Upieršyniu za stahodździe nižniaja pałata Kanhresa ZŠA nie moža vybrać śpikiera
Respublikaniec Kievin Makkarci, naminavany na druhuju pa važnaści pasadu ŭ amierykanskaj palitycy — pasadu śpikiera nižniaj pałaty — znoŭ nie zmoh zaručycca nieabchodnaj kolkaściu hałasoŭ. Upieršyniu bolš čym za stahodździe nižniaja pałata nie moža vybrać staršyniu, piša Bi-bi-si.
Hałasavańnie prachodziła try razy. Makkarci nabraŭ tolki 202 hałasy členaŭ Respublikanskaj partyi. Kab atrymać pasadu, jamu nieabchodna prynamsi 218 hałasoŭ.
U pałacie sioleta 222 respublikancy, adnak 19 najbolš kansiervatyŭna nastrojenych členaŭ frakcyi nie žadajuć jaho padtrymlivać. Jany prahałasavali za inšaha respublikanca — Džyma Džordana.
Asnoŭny supiernik Makkarci — kandydat ad demakrataŭ Chakim Džefrys — nabraŭ 212 hałasoŭ. Za jaho prahałasavali ŭsie demakraty.
Što ciapier?
Apošni raz takaja situacyja, kali śpikiera Pałaty pradstaŭnikoŭ nie ŭdavałasia vybrać u pieršym tury, paŭstała 100 hadoŭ tamu. U 1923 hodzie, kab abrać kandydaturu, spatrebiłasia dzieviać turaŭ.
Zaraz pałata taksama praciahnie hałasavać da paśpiachovaha zychodu. Pakul nie abrany śpikier, zakanadaŭcy nie zmohuć zajmacca nijakimi inšymi pytańniami — nie zmohuć dać prysiahu novyja členy Kanhresa, nie zmohuć prymacca novyja zakony.
Kolki raŭndaŭ hałasavańnia spatrebicca zaraz — niezrazumieła. Kolki času heta zojmie, taksama niezrazumieła. Hałasavańnie 1923 hoda raściahnułasia na niekalki dzion.
Apazicyja
Mnohija śpikiery Pałaty pradstaŭnikoŭ sutykalisia ź ciažkaściami na šlachu da hetaj pasady, ale ŭnutrypartyjnyja kanflikty ŭ minułym vyrašalisia davoli chutka, časta jašče da hałasavańnia.
Makkarci ž sutyknuŭsia z supracivam vielmi pravych paplečnikaŭ pa partyi jašče ŭ minułym listapadzie, kali respublikancy pa vynikach pramiežkavych vybaraŭ atrymali bolšaść u pałacie.
Kanhresmien Endzi Bihs sa štata Aryzona pazicyjanuje siabie jak alternatyvu Makkarci, choć i małavierahodnuju. Taksama suprać Makkarci vystupaje pradstaŭnik Fłarydy Met Hietc. U pieršym raŭndzie hałasavańnia Bihs atrymaŭ 10 hałasoŭ, a jašče dzieviać respublikancaŭ prahałasavali za inšych kandydataŭ.
Apazicyi Kievin Makkarci nie padabajecca pa asabistych i ideałahičnych pryčynach. Jana ŭžo niekalki tydniaŭ patrabuje ad Makkarci sastupak, u pryvatnaści — spraščeńnia pracedury impičmientu śpikiera.
Na sustrečy z prychilnikami frakcyi ranicaj u aŭtorak Makkarci skazaŭ, što suprać jaho mohuć prahałasavać da 20 respublikancaŭ. Adnak jon byŭ upeŭnieny, što ŭ vyniku pieramoža.
Pa padazreńni ŭ zabojstvie ciažarnaj minčanki zatrymali chakiejnaha sudździu Alaksieja Haŭrylonka6
Kamientary