U Biełarusi — bum na restarany nacyjanalnaj kuchni i jaje novaje pračytańnie
Apošnim časam u krainie adkryvajecca šmat novych kaviarniaŭ i restaranaŭ z akcentam na biełaruskuju kuchniu i jaje novaje pračytańnie. Fudbłohiery i restaratary ličać, što hety trend tolki ŭzmacnicca — z čym heta źviazana?
Doŭhi čas pa biełaruskija stravy tych, chto praściejšy, adpraŭlali ŭ «Vasilki». Znaŭcy ž nakiroŭvali ŭ staruju-dobruju «Kamianicu», u jakoj z 2003 hoda hatujuć pa receptach vilenskaj knihi «Litoŭskaja kucharka». Majecca tam i miasa pa-radziviłaŭsku, i kryvianka pa-turaŭsku.
Kali patrabavaŭsia bolš luksavy ŭzrovień, raili naviedać «Lićviny» ci «Kuchmistr» — u takich miescach abaviazkova b jeła ŭ svoj čas biełaruskaja šlachta.
Za apošnija paru hadoŭ źjaviłasia niamała novych kafe ź biełaruskaj kuchniaj.
Tak, u 2024 hodzie ŭ Minsku adkryŭsia druhi pa liku restaran «Bulbašy», na hety raz u farmacie brovara. U im robiać staŭki na roznyja rehijanalnyja pradukty i paznačajuć heta ŭ mieniu: «z turaŭskim syram», «z brynzaj z Hłybokaha», «z brasłaŭskaj rybaj», «z paleskimi hrybami», «z rahačoŭskaj zhuščonkaj», «kare słuckaha alenia» i hetak dalej.
Niadaŭna «Bulbašy» trapili ŭ top-10 restaranaŭ krainy (darečy, nie za harami adkryćcio ich treciaha punktu na praśpiekcie Niezaležnaści, 87).
Hod tamu ŭ Minsku źjaviŭsia restaran Veras | Kolas, jaki niečakana zamiksavaŭ u mieniu italjanskuju i biełaruskuju ježu. Rabić heta jakasna atrymlivajecca adrazu ŭ troch supracoŭnikaŭ-šefaŭ — biełaruskaj kuchni, słavianskaj i italjanskaj. Tut možna pakaštavać, naprykład, dranik z martadełaj i fistaškaj.
Ale pakolki tut pracuje i słavianski šef, to biez torta «Maskva» i «Leninhradskaha rasolniku» taksama nie abyšłosia.
U tym ža 2025‑m na mapie stalicy źjaviŭsia restaran «Mary», jaki pazicyjanuje siabie jak miesca z «neatradycyjnaj vysokaj biełaruskaj kuchniaj». Tut sapraŭdy možna paradavać receptary niezvyčajnymi spałučeńniami — naprykład, cepielinam sa ščupakom, dranikami z tar-taram z alenia, kałdunami z šałviejaj i kazulaj ci fandanam z žytniovaha chleba i marozivam z baravikoŭ, zapiŭšy ŭsio heta cybulnym kvasam.
U mieniu ŭstanova vykarystoŭvaje biełaruskuju movu. A ŭ samim interjery šmat adsyłak da svajho, rodnaha sercu — palavyja kvietki, vycinanki, lon.
Hod tamu na Partyzanskim praśpiekcie startavaŭ restaran biełaruskaj kuchni «Bieły huś», jaki pryciahnuŭ uvahu mnohich najpierš pamyłkaj u naźvie (u biełaruskaj movie nazoŭnik «huś» zaŭsiody žanočaha rodu). U pryncypie, na naźvie ŭsia biełaruskamoŭnaść miesca i skončyłasia.
Na kantraście z ustanovami ŭ centry tut prapanujuć bolš demakratyčnyja ceny — naprykład, paŭkiłahrama mačanki (z dranikami ci blinami) kaštujuć 25 rubloŭ.
U toj ža pieryjad na miescy bara «Vino rytmy haradžanie» na Kamsamolskaj, 7 paŭstała «Draničnaja №1», jakaja bolš padobnaja da baru dla ruskich (jašče i z savieckim kałarytam). Piać dranikaŭ tam acenienyja amal u 20 rubloŭ.
Zusim niadaŭna pačaŭ svaju pracu novy restabar biełaruskaj kuchni Mova. Znachodzicca jon u rajonie «Minsk-Śvietu» i prapanuje zbolšaha kłasiku — roznyja vidy dranikaŭ i aŭtarskija nastojki.
Siaredni ček va ŭstanovie — u dyjapazonie 40‑60 rubloŭ.
Litaralna dniami adkryŭsia jašče adzin restaran sa staŭkaj na ajčynnaje pad nazvaj «Dziakuj» — na Surhanava, 43. U mieniu roznyja draniki, vieraščaka, kryvianka, kiška bulbianaja i inšaje. Jość biełaruskamoŭnaje mieniu.
Zhadvajučy rehijony, adznačym, što hod tamu novieńki restaran biełaruskaj kuchni «Spadčyna» zapracavaŭ u Homieli. Instahram uładalniki viaduć časam pa-biełarusku, a voś mieniu ruskamoŭnaje.
Draniki tut kaštujuć ad 14 da 28 rubloŭ (u zaležnaści ad načynki). A patelnia z kryviankaj abydziecca ŭ 24 rubli.
Tym časam u Viciebsku chvalacca adkryćciom novaha restarana z ruskaj kuchniaj. U interjery — ruskija narodnyja kazki i matroški.
Varta adznačyć, što aficyjanty ŭ restaranach biełaruskaj kuchni nie zaŭsiody havorać pa-biełarusku, časam heta abmiažoŭvajecca tolki niekalkimi słovami vitańnia.
«Trend na biełaruskuju kuchniu dla mianie vyhladaje całkam łahičnym, jon tolki budzie macnieć», — kamientuje šef-kuchar, jaki paprasiŭ zachavać jaho ananimnaść.
«Heta, viadoma, i staŭka na turystaŭ — na tych ža rasijan, jakija nanoŭ adkryvajuć Biełaruś va ŭmovach sankcyj i ciažkaściaŭ z dostupam da inšych kirunkaŭ vandrovak. Ale i sami biełarusy zaraz bolš zakansiervavanyja ŭnutry krainy, niechta znachodzicca va ŭnutranaj emihracyi, i ŭ takoj situacyi viartańnie da rodnaha, da svaich karanioŭ — heta psichałahičnaje ratavańnie. I banalna zaraz asabliva nie pajeździš časta «pa jeŭropach», kab niejkija trendy padhladzieć, to čamu b i nie pieraasensoŭvać staryja recepty, tym bolš, kali ŭ nas sapraŭdy smačnaja kuchnia?».
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2121
Kamientary
Što da pamianionaj tut "Kamianicy", asabista ja bolš nikomu nia raju jaje naviedvać. Ustanova apošnim časam była sapsavałasia. Tak, stravy biełaruskaj kuchni ŭklučany ŭ mieniu, a voś ich vykanańnie prosta žudasnaje. Raźlik na toje, što naviedvalniki nikoli nia jeli tyja stravy j nia viedajuć, jakimi jany pavinny być.
Dazvolu sabie mierkavać, što ŭ vypadku, kali da ich zavitaje NN, zahadzia anansavaŭšy vizyt, kštałtu zrabić jaki repartaž, ci artykuł ciskanuć, dyk tam pastarajucca, a šarahovamu naviedvalniku padaduć aby što pad pryhožaj nazvaj.