Sotni ludziej u Maładziečnie pryjšli raźvitacca ź Mikitam Kryŭcovym. Trunu z paniaviečanym ciełam nakryli nacyjanalnym ściaham
Pachavańnie ŭdzielnika akcyj pratestu, jakoha nie mahli znajści dziesiać dzion, adbyvajecca ŭ Maładziečnie, piša Radyjo Svaboda.
Raźvitańnie ź Mikitam Kryŭcovym pačałosia ŭ 12.30 u rytualnaj zali Maładečna na vulicy Janki Kupały, 50. Ludzi pačali tam źbiracca za hadzinu da pačatku raźvitańnia. Akramia znajomych zahinułaha, na raźvitańnie ź Mikitam pryjšli ŭdzielniki fanackaha ruchu z Maładečna, a taksama ź inšych haradoŭ, u tym liku ź Bieraścia, Barysava i Miensku. Da 12.30 kala rytualnaj zali sabrałasia niekalki socień čałaviek.
«My nia vierym u toje, što Mikita zrabiŭ heta sam, — skazaŭ žurnalistam adzin z udzielnikaŭ fanackaha ruchu Maładečna. — Nie mahło jaho cieła stolki času znachodzicca ŭ piatli ŭ parku Miensku».
Znajomyja zahinułaha raskazvajuć, što bačyli jaho 10 žniŭnia na miescy akcyj pratestu ŭ Miensku.
Raniej baćka Mikity Kryŭcova ŭ prysutnaści niezaležnaha sudova-medyčnaha eksperta i advakata ahledzieŭ cieła syna ŭ morhu.
«Pavodle našaha eksperta, treba dačakacca vynikaŭ daśledavańniaŭ, najpierš histalahičnych, — paviedamiŭ Radyjo Svaboda advakat Kryŭcovych Viktar Mackievič. — Cieła za hety čas mocna źmianiłasia. Baćku vielmi ciažka było na heta hladzieć».
Pavodle eksperta, jak pieradaje advakat, «adbylisia vyraznyja hniłasnyja źmieny miakkich tkanak cieła, pakazalisia kości».
Žychar Maładečna Mikita Kryŭcoŭ źnik 11 žniŭnia 2020 hodu. 12 žniŭnia žonka zajaviła pra jahonaje źniknieńnie. Pierad źniknieńniem jon chadziŭ na akcyi pratestu.
22 žniŭnia cieła Mikity Kryŭcova znajšli ŭ lesaparku ŭ rajonie Parnikovaj vulicy ŭ Miensku. Pavodle infarmacyi SK, jahonaja śmierć nia nosić kryminalnaha charaktaru. Siamja Mikity Kryŭcova nie pahadziłasia z versijaj «samahubstva» i padała zajavu ŭ Śledčy kamitet.
Pachavajuć Mikitu Kryŭcova na starych mohiłkach Maładečna. Trunu ź ciełam ad rytualnaj zali niasuć na rukach. Jana nakrytaja bieł-čyrvona-biełym ściaham.
«Lubiŭ žyćcio i mieŭ vialikija płany». Žonka Mikity Kryŭcova nie vieryć, što jon skončyŭ žyćcio samahubstvam
Ciapier čytajuć
Skandał u «Jeŭraopcie». 96‑hadovamu dziadulu nie dazvolili prysieści na kresła kala kasy13
Kamientary