Svajaki słužbovych asob MUS, abvinavačanych ŭ pieravyšeńni ŭłady, źviarnulisia ŭ ABSIE i BCHK.
Svajaki fihurantaŭ tak zvanaj palaŭničaj spravy, słužbovych asob UUS Homielskaha abłvykankama i Žłobinskaha RAUS, źviarnulisia ŭ ABSIE i RHA «Biełaruski Chielsinkski kamitet» z prośbaj akazać sadziejničańnie ŭ abjektyŭnym razhladzie kryminalnaj spravy.
Pra heta BiełaPAN paviedamiła maci adnaho z abvinavačanych Halina Baranava.
Svajaki aryštavanych načalnikaŭ homielskich upraŭleńniaŭ i Žłobinskaha adździeła pa baraćbie z karupcyjaj i ekanamičnymi złačynstvami Alaksandra Małajeva, Dźmitryja Baranava i Leanida Miniankova ličać, što jany byli aryštavanyja, tamu što vałodali dakumientalnymi materyjałami, jakija kampramietujuć pradstaŭnikoŭ dziaržaŭnaj viertykali Homielskaj vobłaści i supracoŭnikaŭ KDB. Maci Baranava taksama padrychtavała zvarot da staršyni Jeŭraparłamienta Ježy Buzeka. «Moj dzied u 1929 hodzie byŭ represavany i rasstralany NKUS pa spravie zmovy polskich kułakoŭ. Jon byŭ reabilitavany paśmiarotna. U zvarocie ja praviała paralel ź ciapierašnim aryštam KDB majho syna i prasiła staršyniu Jeŭraparłamienta dapamahčy razabracca ŭ hetaj spravie», — adznačyła Baranava.
«Kali ŭ najaŭnaści buduć hrubyja parušeńni pravoŭ čałavieka, my abaviazany uźniać hołas u abaronu prynižanych dziaržavaj ludziej. My znojdziem formy, kab raskazać ab hetaj situacyi orhanam ułady, prakuratury jak nahladnamu orhanu.
Možam źviarnucca da hramadskaści, u tym liku i mižnarodnaj, kali nami buduć zafiksavany fakty parušeńnia pravoŭ čałavieka. Budziem šukać dakładnuju infarmacyju ab hetaj spravie, i ŭ zaležnaści ad vynikaŭ prainfarmujem hramadskaść», — prakamientavaŭ situacyju ŭ intervju BiełaPAN staršynia jurydyčnaj kamisii BCHK Hary Pahaniajła.
Kryminalnaja sprava, viadomaja jak «palaŭničaja», pryniata da vytvorčaści Viarchoŭnym sudom. Baranaŭ, Małajeŭ i Miniankoŭ byli aryštavanyja supracoŭnikami KDB u krasaviku 2009 hoda. Usie jany ŭtrymlivajucca na dadzieny momant ŭ SIZA KDB. Načalnik hałoŭnaha ŭpraŭleńnia pa baraćbie z karupcyjaj i ekanamičnymi złačynstvami MUS Viktar Jermakoŭ znachodzicca pad padpiskaj ab niavyjeździe.
Jermakoŭ, Miniankoŭ, Małajeŭ i Baranaŭ abvinavačvajucca va ŭčynieńni złačynstvaŭ, praduhledžanych č. 2 i č. 3 art. 426 KK (pieravyšeńnie ŭłady abo słužbovych paŭnamoctvaŭ). Razam ź imi ŭ kryminalnaj spravie fihurujuć inšyja hramadzianie, jakija abvinavačvajucca ŭ niezakonnym palavańni (havorka idzie pra zdabyču rysi jeŭrapiejskaj, zaniesienaj u Čyrvonuju knihu) i biaździejańni słužbovych asob.
Zhodna z materyjałami kryminalnaj spravy, Jermakoŭ abvinavačvajecca ŭ tym, što daŭ ukazańnie svaim padnačalenym Małajevu, Baranavu i Miniankovu sabrać kampramietujučyja materyjały na supracoŭnikaŭ orhanaŭ dziaržbiaśpieki. Jaho padnačalenyja abvinavačvajucca ŭ pieravyšeńni ŭłady i praviadzieńni apieratyŭnych mierapryjemstvaŭ dla zboru kampramatu na supracoŭnikaŭ KDB.
Kamientary