«Davaj, pazvanki jamu łamaj!» Rasijskija najmity źniali na videa, jak zabili siryjskaha deziercira
Niekalki bajcoŭ pryvatnaj vajennaj kampanii (PVK) Vahniera, jakuju źviazvajuć z rasijskim biznesmienam Jaŭhienam Pryhožynym, pakarali śmierciu deziercira z vojska prezidenta Siryi Bašara Asada. Videa sa ździekami źjaviłasia ŭ siecivie ŭ červieni 2017 hoda, adnak zrazumieć, kaho tam źniali, udałosia tolki ciapier, piša «Novaja hazieta».
Na apublikavanych kadrach vidać, jak niekalki čałaviek u niefarmalnym abmundziravańni bjuć kuvałdaj mužčynu na ziamli ŭ cyvilnym adzieńni. Mužčyny, jakija bjuć siryjca, havorać pa-rusku biez akcentu, ihraje pieśnia sa słovami «zdymaju ź plačej ciažki aŭtamat, stralaju ŭ syna, potym stralaju ŭ maci».
U listapadzie 2019 hoda ŭ internecie apublikavali praciah toj historyi. Na kadrach vidać, jak bajec adrazaje jamu hałavu nažom. Navakolnyja pry hetym kryčać: «Davaj, pazvanki jamu łamaj! Rydloŭkaj davaj!» Zatym sapiornaj łapatkaj mužčynu adsiakajuć ruki, padviešvajuć za nohi, ablivajuć bienzinam i spalvajuć.
Arabskim ŚMI ŭdałosia ŭstanavić asobu zahinułaha. Im akazaŭsia Machamied Tacha Ismaił Al-Abduła, viadomy taksama jak Chamadzi Tacha Al-Buta. Jon naradziŭsia ŭ 1986 hodzie ŭ Dejr-ez-Zory, byŭ mabilizavany ŭ lipieni 2017-ha ŭ rezierv armii Asada, zatym dezierciravaŭ, ale jaho złavili. Pakarańnie adbyvałasia ŭ siryjskaj pravincyi Choms.
«Novaj haziecie» ŭdałosia vyśvietlić asobu adnaho z bajcoŭ PVK. Jak miarkujecca, jaho zavuć Stanisłaŭ D., u hrupie Vahniera jon słužyŭ u raźviedcy. U rasparadžeńni žurnalistaŭ jość kopija jaho pašparta, ankieta słužby biaśpieki, aŭtabijahrafija i raśpiska ab nierazhałošvańni infarmacyi. Jon słužyŭ radavym u rasijskaj palicyi i ŭstupiŭ u PVK.
Ciapier čytajuć
Biełaruska raspačała čelendž «40 spatkańniaŭ», ale ŭžo na siaredzinie nie chavaje rasčaravańnia ŭ mužčynach44
Kamientary