akramia knih, prapanavaŭ infarmacyju, dzie i jak u Biełarusi možna vyvučać niamieckuju movu.

Pad partretami pravadyra i la załatych falijantaŭ narodnych epasaŭ vidavočna sumavali pradstaŭniki Tadžykistanu.

Da svajho honaru rasiejskija vydaŭcy, jakim na Biełarusi, u pryncypie, i rekłamavacca nia treba, na «Minskim kirmašy» usio ž vyrašyli zaniać aktyŭnuju pramoŭtarskuju pazicyju. Jak nidzie ludna było na stendzie maskoŭskaha vydaviectva «Vriemia», drukaroŭ Śviatłany Aleksijevič i Vasila Bykava. Kab atrymać aŭtohraf u biełaruskaj piśmieńnicy, stajała nie raŭnujučy hastranomnaja čarha. Darečy, chto la tych, chto nie paśpieŭ na sustreču z aŭtarkaj «Čarnobylskaj malitvy»: z Aleksijevič budzie jašče adna sustreča ŭ subotu a 14-j (la stendu «Rasiejskija vydaviectvy»).

Vystava, jak teatr ź viešaka, pačynajecca z prahramak. U pieršy dzień ich nie było. Rasparadčycy adsyłali da vializnych stendaŭ, dzie raskład mierapryjemstvaŭ byŭ napisany nie raŭnujučy naskalny nadpis. Zdavałasia, na knižnym kirmašy nie čuli pra vynachodstva knihadruku, pra toje, što prahramki možna rabić taksama na papiarovym arkušy.

A jak tam miełasia na kirmašy biełaruskaja kniha ŭ śviatle niadaŭnich zajavaŭ namieśnika ministra infarmacyi Ihara Łapcionka pra 7-adsotkavaje źmianšeńnie jaje druku?

Piśmieńnik i vydaviec Uładzimier Siŭčykaŭ ličyć, što biełaruskaja kniha na kirmašy była pradstaŭlenaja nie vielmi jak: «Chaciełasia b bolš. Prykra bačyć, jak Aleksijevič i Bykava, aŭtaraŭ, jakija prezientujuć našu kulturu, pradstaŭlajuć niebiełaruskija vydaŭcy».

Biełaruskaja kniha na kirmašy abmiažoŭvałasia zbolšaha daviedačnaj litaraturaj i falklorna-krajaznaŭčymi albomami: asnoŭnyja vydaŭcy ajčynnaj bieletrystyki zbolšaha adsutničali.

Zatoje biełaruskaja kniha prysutničała na zamiežnych stendach. Užo pryhadany słavacki stend sustrakaŭ naviednikaŭ falijantam «Kraina Biełaruś» Uładzimiera Arłova. Reč u tym, što chit apošnich troch hod vydavaŭsia ŭ słavackim vydaviectva «Neahrafija». A najlepšaja (pavodle apytańnia «NN») histaryčnaja kniha 2008 hodu «Mahdeburskaja Harodnia» Juryja Hardziejeva krasavałasia na stendzie polskaha vydaviectva Kolegium'a Europy Wschodniej.

• 0
• 0
• 0
• 0
• 0
• 0
• 0
• 0