Źbity siłavikami Arciom Dubski znachodzicca na Akreścina za «raspaŭsiud ekstremisckich materyjałaŭ»
Były palitviazień Arciom Dubski, źbity, pa jaho słovach, siłavikami, znajšoŭsia ŭ izalatary na Akreścina. Jaho asudzili za raspaŭsiud ekstremisckich materyjałaŭ (artykuł 19.11 KaAP), paviedamlaje pravaabarončaja vałanciorskaja hrupa MAYDAY.
Jak pišuć pravaabaroncy, praź piać dzion paśla taho, jak Dubski pierastaŭ vychodzić na suviaź, ź jaho svajakami źviazałasia śledčaja «pa pytańni naniasieńnia Dubskamu fizičnych kalectvaŭ».
Unačy 13 maja, piša MAYDAY, supracoŭniki Centralnaha RUUS Minska dastavili asipaŭčanina ŭ balnicu chutkaj dapamohi, a praź dźvie hadziny zabrali jaho adtul.
«Vierahodna, paśla hetaha Dubskaha dastavili na Akreścina, dzie jon i znachodzicca. Viadoma, što jaho asudzili nibyta za raspaŭsiud ekstremisckich materyjałaŭ», — piša MAYDAY.
Pavodle infarmacyi pravaabaroncaŭ, Arciom Dubski pavinien vyjści z-pad aryštu 27 maja.
MAYDAY adznačaje, što 17 maja ŭ prakuraturu Asipovickaha rajona była padadziena skarha na biaździejnaść siłavikoŭ. Chto mienavita padaŭ jaje, nie ŭdakładniajecca.
Były palitviazień Arciom Dubski pierastaŭ vychodzić na suviaź 12 maja paśla taho, jak raskazaŭ ab źbićci siłavikami dniom raniej i vykliku ŭ KDB.
Kamientary