«Dadatkovaja krynica dachodu, jaki nie zabiare DFR». Sajt kyky.org zapuściŭ płatnuju padpisku — što atrymałasia?

Jak heta pracuje? Kab padtrymać miedyja, čytač moža aformić padpisku na płatformie Patreon na sumu 5, 10, 30, 50 i 100 jeŭra. Kožny łot maje svaje bonusy — čym łot daražejšy, tym ich bolš. Z padarunkaŭ — płakat ad fotamastački Karyny Palakovaj, majka z pryntam aŭtarstva Uładzimira Ceślera, stykier, stylovy šopier i chudzi z nadpisam «kukucha jedzie». Ich padpisanty atrymlivajuć nie adrazu, a praź niekalki miesiacaŭ paśla padpiski. Sponsaraŭ dadajuć taksama ŭ zakryty čat z redakcyjaj (kali vybrać łot za 50 jeŭra, možna navat patrapić na płaniorku).

Pavialičyć

«My viedali pra instrumient Patreon i vyrašyli pasprabavać jaho. Kaniečnie, kali b ciapier u Biełarusi ŭsio było inačaj i ŭmoŭnaja MolaMola nie była zakryta, my b, napeŭna, raźmiaścilisia tam. Ale pakolki tyja, chto ličyć siabie ŭładaj, vypalvaje ŭsie instrumienty dapamohi hramadzianskaj supolnaści, nam daviałosia brać niešta zamiežnaje, — tłumačyć hałoŭnaja redaktarka kyky.org Nasta Rahatko.

— My vybrali Patreon, bo jon u tym liku dazvalaŭ sumiaščać u łotach prodaž infarmacyjnaha praduktu i rečavaha. Dla nas było važna, kab była mahčymaść rabić mierč. I z hetym my nie pamylilisia: ludzi adrazu pačali pytacca, jak nabyć tolki chudzi ci tolki futbołku. Vidać fraza «kukucha jedzie» vielmi zrezaniravała ŭ ludziej, trapiła ŭ nastroj. Dumaju, u budučyni nam treba zapuskać asobnuju liniejku mierču».

Pavialičyć

Nasta kaža, što dla ich hety kraŭdfandynh — ekśpierymient.

«My damovilisia, što nie pišam biznes-płan, nie raźličvajem, što heta pakryje nam zarobak. My nie pabudujem ciapier biznes-madel na Patreon, bo naohuł nikoli nie sprabavali kraŭdinstrumienty i paniaćcia nie mieli, budzie bolš danataŭ ź Biełarusi ci z dyjaspar». 

Ciapier u miedyja 114 sponsaraŭ (patronaŭ). Ahułam jany aformili štomiesiačnuju padpisku na 1639 jeŭra.

Redakcyja vynikam zadavolenaja.

«Z ulikam taho, što ŭ nas davoli maleńkaja kamanda, dla nas heta ŭžo adčuvalnyja hrošy. My možam zakryć zarobak niejkaha supracoŭnika ci apłacić płatformu dla stvareńnia testaŭ, chostynh, novyja damieny, jakija my mianiajem. Heta dobraja baza dla startu. My płanujem padklučyć rekłamu i raźvivać prajekt».

Pa słovach hałoŭnaj redaktarki, aptymalna było b mieć štomiesiačnuju padpisku na 4-5 tysiač jeŭra.

«My b tady viedali, što jość bazavy miesiačny abarot, jaki dazvalaje płanavać budučyniu bolš, čym na miesiac. Bo maralna kamanda hatova i choča ździajśniać pracoŭnyja podźvihi, prosta haryzont płanavańnia praz toje, u jakoj situacyi my apynulisia, vielmi maleńki. U luboj kampanii ty nie možaš raźvivacca, kali isnuješ u stanie vyžyvańnia. Z hienieracyjaj idej u nas prablem niama, ale patrebny niejki resurs, kab być upeŭnienymi, što my paciahniem heta vytvorča».

Bolšaść danataŭ prychodziać znutry Biełarusi. Samymi papularnymi stali maleńkija łoty, ale jość i niekalki čałaviek, jakija aformili padpisku na 100 jeŭra. Siarod padpisantaŭ šmat ajcišnikaŭ. U zakrytym čacie z redakcyjaj ludzi prapanujuć temy, abmiarkoŭvać artykuły, jakija vyjšli na sajcie.

«My vielmi šmat ciopłych słoŭ pačuli pra siabie dziakujučy hetamu čatu. I ja baču, što redakcyjnaja kamanda ažyviłasia. U nas paśla błakiroŭki ŭpali prahlady, viečnymi sajtami-lusterkami my zabili svoj pošukavy trafik i zastalisia na jadry aŭdytoryi. Žurnalistam stała ciažkavata: kali raniej tekst nabiraŭ dziasiatki tysiač prahladaŭ, to ciapier ty raduješsia, kali na im 15 tysiač. Ale kali ŭ čat pačali prychodzić realnyja ludzi i dziakavać, heta padtrymała maralny duch».

Miedyja prapanoŭvała sponsaram raźmiaščać ich imiony na sajcie, ale akazałasia, što ciapier ludzi nie hatovyja publičyć svaje danyja. Z płanaŭ — prapanoŭvać pa padpiscy aryhinalny kantent, jakoha niama na sajcie. Takuju formu kraŭdfandynhu chočuć zapuścić i dla biełaruskaj redakcyi The Village.

Nakolki biełaruskaja aŭdytoryja hatova da takoj madeli — płacić anłajn-miedyja?

«Da 2020 hoda ja była b pieršaj, chto skazaŭ, što nichto nie budzie płacić, i kyky.org na kraŭdfandynhu ničoha nie źbiare. Bo ŭ našym časopisie nie było idei sacyjalna archivažnaha praduktu, jak, naprykład, u prajekta «Imiony». Ludzi chutčej buduć dapamahać chłopčyku ź ciažkaj chvarobaj, čym chipsteram, jakija pišuć teksty. Dla mianie stała adkryćciom, jak ludzi danacili fondam salidarnaści.

Pakryć praz padpisku raschody ŭsioj redakcyi, kaniečnie, my nie zmožam, ale ŭ nas i niama takoj mety. Budziem vykarystoŭvać heta jak dadatkovuju krynicu dachodu, jaki nie zabiare DFR».

• 0
• 0
• 0
• 0
• 0
• 0
• 0
• 0