Sprava «Hazpram-Transhaza» razrastajecca: krynicy kažuć pra sotniu zatrymanych i raśpił rasijskich maštabaŭ
Sprava «Hazpram-Transhaza» — nastupstva pravalnaj inviestycyi ŭ «Hazpram-Centr» u Minsku, dziela jakoha źnieśli aŭtavakzał «Maskoŭski» — nabiraje abaroty. Chutka 9 hadoŭ ad startu prajekta, a z praktyčnych vynikaŭ — tolki tamy kryminalnaj spravy.
Raniej «Naša Niva» užo ŭ detalach raskazvała raściahnutuju na hody trahikamiedyju z uźviadzieńniem «Hazpram-Centra» ŭ Minsku, jakaja ŭ vyniku skončyłasia zatrymańniem top-mieniedžmientu.
Čytajcie taksama: «Sprava «Hazprama»: praciahvajucca zatrymańni, zvalniajuć dziaciej čynoŭnikaŭ, ułady patrabujuć adnavić budaŭnictva «Hazpram Centra»
Jak nam stała viadoma ciapier, kryminalnaja sprava mocna razrastajecca. Pa paviedamleńniach našych krynic, zatrymana ŭžo kala sotni byłych i dziejnych supracoŭnikaŭ «Hazpram-Transhaz-Biełaruś» (pavodle infarmacyi na sajcie, u «Hazpram-Transhazie pracuje 6,7 tysiačy rabotnikaŭ).
Artykuły kryminalnych spraŭ dakładna nieviadomyja.
Krynicy nazyvajuć pryčynaj złoŭžyvańniaŭ kumaŭstvo, kradziež, raśpiły i biazładździe na budoŭli.
«Šeść hod — ničoha nie zroblena. A ci byli hrošy? Byli. Ci bušavała dziejnaść na papierach? Bušavała. Nie čuŭ, kab niechta ŭ dyrekcyi pracavaŭ za ideju hetyja hody. Raźvialisia «hurtki pa intaresach», jakija daili i daili budoŭlu, — kažuć nam abaznanyja. —
Dachodziła da taho, što kuplali sami ŭ siabie pustyja karobki pad vyhladam abstalavańnia, a potym śpisvali. Ja b kazaŭ, što tut historyja navat nie pra biełaruskija masštaby raśpiłaŭ, a pra rasijskija.
A jak kraści na budoŭli, možna napisać niekalki dysiertacyj: zavyšaj abjomy, rascenki, rabi nie pa technałohii, zabiraj reštu.
Tak pryniata ŭ Rasii. Ale samy hałoŭny punkt schiemy — treba, kab byŭ vynik, jaki možna zdać.
Jakaść niavažnaja — potym na ramoncie jašče kraści možna, ale zdać treba. A tut nie zdali. Raźjušyli Łukašenku, orhany pačali padymać zakupki i paniesłasia. Niedapastaŭki, prypiski.
Začapili adnych, a tyja pačali havaryć na inšych — kłasika. Zatrymlivajuć ludziej z centralnaha aparata i filijałaŭ».
Jak kažuć supracoŭniki «Hazpram-Transhaza», jašče letam płanavałasia, što 1 vieraśnia budzie restart budoŭli centra, ale znoŭ nie zadałosia.
«Padlik dakładnaj sumy zakapanych hrošaj praciahvajecca i naŭrad ci skončycca chutka», — reziumujuć naziralniki.
Viadoma, što zalot tolki ź sierbskim abstalavańniem dla enerhacentra paciahnuŭ na 30 miljonaŭ dołaraŭ.
Čytajcie taksama:
Italjanski zabudoŭščyk raźbiraje krany i sychodzić, ambicyjnaja budoŭla «Hazpram-centra» prypynienaja
Trahikamiedyja na budoŭli «Hazpram-Centra»: abstalavańnie na $20 miljonaŭ sapsavałasia
Krynicy: «Hazpram transhaz Biełaruś» kančatkova prajhraŭ sierbam sud na $30 miljonaŭ
Łatuška abviarhaje abvinavačańni ŭ charasmencie ad delehatki KR Karpušonak83
Łatuška abviarhaje abvinavačańni ŭ charasmencie ad delehatki KR Karpušonak
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona22
Kamientary