Navukoŭcy vyśvietlili, što halucynacyi mohuć być narmalnaj źjavaj
Kali vy bačyćcie tvary, jakich niama, abo čujecie hałasy, kali nichto nie razmaŭlaje, to heta nie aznačaje, što vam treba pakłapacicca pra svoj psichičny stan. Halucynacyi sustrakajucca na dziva časta: da 15 pracentaŭ ludziej časam adčuvajuć pach, bačać, adčuvajuć abo čujuć niesapraŭdnyja rečy. Daśledavańnie bolš padrabiazna praanalizavała paŭsiadzionnyja halucynacyi.
«Ci baču ja pryvidaŭ?» («Zie ik spoken?») — z takim devizam hałandskija psichołahi z Utrechtskaha ŭniviersiteta niekalki hadoŭ tamu praviali anłajn-apytańnie. Šukali asob, jakija ŭžo adčuvali halucynacyi.
Hetaja źjava nie takaja ŭžo redkaja i zakranaje taksama i zdarovych ludziej, pišacca ŭ daśledavańni, niadaŭna apublikavanym u śpiecyjalizavanym časopisie «Šyzafrenija», dla jakoha byli praanalizavanyja sabranyja danyja. Pavodle acenak, ad 6 da 15 adsotkaŭ nasielnictva čas ad času adčuvajuć štości niezvyčajnaje.
Ź vieraśnia 2016 hoda pa maj 2017 hoda ŭ apytańni ŭziali ŭdzieł bolš za 10,4 tysiačy čałaviek (amal 70 pracentaŭ — žančyny) va ŭzroście ad 14 da 88 hadoŭ.
Zvyčajnaja źjava
80 pracentaŭ udzielnikaŭ bačyli halucynacyi chacia b raz u žyćci, pałova za apošni miesiac i tracina za papiaredni tydzień. Viadoma, z hetaha nielha rabić vysnovy pra nasielnictva ahułam, padkreślivajuć aŭtary. Vybarka nie była reprezientatyŭnaj, i bolš imavierna, što paŭdzielničać vyrašyli ludzi, jakija pieražyli halucynacyi. Tym nie mienš, acenka dała novaje ŭjaŭleńnie ab pryrodzie takich iluzij.
Zhodna z vynikami, akustyčnyja halucynacyi źjaŭlajucca najbolš raspaŭsiudžanymi: tracina mieła takoha rodu halucynacyi za apošni miesiac. Dobraja piataja častka paviedamiła pra pamyłkovaje aptyčnaje ŭsprymańnie, krychu mienš ludziej vykazałasia, što sutykalisia z halucynacyjami, źviazanymi z adčuvańniami i pachami. Psichołahi byli niekalki ździŭlenyja tym, jak šmat adkazaŭ nahadvajuć patałahičnyja formy halucynacyj, naprykład, tyja, ad jakich pakutujuć ludzi z šyzafrenijaj abo narkazaležnyja. Naprykład, mnohija adčuvali multysensarnyja halucynacyi, što charakterna dla nieŭrałahičnych rasstrojstvaŭ.
Hałasy i cieni
Aŭtary daśledavańnia pišuć, što asabliva varta adznačyć, nakolki raznastajnymi mohuć być halucynacyi. Samyja raspaŭsiudžanyja słychavyja halucynacyi — heta hałasy: adny čujuć, jak chtości pramaŭlaje ich imia, inšyja — niezrazumieły šept abo dziciačy płač. Ale taksama časta zhadvalisia huki muzyki i rynhtony telefona. Bačańnie cieniaŭ uznačalvaje śpis aptyčnych halucynacyj. Siarod niuchalnych halucynacyj najbolš časta sustrakaŭsia pach vohnišča. Pachi ježy, parfumy i kvietak taksama davoli raspaŭsiudžanyja.
Praciahłaść halucynacyj była roznaj, časam u kahości jany doŭžylisia ŭsiaho imhnieńnie abo niekalki siekund, inšyja paviedamlali, što jany doŭžylisia niekalki chvilin. Taki dośvied i ź im źviazanyja pieražyvańni ŭ asnoŭnym byli niepryjemnymi, a dla niekatorych navat vielmi stresavymi, pišuć daśledčyki. Imavierna, isnuje ceły śpiektr simptomaŭ: ad niekatorych karotkačasovych pieražyvańniaŭ da jarka vyjaŭlenaha psichozu.
Mamientalnaja apracoŭka
Halucynacyi zvyčajna tłumačacca tym, jak pracuje naš mozh: u im adnačasova apracoŭvajucca pačućciovyja ŭražańni z adnaho boku, i robiacca zdahadki ab ubačanym abo pačutym ź inšaha, što i pryvodzić da łžyvych vysnoŭ, havorycca ŭ pracy. Zhodna z hetaj teoryjaj, halucynacyi ŭźnikajuć čaściej, kali dadajucca inšyja faktary, što paharšajuć naša ŭsprymańnie rečaisnaści. U cełym, usie hetyja halucynacyi, imavierna, bolš raspaŭsiudžanyja, čym miarkujecca.
Ciapier čytajuć
«Adhuknuŭsia na 95% abjaŭ — i ŭsie admovili». Rasijaninu nie chočuć zdavać kvateru ŭ Hrodnie12
Kamientary