Čaćviorty miesiac praciahvajecca rasijskaja vajennaja ahresija va Ukrainie. Biełarusy hinuć z abodvuch bakoŭ frontu rasijska-ŭkrainskaj vajny.
Biełarusy, jakija biaruć udzieł u bajavych dziejańniach na baku USU, sfarmavali svoj połk imia Kastusia Kalinoŭskaha. Viadoma pra śmierć užo šaści hramadzian Biełarusi, jakija baranili cełasnaść i niezaležnaść Ukrainy. Nie stała Ilji «Litvina» Chrenava, Alaksieja «Tura» Skobli, Źmitra «Terora» Apanasoviča, Źmitra «Hansa» Rubašeŭskaha, Kanstancina «Fieniksa» Dziubajły i Paŭła «Vołata».
Ale jość źviazanyja ź Biełaruśsiu vajskoŭcy, jakija vajujuć i na baku Rasii. Choć pra ich značna radziej pišuć, ale siarod hetych ludziej taksama jość čałaviečyja straty. «Svaboda» znajšła źviestki ab piaci ŭradžencach Biełarusi, jakija zahinuli va Ukrainie. Mahčyma, hety śpis niapoŭny.
Piotr Łuzanaŭ (33 hady)
Zahinuŭ 24 sakavika, u toj ža dzień, što i Źmicier «Teror» Apanasovič. Na sajtach tak zvanaj «Navarosii» pra Łuzanava napisana, što jon byŭ namieśnikam kamandzira bataljona, kapitanam.
Sam Łuzanaŭ rodam z Mazyra, vučyŭsia ŭ Vajskovaj akademii ŭ Minsku (hod vypusku 2012). Mieŭ pazyŭny «Piatrovič».
U sacsietkach miescam žycharstva Łuzanava paznačany Dakučajeŭsk Danieckaj vobłaści, tam u jaho zastałasia žonka. Słužyŭ u vajskovaj častcy №08805 Daniecka.
Zahinuŭ pablizu Maryupala, kali hrupa tankaŭ pad kiraŭnictvam Łuzanava natrapiła na praciŭnika.
Pavał Jaŭhleŭski (51 hod)
Naradziŭsia ŭ Lidzie, u Hrodzienskaj vobłaści. Udzielničaŭ u vajnie na ŭschodzie Ukrainy z 2014 hoda, u 2015-m byŭ paranieny.
Pazyŭny — «Kadet». Vučyŭsia ŭ Minskim suvoraŭskim vučyliščy, potym u Danieckim vyšejšym vajskova-palityčnym vučyliščy. Havaryŭ, što staŭ vajskoŭcam pa śladach baćki.
Zahinuŭ 9 krasavika, kali bataljon «narodnaj milicyi DNR» pad kiraŭnictvam Jaŭhleŭskaha pasprabavaŭ atakavać pazicyju bajcoŭ «Azova» ŭ Maryupali.
Illa Kurnaloŭ (21 hod)
Pazyŭny «Biełarus». Zahinuŭ 30 sakavika. Rodam z Hancavičaŭ, ale siamja pierajechała ŭ Danieck. U Biełarusi zastałosia šmat svajakoŭ.
«Dziakuj, što abaraniaŭ nas», — napisała ŭ sacsietkach jaho siastra Chryścina.
Uładzisłaŭ Čarnoŭ (25 hadoŭ)
Małodšy siaržant rasijskaha vojska. Naradziŭsia ŭ Mahiloŭskaj vobłaści, ale ŭ dvuchhadovym uzroście siamja pierajechała ŭ Tamboŭskuju vobłaść Rasii.
Pa adukacyi byŭ majstram pa absłuhoŭvańni i ramoncie aŭtamabilaŭ. U 2016 hodzie byŭ pryzvany ŭ armiju. Demabilizavaŭsia, ale ŭ 2020-m pajšoŭ u vojska na kantrakt. Słužyŭ u Leninhradskaj vobłaści.
Zahinuŭ 28 sakavika. Uznaharodžany paśmiarotna rasijskim ordenam Mužnaści.
Mikałaj Markaŭ (67 hadoŭ)
Pałkoŭnik avijacyi Respubliki Biełaruś, žyŭ u Lidzie. Skončyŭ Čarnihaŭskaje vyšejšaje vajskova-avijacyjnaje vučylišča. Spačatku słužyŭ u Kazachstanie i HDR, a potym u Pastavach i Lidzie.
Byŭ šturmanam pałka. Viadoma, što Markaŭ jeździŭ na zarobki ŭ Afryku. U składzie jakoha padraździaleńnia jon vajavaŭ va Ukrainie, nieviadoma. Źbity 12 maja nad Papasnaj Łuhanskaj vobłaści. Pachavany ŭ Lidzie.
Kamientary