200 ukrainskich śviataroŭ Maskoŭskaha patryjarchata inicyjavali mižnarodny carkoŭny trybunał dla patryjarcha Kiryła

Pra heta paviedamiŭ u Fejsbuku protaijerej UPC MP Andrej Pinčuk.

Na hetym momant zvarot padpisaŭ 191 śviatar z roznych jeparchij UPC MP. Jany ŭpeŭnienyja, što ich kiraŭnik nie tolki źmianiŭ maralnyja i relihijnyja pryncypy, ale i parušyŭ dakumient «Asnovy sacyjalnaj kancepcyi».

U adkrytym zvarocie havorycca: «My, śviatary Ukrainskaj pravasłaŭnaj carkvy, u hetyja trahičnyja dni, kali idzie žorstkaja vajna Rasijskaj Fiederacyi suprać Ukrainy, ličym svaim pastyrskim abaviazkam źviarnucca da ŭsioj paŭnaty Suśvietnaha Pravasłaŭja».

«Dziejańni patryjarcha Kiryła vyklikali masavaje abureńnie siarod duchavienstva i viernikaŭ Ukrainskaj pravasłaŭnaj carkvy», — adznačajuć śviatary.

«Mižnarodny carkoŭny trybunał — mienavita tak našy sučaśniki, piša ajciec Andrej Pinčuk, nazvali b najvyšejšuju sudovuju instancyju suśvietnaha pravasłaŭja. Havorka idzie pra Sabor Pradstajacielaŭ Staražytnych Uschodnich Cerkvaŭ. Užo šmat stahodździaŭ u Pravasłaŭnaj Carkvie isnuje tradycyja źviartacca ŭ sud takoha Saboru ŭ vypadku surjoznych kanfliktaŭ. Sabor Uschodnich Patryjarchaŭ nieadnarazova razhladaŭ iski suprać vyšejšych carkoŭnych ijerarchaŭ».

U historyi rasijskaj carkvy taksama byŭ precedent zvarotu ŭ sud uschodnich patryjarchaŭ. U 1666 h. mienavita ŭschodnija patryjarchi asudzili Maskoŭskaha patryjarcha Nikana, pazbaviŭšy jaho patryjaršastva i jepiskapskaha sanu. Nikana pakinuli prostym manacham i adpravili na pakajańnie ŭ manastyr.

U zvarocie śviatary zaklikajuć pradstajacielaŭ pamiesnych pravasłaŭnych cerkvaŭ «asudzić vajennuju ahresiju Rasijskaj Federacyi suprać Ukrainy». Taksama jany prosiać razhledzieć publičnyja zajavy Kiryła i «na ŭsiepravasłaŭnym uzroŭni daktrynu «russkoho mira», jakuju na praciahu mnohich hadoŭ prapahanduje patryjarch Kirył i jakaja stała adnym ź idejnych apraŭdańniaŭ vajny Rasii suprać Ukrainy». Paśla razhladu daktryny śviatary zaklikajuć «dać joj acenku z punktu hledžańnia pravasłaŭnaha vučeńnia, i ŭ vypadku jaje asudžeńnia pryciahnuć patryjacha Kiryła da adkaznaści i pazbavić prava zajmać patryjaršy pasad».

Kiraŭnik Rasijskaj pravasłaŭnaj carkvy Kirył u niadzielu paśla nabaženstva ŭ novym maskoŭskim chramie Pakrovu Śviatoj Baharodzicy na Lubierackich palach zaklikaŭ viernikaŭ zhurtavacca «ŭ składany dla krainy čas», u tym liku vakoł ułady.

«Voś tady i budzie ŭ narodzie našym sapraŭdnaja salidarnaść i zdolnaść adbivać vorahaŭ źniešnich i ŭnutranych i ładzić žyćcio naša takim čynam, kab u hetym žyćci było jak maha bolš dabra, praŭdy i lubovi», — skazaŭ patryjarch.

Raniej jon, naŭprost nie havoračy ab padtrymcy rasijskaha ŭvarvańnia va Ukrainu, faktyčna pryvodziŭ arhumienty dla jaho abhruntavańnia. Paśla nabaženstva ŭ centralnym chramie Uzbrojenych sił jon skazaŭ, što ŭ vajenny čas słužba ŭ vojsku — heta sapraŭdny podźvih», piša «Radyjo Svaboda».

Čytajcie taksama:

«Hrech Kaina». Jak Maskva straciła ciapier užo i ŭkrainskich pravasłaŭnych Maskoŭskaha patryjarchata

• 17
• 0
• 0
• 0
• 0
• 0
• 0
• 0