Miadźviedzieŭ: A čaho ž tady hrošy prosicie?
Rasijski prezident zastupiŭsia za Pucina z Kudrynym, jakich zbeściła biełaruskaje načalstva. Piša ŭ svaim błohu na NN Alaksandr Kłaskoŭski.
Chacia ŭčora kramloŭski ananim i zajaviŭ, što incydent vyčarpany, recha palemiki miž Łukašenkam i Kudrynym praciahvaje adhukacca.
Siońnia za Kudryna (a značyć i za Pucina, jaki na paru ź vice-premjeram zhulaŭ 28 traŭnia ŭ Minsku ŭ dobraha i złoha śledčych) zastupiŭsia prezident Miadźviedzieŭ. Jon nazvaŭ niedapuščalnymi z hledzišča dypłamatyčnaj etyki vykazvańni na adras pradstaŭnikoŭ rasijskaj dziaržavy, jakija dazvoliŭ sabie kiraŭnik adnoj z krain — najbližejšych partnioraŭ Rasii.
U čyj harod kamieńčyk, vožyku zrazumieła. Paraŭnańnie Kudryna z «admarozkami» miedyi rastyražavali na ŭvieś śviet.
Takim čynam, Miadźviedzieŭ padkreślivaje: Kreml i maskoŭski Bieły dom — adna kamanda.
Łukašenka apošnija miesiacy nie adnojčy sprabavaŭ ubić klin miž Miadźviedzievym i Pucinym. Refrenam hučała: my z rasijskim prezidentam damaŭlajemsia, a ichni ŭrad našy damoŭlenaści tarpieduje!
Łukašenkaŭskaja ž presa paśla epatažnych zajaŭ Kudryna ŭ Minsku kpiła ź jaho: maŭlaŭ, sam visić na vałasku, a nas, bač, pavučaje!
Sapraŭdy, da ministra finansaŭ u Kramla jość pytańni. Navat Miadźviedzieŭ adnaho razu paraiŭ jaršystamu Kudrynu «prytrymać jazyk». Pajšła pahałoska pra jaho chutkuju adstaŭku. Ale zaraz rasijski prezident demanstruje: hulać na našych unutranych supiarečnaściach u Minska nie atrymajecca.
Apošnija dni biełaruskaje načalstva razharnuła zapoźnieny kontrpijar paśla skandalnaha i pravalnaha «sajuznaha saŭminu». Sidorski navat paraŭnaŭ Kudryna z kładaŭščykom. Chacia toj, adrozna ad našych «krepkich chaziajśćvieńnikaŭ», jašče i vykładaje na prestyžnaj kafiedry.
Kaniečnie, u minskich zajavach Kudryna byŭ elemient pravakacyi, ale ž sproby ich abvierhnuć i davieści, što biełaruskaja madel na vyšyni, nadta niaŭkludnyja.
Što i padkreśliŭ siońnia Miadźviedzieŭ, zładziŭšy dla biełaruskaha načalstva maleńki ŭrok palitesu. Maŭlaŭ, my nie apuskajemsia da asabistych vypadaŭ na adras kiraŭnikoŭ susiednich krain, «chacia my mahli b skazać što-niebudź adnosna efiektyŭnaści ekanamičnych zachadaŭ, jakija imi robiacca, čamu jany źviartajucca da nas pa dapamohu, padtrymku».
Karaciej, kali vy takija razumniki, dyk čaho ž vy takija biednyja?
I voś heta pryncypovy momant. Tak, Rasija ciśnie, šantažuje. Prapanoŭvać kredyt svaimi rublami zamiest abiacanych raniej dołaraŭ, kaniečnie ž, nie nadta karektna (pamiatajecie «Viasielle ŭ Malinaŭcy»: biary, ja sabie jašče namaluju!). Ale ž chto staić z praciahnutaj rukoj?
Hordaść nie u tym, kab abkłaści niekaha, a ŭ tym, kab nie vyprošvać. Ale dziela hetaha tre' było 15 hadoŭ vieści zusim inšuju palityku. Siońnia ž — zakanamiernaje pachmielle paśla orhii «bratniaj intehracyi». Nu a narodu, ahałomšanamu devalvacyjaj, schavanym biespracoŭjem i prasiadańniem zarobkaŭ, — dyk i ŭvohule pachmielle paśla čužoha viasiella.
Kamientary