U nacparku «Prypiacki» pasialili dvaich žarabiat paleskaha kania
Paru niezvyčajnych koniej zavieźli ŭ safary-park Nacyjanalnaha parku «Prypiacki», paviedamlajecca na sajcie parku. Dvoje žarabiat ź mianuškami Dziŭ i Lel — paleskija koni, jakich u narodzie nazyvajuć biełaruskimi poni.
Jość viersija, što paleski koń moža być naščadkam i nośbitam hienaŭ staražytnych lasnych dzikich koniej — tarpanaŭ, papulacyja jakich kančatkova źnikła ŭ kancy XIX stahodździa.
«Paleski koń stahodździami farmavaŭsia biez ŭmiašańnia čałavieka ŭ surovych izalavanych umovach Prypiackaha Paleśsia. Bałoty, raźlivy rek, vysokaja vilhotnaść, bahaćcie zajedzi, biednyja asakovyja pašy, ciažkaprachodnyja terytoryi zrabili hetaha konika nizkarosłym (vyšynia ŭ karku ad 130 sm da 140 sm), muskulistym, ciahavitym, niepatrabavalnym i niezamiennym pamočnikam u sielskaj haspadarcy dla palešukoŭ. Adroźnivajecca ad inšych poni rachmanym charaktaram», — udakładnili va ŭstanovie.
Ciapier paleski koń znachodzicca na miažy vymirańnia. U 2021 hodzie ekśpiedycyjam udałosia vyjavić usiaho 65 hałoŭ paleskaj abaryhiennaj papulacyi na Prypiackim Paleśsi. Pry hetym śpiecyjalisty nie vyklučajuć, što asobnyja žyvioliny mohuć jašče być na pryvatnych padvorkach palešukoŭ. Ekśpiedycyi pa ich pošuku treba praciahvać.
Dla padtrymańnia papulacyi nieabchodnyja 1 tysiača kabył i 20 žarabcoŭ. U nacparku spadziajucca, što novyja hadavancy safary-parku stanuć pačatkam viartańnia biełaruskich poni na Paleśsie.
Kamientary