Rodnyja palitviaźnia Źmitra Furmanava pačali haładoŭku kala SIZA na Vaładarskaha ŭ Minsku FOTA

Maci i dziaŭčyna Furmanava pryjechali ŭ stalicu z Hrodna. Jany płanujuć znachodzicca kala SIZA na vulicy Vaładarskaha, pakul Furmanava nie vypuściać, piša Radyjo Svaboda

Maci Źmitra Furmanava Volha Furmanava, a taksama jahonaja dziaŭčyna Volha Karakina abviaścili pra biesterminovuju haładoŭku. Jany patrabujuć vyzvalić Źmitra i ŭsich palitviaźniaŭ, a taksama — spynić kryminalny pieraśled źniavolenych pa 342-m artykule Kryminalnaha kodeksa.

Apaviaščeńnie pra svaju akcyju jany nakiravali ŭ Hrodzienski abłvykankam, Administracyju prezidenta, Saviet Respubliki, SIZA №1, MUS, Śledčy kamitet, Hienieralnuju prakuraturu, pradstaŭniku ES u Biełarusi, pradstaŭniku AAN pa pravach čałavieka ŭ Biełarusi, Viarchoŭny sud, śpiecyjalnamu dakładčyku pa pravach čałavieka ŭ Biełarusi.

Volha Furmanava i Volha Karakina źjavilisia kala prachadnoj SIZA №1 na vulicy Vaładarskaha zahadzia. Jany kažuć, što buduć znachodzicca tut maksimalna doŭha.

«My płanujem biesterminovuju haładoŭku, a tam jak atrymajecca, — skazała Svabodzie Volha Furmanava. — Budziem tut znachodzicca, kala SIZA. Što budzie dalej, ci nam dazvolać tut być, my nie viedajem. Jak atrymajecca. Budziem staracca znachodzicca tut».

Dziaŭčyna Źmitra Volha Karakina kaža, što prykładam dla ich stali haładoŭki, arhanizavanyja rucham «Maci 328». Jana razam z maci svajho chłopca ličać, što takim čynam mohuć paŭpłyvać na dziejańni ŭładaŭ.

«Heta radykalny krok, tak, — pryznaje Volha Karakina. — Ale my bačyli, jak haładajuć «Maci 328». Jany haładajuć užo treci raz. My vyrašyli zrabić pa ich prykładzie. Budziem takim samym čynam damahacca praŭdy. Čałaviek siadzić ni za što. Užo dva miesiacy».

Jana taksama raskazvaje, što rodnyja majuć suviaź sa Źmitrom, ad jaho redka, ale dachodziać listy. Palitviazień piša, što ŭ jaho ŭsio dobra. «Jak na samoj spravie, nichto nie viedaje», — kaža Volha Karakina.

Ułady pakul nijak nie adreahavali na dziejańni žančyn. U pieršyja chviliny haładoŭki im nie pieraškadžali znachodzicca kala SIZA. Volha Karakina sprabavała trapić na prachadnuju, adnak joj nichto nie adčyniŭ.

Pavialičyć

«Ad uładaŭ pakul niama nijakaj reakcyi na naš krok, — kaža Volha. — Listy ŭ dziaržaŭnyja orhany my razasłali ŭ piatnicu. Ciapier vychodnyja. Mahčyma, jany zaŭtra niejak adreahujuć. Źmicier taksama nie viedaje pra naš krok. Vierahodna, jon budzie chvalavacca, pieražyvać. Nie viedaju, jak jon acenić heta. Ale ja spadziajusia, što stanoŭča».

Źmitra Furmanava zatrymali 29 maja ŭ Hrodnie na pikiecie Cichanoŭskaj. Pavodle jahonaha baćki Alaksandra Furmanava, jaho schapili ludzi ŭ cyvilnym i vynieśli razam z kresłam z-za stała, dzie Źmicier źbiraŭ podpisy za Śviatłanu Cichanoŭskuju.

• 0
• 0
• 0
• 0
• 0
• 0
• 0
• 0