Enierhietyčnaja revalucyja: depresiŭny siryjski rehijon pierachodzić na soniečnyja batarei. U čym pryčyna?
Adsutnaść elektrasietki ŭ rehijonie i rezki rost cen na paliva vymusili siryjcaŭ u pravincyi Idlib masava vykarystoŭvać soniečnyja batarei.
Niečakanaja soniečnaja revalucyja adbyłasia ŭ rehijonie na paŭnočnym zachadzie Siryi, jaki kantralujecca paŭstancami. Vialikaja kolkaść ludziej, čyj los byŭ razburany dziesiacihadovaj hramadzianskaj vajnoj u krainie, pačała vykarystoŭvać soniečnuju enierhiju, bo heta adzinaja i samaja tannaja krynica elektryčnaści dla mnohich žycharoŭ, piša The New York Times.
Soniečnyja batarei roznych pamieraŭ ustalavanyja paŭsiul u rajonie Idlib, što znachodzicca ŭzdoŭž miažy Siryi z Turcyjaj.
Na Zachadzie soniečnyja paneli ličacca prykmietaj dastatku, a ZŠA, naprykład, inviestavali miljardy dalaraŭ u raźvićcio alternatyŭnaj enierhietyki.
Adnak soniečny bum u Siryi źviazany nie z baraćboj z klimatyčnym kryzisam i žadańniem źmienšyć vuhlarodny śled. U paŭnočna-ŭschodnim rajonie Siryi — heta adziny sposab vyžyć, bo ŭrad adklučyŭ ad pravincyi elektraenierhiju, a impartnaje paliva dla pryvatnych hienierataraŭ ludzi prosta nie mohuć sabie dazvolić.
Pravincyja Idlib stała arenaj paŭstanckich dziejańniaŭ na pačatku vajny. Mienavita tamu siryjski ŭrad vyklučyŭ hety rajon z nacyjanalnaj enierhasistemy, zasnavanaj na naftavych i hazavych elektrastancyjach.
Spačatku miascovyja žychary vykarystoŭvali ŭłasnyja hienieratary — nievialikija pryłady z dyzielnym ruchavikom dla elektryfikacyi. Pastajanny ryk ad hienierataraŭ i taksičny dym stali nieadjemnaj častkaj žyćcia ŭ haradach, što kantralujuć paŭstancy.
Doŭhi čas bolšaja častka paliva pastupała z uschodu Siryi, jaki kantralavała tak zvanaja «Isłamskaja dziaržava». Adnak u 2019 hodzie hrupoŭka straciła kantrol nad terytoryjaj Siryi, paśla čaho žychary pačali impartavać paliva z Turcyi. Ale rezki rost cen na impartnaje paliva vymusiŭ siryjcaŭ źviarnucca da alternatyŭnaj enierhietyki.
Ciapier prodaž soniečnych batarej u rajonie Idlib — prybytkovy biznes. Popyt na paneli raście, bo ludzi vykarystoŭvajuć ich paŭsiul i dla samych roznych met — ad zaradki telefonaŭ da siłkavańnia načnych lichtaroŭ. Choć na pačatku soniečnyja paneli nie takija i tannyja, zatoje paśla možna zabycca pra płatu za elektraenierhiju nazaŭsiody.
Ciapier čytajuć
Minčuk źniaŭ rolik pra čarhu ŭ paliklinicy, dzie było bolš za 150 čałaviek. Za heta na jaho napisali zajavu ŭ milicyju6
Kamientary