Ci boh Cibo? «Reał» adkazvaje «tak!». Bielhijski kipier vyjhraŭ dla Madryda futbolnuju Lihu čempijonaŭ
Dziakujučy fienamienalnaj hulni bramnika Cibo Kurtua, čempijon Ispanii ŭ tytulnym dvuboi skaryŭ anhlijski «Livierpul» i ŭ 14-y raz staŭ najlepšym futbolnym kłubam Staroha śvietu
Paryž — heta śviata, jakoje zaŭsiody z taboj. Tak, prynamsi, śćviardžaŭ Cheminhuej. Adnak 15 tysiač futbolnych zaŭziataraŭ, što nie zdoleli patrapić na «Stad de Frans», niahledziačy na najaŭnaść kvitkoŭ, paspračalisia b ź piśmieńnikam. Dy jašče na pavyšanych tanach — z bolem, sumam dy abureńniem u hołasie. A ŭsio tamu, što arhanizatary sustrečy (francuzskaja stalica «pierachapiła» finał Lihi čempijonaŭ u Sankt-Pieciarburha, «zabanienaha» z-za vajennaj ahresii Rasii) niedastatkova pilna pastavilisia da mieraŭ biaśpieki i arhanizacyi ruchu fanaŭ, z-za čaho na padychodach da areny ŭtvarylisia vielizarnyja čerhi.
U toj ža čas niekatoryja vuzłavyja siektary ŭvohule zastalisia biezabaronnymi. Tudy i kinulisia ludzi, jakija kvitkoŭ nie mieli, ale maryli luboj praŭdaj-niapraŭdaj na stadyjon patrapić.
Da taho ž nie spracoŭvali sistemy internet-reahavańnia na štrych-kody kvitkoŭ, što taksama zatrymała ludziej la ŭvachodaŭ dy prymusiła iści na radykalnyja miery, kab patrapić na matč.
U vyniku harmidaru vielizarnaja kolkaść zakonapasłuchmianych zaŭziataraŭ paciarpieła dvojčy: ich mała taho, što na zabraniravanyja miescy nie puścili, dyk jašče i ślozaciečnym hazam razhaniali. Paciarpieli ŭ tym liku i svajaki futbalistaŭ-finalistaŭ. Naprykład, patrapiŭ pad «razdaču» brat Žaela Macipa ź ciažarnaj žonkaj.
A tak usio pryhoža pačynałasia: fan-siektary ŭ roznych rajonach francuzskaj stalicy, bieźlič vizicioraŭ z abodvuch bakoŭ, śpievy, što byli čutnyja navat praz Ła-Manš… Padavałasia, hety viečar niemahčyma sapsavać.
Ale ŭžo za niekalki hadzin da startavaha śvistka pieršyja znaki biady prajavili svaje abrysy.
Aŭtobus «Livierpula», niahledziačy na palicejskaje supravadžeńnie, patrapiŭ u typovy dla Paryža zator i staŭ pasiarod horada. Čverć hadziny miascovaj DPS spatrebiłasia, kab vyzvalić kamandu dy prakłaści jej šlach na arenu.
Užo tady pa «Stad de Frans» paniesłasia abviestka pra zatrymku startu sustrečy. Dalej ža paŭza zaciahnułasia jašče bolš praz sutyknieńni palicyi z razzłavanymi ŭładalnikami kvitkoŭ la bramaŭ uvachodu. U vyniku zamiest anansavanych 22:00 sustreča raspačałasia ŭ 22:36.
Ale navat tyja, chto paśla ŭsich zatrymak spaźniŭsia da śvistka Klemana Ciurpena, mahli spakojna vydychnuć, bo ciaham pieršaha tajma lik na tabło nie mianiaŭsia. Jak nie mianiaŭsia i scenaryj sustrečy, što bolš nahadvaŭ urok u aŭtaškole, pryśviečany darozie z adnabakovym rucham.
«Livierpul» cisnuŭ, «Reał» uratoŭvaŭ Cibo Kurtua — i tak paŭtarałasia z zajzdrosnaj pieryjadyčnaściu. Kali b nie zorny bramnik, lik sapraŭdy moh stać dla ispancaŭ zusim nieprystojnym, kštałtu 5:0 ci 6:0.
Ale Madryd navat pry dziesiaci ŭdarach, što dapuściŭ u bok ułasnaj ramki, stojka trymaŭsia, jak toj junak u kulašoŭskim vieršy.
Za stojkaść futbolnyja bahi ŭznaharodzili «Reał» paśla pierapynku. Pieršym ža ŭdaram kamandy ŭ čužy stvor Vinisius vyvieŭ ispancaŭ u lidary. Chtości moh hetamu ździvicca albo narakać na niespraviadlivaść losu. Ale daśviedčanyja ŭ hulni ludzi tolki pakivali hałovami: kamanda Karła Ančałoci ŭvieś siezon tak pieraadolvała pieraškody ŭ Lizie čempijonaŭ. Chaj sabie niełahična i nie zusim zasłužana adnosna futbolnych kanonaŭ, tym nie mienš, maksimalna efiektyŭna. Pakul apanienty marnavali mahčymaści, «Reał» čakaŭ šancu ŭrvać svajo. I brazilski forvard na 59-j chvilinie sarvaŭ džek-pot.
Nu, a dalej… Dalej Kurtua napracavaŭ na «Załaty miač», «Oskar», «Hremi» dy orden Hanarovaha lehijona adnačasova. Jon patroiŭ kolkaść svaich sejvaŭ u biahučaj ŁČ i davioŭ ich da ličby «57» u 14 hulniach. Dla paraŭnańnia, u bramnika «Livierpula» Alisana za anałahičnuju dystancyju takich vyratavalnych momantaŭ nabrałasia tolki 14. Byccam vaviorka ŭ kole, bielhijec kruciŭsia, kab Madryd praciahnuŭ svaju ŭnikalnuju sieryju: siem papiarednich finałaŭ ŁČ zapar «błankas» pakidali za saboj. Apošniaje paražeńnie datavałasia 1981-m, kali kryŭdzicielem vystupaŭ jakraz «Livierpul». I voś kab anijakija fłešbeki ispancaŭ bolš nie turbavali, Kurtua vydavaŭ matč usiaho žyćcia.
I damohsia-taki žadanaha! Hoł Vinisiusa zastaŭsia ŭ sustrečy adzinym, što nie tolki znoŭ zrabiła «Reał» najlepšym kłubam Jeŭropy, ale i pieratvaryła treniera Ančałoci ŭ žyvuju lehiendu. Upieršyniu ŭ historyi adzin i toj ža nastaŭnik čatyry razy ŭźniaŭ nad hałavoj hałoŭny kantynientalny trafiej. Raniej tata Karła śviatkavaŭ pośpiech na čale «Miłana» i taho ž «Reała».
Ale sioleta tryumf vydaŭsia asablivym: u pieršy ž hod paśla viartańnia na kapitanski mastok «błankas» śpiecyjalist pieramoh nie tolki ŭ pieršynstvie Ispanii, ale i na mižnarodnaj arenie.
Carlo Ancelotti becomes the first manager to win four UEFA Champions League titles
2002/03 w/ AC Milan
2006/07 w/ AC Milan
2013/14 w/ Real Madrid
2021/22 w/ Real Madrid pic.twitter.com/usKsyCVDBP
Što da «Livierpula», to padnačalenym Jurhiena Kłopa vidavočna nie chapiła aščadnaści dy śviežaści — usio ž taki kalektyŭ pravioŭ maksimalna mahčymyja 63 matčy siezona. I kali ŭ finale ŁČ patrabavałasia kryšku dadać u chutkaści, apieratyŭnaści pryniaćcia rašeńniaŭ dy prahmatyčnaści, futbalistam brakavała ŭnutranaha resursu.
Real Madrid have played eight Champions League finals in the #UCLera
vs Juventus (1998)
vs Valencia (2000)
vs Bayer Leverkusen (2002)
vs Atlético (2014)
vs Atlético (2016)
vs Juventus (2017)
vs Liverpool (2018)
vs Liverpool (2022)
They've won them all. pic.twitter.com/iaGD6F29aI
Jak vynik, revanšu za paražeńnie ŭ kijeŭskim finale 2018 hoda (tady anhličanie sastupili «Reału» 1:3) nie atrymałasia. I kolki b «čyrvonyja» ni kazali, što pa mietrycy «čakanych hałoŭ» jany pieraŭzyšli apanienta ŭdvaja — 2,14 suprać 0,88 — ličby na tabło addavali Madrydu 14-ty tytuł kłubnych čempijonaŭ Jeŭropy.
U Minsku adbylisia masavyja zatrymańni vydaŭcoŭ i kniharaspaŭsiudnikaŭ33
Kamientary