Kitaj abviaściŭ pra vypusk svajho pieršaha kamiercyjnaha kvantavaha kampjutara

Kitajskaja kampanija Origin Quantum abviaściła ab paśpiachovym prodažy pieršaha ŭ krainie kamiercyjnaha kvantavaha kampjutara pad nazvaj Wuyuan. Pra heta 31 studzienia paviedamiła hazieta South China Morning Post.

Wuyuan — heta 24-kubitny kampjutar, jaki pracuje na kvantavych pracesarach (QPU) i vykarystoŭvaje technałohiju zvyšpravodnych čypaŭ. Jaho stvareńnie i prodaž stavić Kitaj na treciaje miesca paśla ZŠA i Kanady pa ŭzroŭni ŭciahnutaści ŭ vobłaść kvantavych technałohij.

Takija kampjutary zdolnyja za niekalki siekund razabracca ŭ tych prablemach, na vyrašeńnie jakich navat samyja sučasnyja i chutkija supierkampjutary zraschodujuć tysiačy ci miljony hadoŭ. A vobłaść prymianieńnia zusim dzivić ujaŭleńnie: ad razhadak tajamnic Suśvietu da raspracovak novych vidaŭ zbroi masavaha paražeńnia.

Pry hetym hazieta piša, što fakt prodažu kitajskaha kvantavaha kampjutara staŭ aficyjna viadomy litaralna niadaŭna, niahledziačy na ​​toje, što jon byŭ pradadzieny jašče hod tamu. 

Aproč hetaha, kampanija Origin Quantum nie nazyvaje svajho pakupnika, a taksama nie raskryvaje nijakich padrabiaznaściaŭ nakont sutnaści, pachodžańnia i kolkaści kvantavych pracesaraŭ (QPU), jakija byli vykarystanyja ŭ kampjutary. Kampanija tolki zajaŭlaje, što pryłada vałodaje «svaim ułasnym prahramnym zabieśpiačeńniem, apieracyjnaj sistemaj i płatformaj dla vobłačnych vyličeńniaŭ», na padtrymańnie jakich patrebnyja vialikija vydatki. 

«Padtrymańnie ŭłasnaj infrastruktury kampjutara i cana daśledavańniaŭ moža dasiahać 30 młn dalaraŭ u hod. Nam jašče treba budzie vyrašyć pytańnie hłabalnaj samaakupnaści praduktu», — paviedamiŭ haziecie adzin z zasnavalnikaŭ Origin Quantum Huo Hapin, pryznaŭšysia, što ŭ kampanii ŭžo na momant prodažu pieršaj pryłady było i niekalki inšych hatovych kvantavych kampjutaraŭ.

Takaja sakretnaść u płanie kolkaści hatovych kampjutaraŭ, ich načyńnia i ich zakazčykaŭ moža być źviazana z «kvantavaj honkaj» pamiž ZŠA i Kitajem. 

My ŭžo pisali ab tym, što saboj ujaŭlaje hetaja honka i čamu kvantavyja technałohii nastolki mahutnyja. Kali koratka, to kvantavy kampjutar siarod inšaha vałodaje adnoj dziŭnaj asablivaściu — jon zdolny ŭzłomvać roznyja sistemy standartnaha šyfravańnia.

Na hetych šyfravańniach zasnavana praca mižnarodnych i nacyjanalnych finansavych instytutaŭ, abaronnych kompleksaŭ, palityčnych struktur, siehmientaŭ internetu i šmat čaho inšaha. Kvantavyja kampjutary zmohuć pry žadańni pasiejać chaos va ŭsim śviecie albo zabiaśpiečyć hłabalnuju pieravahu adnoj ź dziaržaŭ, jakija imi vałodajuć.

Tamu z momantu ŭstupleńnia Kitaja ŭ «kvantavuju honku» ZŠA stali abmiažoŭvać ekspart tudy vysokatechnałahičnaha abstalavańnia i ŭvodzić sankcyi suprać kitajskich kampanij i łabaratoryj, jakija zajmajucca kvantavymi raspracoŭkami.

Tamu moža być zrazumiełym asnoŭnaja pryčyna niedachopu infarmacyi ab raspracoŭcy i prodažy kamiercyjnaha kampjutara Wuyuan, bo kampanija-vytvorca moža bajacca ŭviadzieńnia sankcyj i abmiežavańnia svaich mahčymaściaŭ. Asabliva kali ŭličyć, što Origin Quantum pakul nie ŭvachodzić u amierykanski čorny śpis, jak i niekatoryja inšyja kitajskija kampanii.

Čytajcie taksama:

Kvantavyja kampjutary: voś čamu heta važna

U Kitai paśpiachova kłaniravali vysokapradukcyjnuju parodu karoŭ

• 4
• 0
• 4
• 0
• 9
• 1
• 3
• 0