Lebiadok: Stratehija NATA pa vyzvaleńni Bałtyi, a nie jaje pieršapačatkovaj abaronie, moža apynucca zhubnaj
Vajenny ekśpiert Jahor Lebiadok miarkuje, što ŭ pytańni mahčymaha napadu Rasii na Prybałtyku nie varta raschałodžvacca. I lepš NATA zrabić papieradžalnyja zachady dla jaje abarony, bo dziejańni ŭ adkaz buduć projhryšnymi, ź vialikimi stratami i vydatkami.
«Raptoŭnaść zjaŭlajecca adnym z klučavych elemientaŭ apieratyŭnaha mastactva, što dazvalaje dasiahnuć pośpiechu pry abmiežavanych resursach i surjoznych ryzykach dziejańniaŭ u adkaz», ‒ piša Lebiadok.
Siarod sposabaŭ dasiahnieńnia raptoŭnaści jon adznačaje:
pavyšeńnie hatoŭnaści svaich vojskaŭ i źnižeńnie hatoŭnaści supiernika;
zrabić svaje mahčymaści i namiery maksimalna niavyznačanymi dla praciŭnika.
Pavodle Lebiadka, pavysić hatoŭnaść da chutkaj realizacyi rasijskaj apieracyi ŭ Prybałtycy z vykarystańniem terytoryi Biełarusi całkam realna za košt raźmiaščeńnia na našych składach rasijskich bojeprypasaŭ i techniki, vysłabanieńnia z techniki US Biełarusi na zachoŭvańni peŭnaj kolkaści rasijanam. Dla chutkaha stvareńnia ŭ Biełarusi ŭdarnaj hrupoŭki dastatkova budzie prylacieć i pryjechać sałdatam, navat na hramadzianskich srodkach, abo stvaryć bazy, vučebna-bajavyja centry i inšyja sposaby prysutnaści rasijskich vojskaŭ.
«Źnižeńnie ž hatoŭnaści praciŭnika dasiahajecca ŭ tym liku infarmacyjnymi apieracyjami, u pieršuju čarhu, dezynfarmacyjaj i mierami zaspakajeńnia. Da prykładu, padsiłkoŭvańnie na zachadzie naratyvaŭ: «Ruskija navat nie ŭziali… va Ukrainie, nu jakaja Prybałtyka?», «Prybałtyka ŭ NATA ‒ Rasija nie suniecca» i h.d.», ‒ piša Lebiadok.
Dadatkova piśmienna vykarystoŭvajecca raźmierkavańnie času: mohuć vykarystoŭvać apieratyŭnyja paŭzy ŭ vajnie z Ukrainaj jak znak mirnych namieraŭ. Dapamoža rasijanam i razumieńnie taho, kolki času hramadstva moža mieć cikavaść i ŭvahu da prablemy. Naprykład, u Hiermanii cikavaść da vajny pa trendach Huhł surjozna nie pratrymałasia i 4 miesiacy.
«Razumieńnie hetaha Rasija daŭno aktyŭna vykarystoŭvaje i dziejničaje raściahnuta dla minimizacyi nastupstvaŭ, pakul usie žyvuć «adnym dniom», ‒ piša Lebiadok.
Jašče adzin sposab adciahnuć uvahu ad mahčymaha nastupu ‒ stvareńnie palityčnych prablem abo ŭmiełaje i svoječasovaje ich vykarystańnie.
«Dadatkovym faktaram raspyleńnia ŭvahi moža stać intensifikacyja tezisa, jaki ŭ 2015 aktyŭna padsiłkoŭvali sami jeŭrapiejskija palityki i ŭkrainskija vyšejšyja słužbovyja asoby, a taksama šerah palitołahaŭ: «Łukašenka supraćstaić Pucinu». Tak, zajavy pra pradastaŭleńnie Rasijaj «Iskanderaŭ» i pra jadziernuju zbroju pry myśleńni ŭ duchu nazvanaha tezisa buduć pryvodzić zachodnich i ŭkrainskich palitykaŭ da marnavańnia času na sproby dyjałohu, kab «ubić klin» pamiž Pucinym i Łukašenkam», ‒ piša Lebiadok.
Na jaho dumku, Rasija nie pieradaść jadziernuju zbroju Biełarusi nie praz Damovu ab nieraspaŭsiudžvańni jadziernaj zbroi (DNIAZ), a z-za niežadańnia stracić kantrol nad takoj zbrojaj i adsutnaść śpiecyjalnaj infrastruktury ŭ Biełarusi.
Ale ekśpiert nie vyklučaje varyjant vykarystańnia farmalna biełaruskich nośbitaŭ rasijskimi vajskoŭcami ŭ patrebny momant.
Niavyznačanaść dasiahajecca i płanamiernaj dezynfarmacyjaj. Umoŭna kažučy, pakul usie hladziać na Su-25, jadzierny ŭdar moža nanieści artyleryja i inšyja srodki dastaŭki. A dla rasijskich Tu-22 i Tu-160 nie patrebna infrastruktura ŭ Biełarusi (jany mohuć prylacieć ź jadziernaj zbrojaj adrazu z RF).
«Z 2021 ich paloty stali rehularnymi ŭ nas. Voś i niavyznačanaść ‒ niasie hety bambavik jadziernyja zarady abo zvyčajnyja», ‒ piša Lebiadok.
Ekśpiert miarkuje, što dla Rasii ŭ Prybałtycy prablema ‒ nie dapuścić surjoznaha procidziejańnia vojskaŭ ZŠA i jeŭrapiejskich krain. «Paśla raptoŭnaha ŭdaru varta čakać sproby zatarmazić dziejańni NATA za košt roznych sposabaŭ zaciahvańnia času i adciahvańnia ŭvahi», ‒ miarkuje jon.
«Stratehija NATA pa vyzvaleńni Prybałtyki, a nie jaje pieršapačatkovaj abaronie, moža apynucca zhubnaj. NATA pryjdziecca vyzvalać harady, u jakich rasijskija vojski i jeŭrapiejskaje hramadzianskaje nasielnictva. Što zrabić biez zabojstva hramadzianskich budzie vielmi składana. A pahroza zabojstva hramadzianskaha nasielnictva budzie surjoznym tormazam dla vajennych dziejańniaŭ i tym, što padšturchoŭvaje da pieramovaŭ, jakija ŭ kančatkovym vyniku mohuć zrabić temu Prybałtyki prosta farmalnaj da lepšych časoŭ, pa prykładzie Kryma», ‒ piša Lebiadok.
Stryžak: Vajna pamiž Litvoj i Rasijaj niepaźbiežnaja. I biełarusam treba rychtavacca
Dyńko: Kali ruskija niazdolnyja ŭziać Čarnihaŭ, to pra jaki napad na Litvu moža iści havorka
Ciapier čytajuć
Kab nie siadzieć u Rasii za narkotyki, małady danosčyk z Ašmianaŭ zapisaŭsia na front. Dyj zhinuŭ14
Kamientary