Энергетычная рэвалюцыя: дэпрэсіўны сірыйскі рэгіён пераходзіць на сонечныя батарэі. У чым прычына?
Адсутнасць электрасеткі ў рэгіёне і рэзкі рост цэн на паліва вымусілі сірыйцаў у правінцыі Ідліб масава выкарыстоўваць сонечныя батарэі.
Нечаканая сонечная рэвалюцыя адбылася ў рэгіёне на паўночным захадзе Сірыі, які кантралюецца паўстанцамі. Вялікая колькасць людзей, чый лёс быў разбураны дзесяцігадовай грамадзянскай вайной у краіне, пачала выкарыстоўваць сонечную энергію, бо гэта адзіная і самая танная крыніца электрычнасці для многіх жыхароў, піша The New York Times.
Сонечныя батарэі розных памераў усталяваныя паўсюль у раёне Ідліб, што знаходзіцца ўздоўж мяжы Сірыі з Турцыяй.
На Захадзе сонечныя панэлі лічацца прыкметай дастатку, а ЗША, напрыклад, інвеставалі мільярды даляраў у развіццё альтэрнатыўнай энергетыкі.
Аднак сонечны бум у Сірыі звязаны не з барацьбой з кліматычным крызісам і жаданнем зменшыць вугляродны след. У паўночна-ўсходнім раёне Сірыі — гэта адзіны спосаб выжыць, бо ўрад адключыў ад правінцыі электраэнергію, а імпартнае паліва для прыватных генератараў людзі проста не могуць сабе дазволіць.
Правінцыя Ідліб стала арэнай паўстанцкіх дзеянняў на пачатку вайны. Менавіта таму сірыйскі ўрад выключыў гэты раён з нацыянальнай энергасістэмы, заснаванай на нафтавых і газавых электрастанцыях.
Спачатку мясцовыя жыхары выкарыстоўвалі ўласныя генератары — невялікія прылады з дызельным рухавіком для электрыфікацыі. Пастаянны рык ад генератараў і таксічны дым сталі неад’емнай часткай жыцця ў гарадах, што кантралююць паўстанцы.
Доўгі час большая частка паліва паступала з усходу Сірыі, які кантралявала так званая «Ісламская дзяржава». Аднак у 2019 годзе групоўка страціла кантроль над тэрыторыяй Сірыі, пасля чаго жыхары пачалі імпартаваць паліва з Турцыі. Але рэзкі рост цэн на імпартнае паліва вымусіў сірыйцаў звярнуцца да альтэрнатыўнай энергетыкі.
Цяпер продаж сонечных батарэй у раёне Ідліб — прыбытковы бізнэс. Попыт на панэлі расце, бо людзі выкарыстоўваюць іх паўсюль і для самых розных мэт — ад зарадкі тэлефонаў да сілкавання начных ліхтароў. Хоць на пачатку сонечныя панэлі не такія і танныя, затое пасля можна забыцца пра плату за электраэнергію назаўсёды.
-
Назад да ручкі і забарона на смартфоны: універсітэты вымушаныя змяняць фармат заняткаў і кантрольных, інакш ШІ не дае ні вучыць, ні праверыць
-
Google запусціла Gemini 3.5 Transcribe для расшыфроўкі мовы. У спісе ёсць і беларуская
-
Цім Кук развітаўся з пасадай генеральнага дырэктара Apple пасля 15 гадоў кіраўніцтва
Наталля Калегава расказала пра дапамогу беларускім уцекачам, сваю сям’ю, стаўленне да Ціханоўскай. І патлумачыла, хто такія «бабры» і «зайцы»34
Каментары