Praŭładnaja błohierka Andžyliša, jakaja kanfliktavała z kampanijaj niaviestki Łukašenki, vyjšła zamuž

Anhielina Michalova (jana ž Andžyliša) aščaśliviła svaju šmatmiljonnuju aŭdytoryju navinoj ab tym, što pabrałasia šlubam. Jaje abrańnik — Uład Šuma. Jon taksama sprabavaŭ raźvivać svoj błoh u tyktoku, ale zmoh dabicca našmat mienšaha pośpiechu, čym jaho žonka. Kali na Andžylišu tolki ŭ hetaj sacyjalnaj sietcy padpisana 3,8 miljona čałaviek, dyk na Ułada — kala 72 tysiač.

Viasielle było vielmi ścipłym — para prosta raśpisałasia ŭ ZAHSie. Zamiest trendavaha bukietu z kałaŭ, jaki spačatku płanavała kupić Andžyliša za 350 rubloŭ, jana nabyła łandyšy ŭ pierachodzie ŭ babuli dy abviazała kvietki biełaj stužačkaj. U vyniku śviatočny bukiet abyšoŭsia ŭsiaho ŭ 17 rubloŭ.

Paśla rośpisu maładziony pasiadzieli ŭ restaranie The View.

@andjilisha

užie officialno!

♬ original sound - kendymatamis1

Ale ž Andžyliša supakojvaje aŭdytoryju: vialikaje śviata jašče adbudziecca — zapłanavana jano na 15 žniŭnia. Tam budzie i biełaja sukienka, i ŭsio astatniaje.

Nahadajem, niekalki hadoŭ tamu dziela błohierskaj karjery Andžyliša navat kinuła vučobu — jana vučyłasia ŭ Biełaruskim dziaržaŭnym univiersitecie kultury i mastactvaŭ na kulturołaha-mieniedžara. Padpisčykam tady Andžyliša ščyra pryznałasia, što vielmi bajałasia raźmierkavańnia: «Ja vielmi chvalavałasia, što mianie mohuć kudy-niebudź adpravić adpracoŭvać i maja karjera, jakaja idzie ŭvierch, moža spynicca».

Prasoŭvańniem Andžylišy jak śpiavački zajmałasia muzyčnaja kampanija «Fłahman Mjuzik», jakaja źviazanaja ź niaviestkaj Łukašenki Hannaj Siałuk. Na Andžylišu čas ad času skardziłasia danosčyca Volha Bondarava, ale zdavałasia, što papularnaj błohiercy z takim dacham chvalavacca nahody niama.

Andžylišu razam ź inšymi błohierami Dzim Dzimyčam i Ulkaj Pulkaj aktyŭna vykarystoŭvali dla prapahandy siarod školnikaŭ. Jany śpiavali pieśni ŭ padtrymku Łukašenki, nasili jaho mierč i vystupali na «Marafonie adzinstva». A jašče dali kancert u akupavanym Krymie.

Zaśviaciłasia Andžyliša i ŭ pieršym ajčynnym interaktyŭnym sieryjale «Zumiery».

Ale niešta pajšło nie tak. Letaś u kancy śniežnia dziaŭčyna zapisała videa, u jakim płakała praz toje, što ŭsie jaje pieśni byli vydaleny.

Praź miesiac błohierka raskazała padpisčykam padrabiaznaści: «Fłahman Mjuzik», ź jakoj jana pracavała try hady, zabrała jaje prajekt i vydaliła ŭsie pieśni z muzyčnych placovak.

— Jany na hetym nie spynilisia, i siońnia ŭ artysta Andžy vyjšaŭ novy trek biez majho viedama. Aficyjna zajaŭlaju: da hetaj pieśni ja nie maju nijakaha dačynieńnia. Vokładka, tekst, bit zrobleny z dapamohaj niejrasietak — iznoŭ ža, biez majho ŭdziełu. Nijakaha tvorčaha pracesu z hetymi ludźmi ŭ mianie ŭžo daŭno niama. Nas źviazvajuć tolki jurydyčnyja momanty, jakija zaraz vyrašajucca. Nijakich maralnych acenak «Fłahman Mjuzik» ja davać nie budu i nie chaču. Prosta hetaje dziejańnie ź ich boku, na maju dumku, hańbić moj honar i hodnaść jak artystki.

U svaju čarhu «Fłahman Mjuzik» u svaich sacsietkach abvinavaciła Andžylišu ŭ infantylnaści.

Hetyja miesiacy stali vielmi składanymi dla raniej lubimaj uładami błohierki. Niadaŭna Andžyliša pryznałasia, što «zabiła na siabie, svaju tvorčaść, svajo zdaroŭje», bo joj było vielmi drenna.

Kaža, što pierastała rabić usie pracedury (navat manikiur), papraviłasia na niekalki kiłahramaŭ. I dajšła da taho, što nie moža hladzieć na siabie ŭ lusterka.

Imavierna, da niejkaha kampramisu Andžyliša i «Fłahman Mjuzik» usio ž zmahli pryjści: u siaredzinie maja błohierka raspaviała, što ŭsie treki byli adnoŭleny na muzyčnych placoŭkach. Ale jana pramaŭčała pra toje, što raptam źnik jaje akaŭnt u instahramie, dzie Andžyliša mieła 123 tysiačy padpisčykaŭ.

Jašče raniej za Andžylišu z «Fłahman Mjuzik» syšła błohierka Ulka Pulka — Uljana Stalarova stvaryła hety vobraz całkam samastojna. Usie svaje staronki ŭ sacyjalnych sietkach dziaŭčyna była vymušana pakinuć va ŭłasnaści muzyčnaj kampanii. Pry hetym tolki na jutub-kanale dziaŭčyna mieła bolš za 3 miljony padpisčykaŭ.

Kampanija ž pieradała sacsietki Stalarovaj inšaj dziaŭčynie —15‑hadovaj minskaj školnicy ź siamji vajskoŭcaŭ Arynie Ramanavaj. Ciapier taja sprabuje skarać aŭdytoryju jak Ulka Pulka — ale biez asablivaha pośpiechu.

• 0
• 2
• 7
• 5
• 0
• 0
• 0
• 0