Rasija vyciskaje Francyju ź jašče adnoj bahataj resursami afrykanskaj krainy
Maskva ciaśnić Paryž tam, dzie Francyja daminavała paŭtara stahodździ — u byłych kałonijach.
Maskva viartajecca ŭ Afryku paśla niekalkich dziesiacihodździaŭ svajho asłableńnia. Jana sprabuje zamacavacca ŭ Livii, Centralna-Afrykanskaj Respublicy, Hviniei, Sudanie, Burundzi, Madahaskary, a ciapier pryjšła čarha Mali. Čatyry z hetych krain — byłyja francuzskija kałonii.
Ničoha novaha: Rasija robić staŭku na dyktatarskija režymy. U pryncypie, raniej u krainach Treciaha śvietu tak dziejničali ŭsie supierdziaržavy. U apošnija dziesiacihodździ stratehija Zachadu pamianiałasia. Jak ZŠA, tak i Jeŭrasajuz prykładali vialikija vysiłki dla ŭmacavańnia demakratyi i hramadzianskich supolnaściej.
Krynicy paviedamili Reuters, što rasijskaja pryvatnaja vajskovaja kampanija Vahniera — Wagner Group — i vajskovaja chunta Mali ŭkłali pahadnieńnie, zhodna ź jakim rasijskija najmity buduć navučać malijskich vajskoŭcaŭ i zabiaśpiečvać abaronu vysokapastaŭlenych čynoŭnikaŭ.
Jak paviedamlajecca, u krainie mohuć być raźmieščanyja navat bolš za 1000 bajcoŭ Vahniera. Čatyry krynicy paviedamili, što Wagner Group budzie atrymlivać kala 6 młrd zachodnieafrykanskich frankaŭ (11 młn dalaraŭ) na miesiac za svaje pasłuhi.
Mali — 19-miljonnaja kraina ŭ centry Zachodniaj Afryki. Na poŭnačy — Sachara, z histaryčnym horadam Tymbuktu. Na poŭdni — savanna. Nietry Mali bahatyja na zołata. U 2013 hodzie kraina pieražyła nastup isłamistaŭ. Ad padzieńnia jaje ŭratavała tolki antyterarystyčnaja apieracyja kaalicyi krain na čale z Francyjaj.
Vajskovy pieravarot u Mali adbyŭsia ŭ mai 2021 hoda.
Ministr abarony Francyi Fłarans Parli zajaviła, što jana «vielmi zaniepakojenaja» pahadnieńniem malijskaj chunty z Maskvoj.
Paryž sprabuje sarvać pahadnieńnie. Adnak ci skončacca jaho namahańni pośpiecham? Raniej Maskvie ŭdałosia paśpiachova zamacavacca ŭ inšaj biednaj krainie, što dziesiacihodździami ŭvachodziła ŭ śfieru ŭpłyvu Francyi — Centralna-Afrykanskaj Respublicy.
Nahadajem, što tam, u pryvatnaści, zabili hrupu žurnalistaŭ-rasśledavalnikaŭ, jakaja źbirała infarmacyju pra hrupu Vahniera.
Čytaj taksama: «Davaj, pazvanki jamu łamaj!» Rasijskija najmity źniali na videa, jak zabili siryjskaha deziercira
U Livii rasijskija najmity sprabavali zachapić stalicu krainy Trypali. Ich nastup udałosia strymać Turcyi, jakaja raźmiaściła tam svaje najnoŭšyja ŭdarnyja bieśpiłotniki «Bajraktar».
Vahnieraŭcy pracujuć taksama ŭ Siryi, Sudanie i Burundzi.
Pryvatnaja vajskovaja kampanija Vahniera, viadomaja pad svajoj rasijskaj abrevijaturaj «ČVK Vahniera», farmalna ličycca pryvatnaj, ale ŭ realnaści jość dadatkovym hnutkim instrumientam viadzieńnia rasijskaj zamiežnaj palityki. U pryvatnaści, jaje bajcy ŭdzielničali ŭ kanflikcie na Danbasie.
Jak vyjaviła rasśledavańnie, ČVK Vahniera ciesna źviazanaja z rasijskim Ministerstvam abarony i HRU.
U Biełarusi vahnieraŭcy trapili ŭ fokus uvahi paśla zatrymańnia hrupy vierahodna źviazanych z hetaj ČVK bajcoŭ napiaredadni vybaraŭ 2020 hoda. Dahetul niajasna, ci była heta sarvanaja apieracyja ŭkrainskich siłavikoŭ abo supolnaja apieracyja niekalkich śpiecsłužbaŭ z dvaistymi metami.
U Afrycy rasijskija pośpiechi pakul nievialikija. U adroźnieńnie ad Kitaja, Rasija pakul niašmat moža prapanavać afrykanskim krainam, akramia zbroi i najmitaŭ.
Kamientary