Kanstytucyjny sud Kazachstana pastanaviŭ pryznać straciŭšym siłu zakon «Ab pieršym Prezidencie Respubliki Kazachstan — Jełbasy».
Hety zakon abviaščaŭ Nursułtana Nazarbajeva lidaram nacyi (Jełbasy) i zabiaśpiečvaŭ jamu pažyćciovyja pryvilei i harantyi.
Rašeńnie hruntujecca na vynikach refierendumu ad 5 červienia 2022 hoda, na jakim było vyrašana vyklučyć z Kanstytucyi punkt 4 artykuła 46 i inšych normaŭ, jakija ŭ tym liku zachoŭvali zakon «Ab Pieršym Prezidencie Respubliki Kazachstan — Jełbasy».
Nazarbajeŭ uznačalvaŭ Kazachstan amal 30 hadoŭ, z 1989-ha, kali staŭ pieršym sakratarom CK Kampartyi Kazachstana. Jon pakinuŭ pasadu prezidenta Kazachstana ŭ sakaviku 2019 hoda, pastaviŭšy svaim pierajemnikam Kasym-Žamarta Takajeva. Ale i sam, majučy status Jełbasy i zajmajučy pasadu staršyni Rady biaśpieki, zachoŭvaŭ u krainie vialiki palityčny ŭpłyŭ, mnohija jaho navat usprymali jak sapraŭdnaha, choć i cieniavoha kiraŭnika krainy.
Usio źmianiłasia ŭ pačatku minułaha hoda, kali pa Kazachstanie prakaciłasia sieryja narodnych pratestaŭ, adnym z hałoŭnych łozunhaŭ jakich było «Šał, kiet!» («Stary, sychodź!»). Takajeŭ zadušyŭ vystupleńni dzie bizunom, a dzie piernikam. Ale pry hetym napoŭnicu ich skarystaŭ i dziela taho, kab kančatkova pazbavić upłyvu svajho papiarednika. Ciaham usiaho hoda Nazarbajeva, jahonych svajakoŭ i nabližanych asob pazbaŭlali to adnaho, ci druhoha. Narešcie čarha dajšła i da samoha statusa «Jełbasy».
Kamientary