Praz smajlik z haŭniaškaj pad pastom pra milicyjaniera ŭ maci-adzinočki apisali ladoŭniu, pralnuju mašynu i televizar

Maci-adzinočcy ź Ivacevičaŭ pahražaje 3 hady chimii — za smajliki z haŭniaškaj

U pastanovie Ivacevickaha rajonnaha adździełu Śledčaha kamitetu ad 5 krasavika havorycca, što «niavyznačanyja asoby» mieli namier na publičnuju źniavahu pradstaŭnika ŭłady ŭ suviazi z vykanańniem im słužbovych abaviazkaŭ. Jany pakinuli źniavažlivyja kamentary ź «niavyznačanych techničnych srodkaŭ» i z ananimnych akaŭntaŭ u telehram-čacie «Karatieli Biełarusi» pad fatazdymkam 31-hadovaha kapitana milicyi, operupaŭnavažanaha Ivacevickaha RAUS Rusłana Kucko.

A taksama nakiravali na adras jahonaha ŭlikovaha zapisu ŭ sietcy «ŬKantakcie» paviedamleńni, jakija ŭtrymlivajuć «nehatyŭnuju acenku asoby». Pavodle śledčych, tym samym aŭtary kamentaroŭ publična źniavažyli milicyjanta «jak pradstaŭnika ŭłady ŭ suviazi z vykanańniem im słužbovych abaviazkaŭ».

Pavodle śledčych, dačynieńnie da hetaha złačynstva maje žycharka Ivacevičaŭ K.

Žančyna (choča zastacca ananimnaj, dadzienyja jość u redakcyi) raskazała, što 25 listapada ŭ telehram-čacie vykłali dadzienyja supracoŭnika Ivacevickaha RAUS.

«Horad mały, adzin adnaho viedajuć. Ja ź im sutykałasia, nu i pakinuła kamentar sa słovam «čałaviek…» i try emodzi z kakaškaj. Ja ŭžo i zabyłasia pra heta», — kaža žančyna.

Jana raskazvaje, što 16 śniežnia dadomu da jaje pryjšli dvoje supracoŭnikaŭ, adzin u formie — miascovy ŭčastkovy, druhi ŭ cyvilnym, ź Bieraścia. Žančyna pryznałasia, što padpisanaja na telehram-kanał i pakidała kamentar. Jaje advieźli ŭ RAUS, prapanoŭvali zapisać vybačeńni na videa.

«Ja razumieła, što, jak zvyčajna, mohuć pryhrazić, napužać, nacisnuć. Ja skazała, što nia budu davać pakazańni na kameru i prasić prabačeńnia. Kažu, vy što, šukajecie čarhovuju pastku, a potym pakazvajecie na ONT i BT, nie na tuju narvalisia», — skazała žančyna.

Jana kaža, što ŭ RAUS u jaje zabrali telefon na ekspertyzu, pahražali, što zaviazuć jaje ŭ SIZA.

«Ja kažu — viazicie, choć na Akreścina, choć u Žodzina ci Baranavičy. Ja adsiedžu, ja nie bajusia», — kaža žančyna.

Pakul jaje dapytvali ŭ pastarunku, u toj ža dzień u jaje doma praviali vobšuk.

5 krasavika joj vydali pastanovu, što jana prachodzić padazravanaj pa kryminalnaj spravie. Jaje pačali vyklikać na dopyty.

«Vyklikali advakata. Ščyra kažučy, było žadańnie ad dušy plunuć joj ŭ tvar, bo pačynaje čytać natacyi: a čamu ty tak zrabiła, pavinna być soramna. Ja ŭśmichajusia. Jana kaža: a čaho vy ŭśmichajeciesia? A što mnie, płakać? Jana — maŭlaŭ, suprać vas usie dokazy, vy maci-adzinočka, vas mohuć pasadzić, a dzicia zabrać, padumaj, što ty robiš. Ja kažu — čaho vy mnie čytajecie natacyi? Ja nie škaduju, što zrabiła, i škadavać nia budu».

Žančynie dali padpisać papieru ab niavyjeździe.

«Ja skazała, što prasić prabačeńnia nia budu. I na kameru prasić prabačeńnia nia budu. Ja skazała, što ja napisała i nie škaduju. Mianie načalstva jak tolki nie abzyvała. Ja ž nia biehła i nie pisała skarhu. Mnie rot nie zatknuć. Ja maju prava vykazać svaju dumku».

Učora doma ŭ žančyny pravodzili čarhovy vobšuk.

«Aproč supracoŭnikaŭ byli dvoje paniatych, ad jakich niesła pieraharam. Pakazali papieru na vobšuk, pačynajuć chadzić pa pakojach. Ja pytaju: niešta padkinuć chočacie, ci što?»

Pavodle žančyny, supracoŭniki pryjšli, kab apisać majomaść.

«Ja patelefanavała śledčamu: na jakoj padstavie apisvajuć majomaść? Akazvajecca, milicyjant, pra jakoha ja napisała kamentar, zaprasiŭ maralnuju škodu ŭ dźvie tysiačy rubloŭ. Ja była ŭ stupary. Jon pryhraziŭ, što nakiruje mianie ŭ SIZA, ja kinuła telefon, — kaža žančyna. — Pačali pytacca, kolki kaštuje televizar. Ja skazała, što ničoha padpisvać nia budu, i pajšła na kuchniu. Jany vyklikali maju maci. Apisali televizar, ladoŭniu i pralnuju mašynu. Ja dahetul u šoku, dačka spužałasia. Ciapier nia viedaju, čaho čakać ad ich».

Žančyna niepakoicca, što ŭ jaje mohuć adabrać čatyrochhadovuju dačku. Kaža, što ŭžo prychodzili z sadka z pravierkaj.

• 0
• 0
• 0
• 0
• 0
• 0
• 0
• 0