Adzin z samych paśpiachovych akcioraŭ sučasnaha Halivudu vyrašyŭ časova adyści ad zvykłaha vobraza hieroja bajevikoŭ i źniaŭsia ŭ satyryčnaj kamiedyi. Ekśpierymient kaštavaŭ $125 miljonaŭ, ale vynik akazaŭsia katastrafičnym. Stužka pakazała najhoršy start prakatu za apošnija 19 hadoŭ karjery akciora. Ab pryčynach razvažaje The Wall Street Journal.
U suśvietny prakat vyjšła novaja karcina «Dyhier» (Digger), hałoŭnuju rolu ŭ jakoj vykanaŭ Tom Kruz. Pavodle źviestak studyi-dystrybjutara Warner Bros., za pieršyja vychadnyja ŭ kinateatrach ZŠA i Kanady stužka zarabiła kala 8 miljonaŭ dalaraŭ, a ŭ mižnarodnym prakacie sabrała jašče 12 miljonaŭ.
Dla kinaprajekta, vytvorčy biudžet jakoha skłaŭ pryblizna 125 miljonaŭ dalaraŭ, taki start aznačaje istotnyja finansavyja straty. Dla samoha Kruza heta najhoršy start prakatu z 2007 hoda, kali na ekrany vyjšła palityčnaja drama «Ilvy dla jahniat» (Lions for Lambs).
Stužka «Dyhier» ujaŭlaje saboj maštabnuju palityčnuju satyru, jakuju pastaviŭ mieksikanski režysior Alechandra Hansales Ińjarytu. Biełaruskim amataram kino jon najpierš viadomy pa takich pryznanych karcinach, jak dramatyčny tryler «Vyžyły» (The Revenant) ź Leanarda Dzi Kaprya i trahikamiedyja «Biordmen» (Birdman), jakija prynieśli pastanoŭščyku premii «Oskar».
U novym filmie Ińjarytu Tom Kruz źmianiŭ svajo tradycyjnaje ampłua. Zamiest vykanańnia niebiaśpiečnych trukaŭ akcior uvasobiŭ adrazu niekalki piersanažaŭ. Jaho asnoŭny hieroj — ekscentryčny naftavy mahnat, jaki demanstratyŭna i ź ironijaj zabrudžvaje navakolnaje asiarodździe, što stanovicca padstavaj dla vyśmiejvańnia sučasnaha karparatyŭnaha śvietu, ekałahičnych prablem i palityčnaha papulizmu.
Dla samoha Kruza hetaja rola stała surjoznaj ryzykaj. Kali na pačatku karjery jon achvotna zdymaŭsia ŭ składanych režysioraŭ nakštałt Stenli Kubryka ci Majkła Mana, to apošnija paŭtara dziesiacihodździa pracavaŭ amal vyklučna ŭ kamiercyjna biaśpiečnych bajevikach uzroŭniu «Misija nievykanalnaja» (Mission: Impossible) i «Top Han: Mevieryk» (Top Gun: Maverick).
Pahadziŭšysia na «Dyhiera», akcior imknuŭsia padtrymać aŭtarski kiniematohraf. Vystupajučy pierad Hildyjaj pradziusaraŭ ZŠA, Kruz padkreśliŭ svaju nadzieju, što kasavy pośpiech karciny dapamoža inšym nieardynarnym režysioram i nadalej atrymlivać biudžety na aryhinalnyja idei, a nie tolki na praciahi viadomych franšyz.
Adnak mierkavańni krytykaŭ i pieršych hledačoŭ adnosna karciny mocna padzialilisia. Pavodle acenak kampanii CinemaScore, jakaja vyvučaje reakcyju aŭdytoryi paśla premjernych pakazaŭ, film atrymaŭ davoli nizki siaredni bał C+. Studyja Warner Bros. navat sprabavała pabudavać markietynhavuju kampaniju vakoł hetaj palarnaści mierkavańniaŭ. Tak, u adnym z rekłamnych rolikaŭ paśla cytat z rezkich admoŭnych recenzij piersanaž Kruza emacyjna prapanoŭvaŭ nie źviartać uvahi na krytykaŭ. Tym nie mienš hety krok nie dapamoh pryciahnuć publiku ŭ zały.
U čym pryčyna pravału filma «Dyhier»?
Jak adznačaje WSJ, niaŭdača «Dyhiera» śviedčyć pra bolš šyrokuju prablemu Halivudu, dzie pryciahnuć hledačoŭ u kinateatry na aryhinalnyja filmy stanovicca ŭsio ciažej. Im nadzvyčaj składana kankuravać ź sikviełami i prajektami, zasnavanymi na ŭžo viadomych franšyzach. Adnym ź niešmatlikich vyklučeńniaŭ zastajecca žanr žachaŭ, dzie aryhinalnyja historyi pa-raniejšamu zdolnyja prynosić značny kamiercyjny pośpiech.
Apošnija niekalki hadoŭ studyja Warner Bros. jakraz sprabavała iści nasupierak hetaj tendencyi. Jaje kinapadraździaleńnie śviadoma vydzialała vialikija biudžety pryznanym režysioram na aryhinalnyja prajekty, raźličvajučy nie tolki na mastacki rezanans, ale i na dobryja kasavyja zbory.
Adnak hetaja stratehija pryniesła nieadnaznačnyja vyniki. Adzinym biezumoŭnym chitom staŭ jakraz film žachaŭ «Hrešniki» (Sinners) režysiora Rajana Kuhlera, što tolki paćvierdziła praviła. Inšyja ž aŭtarskija pracy napatkaŭ bolš składany los. Karcina Poła Tomasa Andersana «Adna bitva za adnoj» (One Battle After Another) atrymała mnostva «Oskaraŭ», u tym liku za najlepšy film, ale nie akupiłasia ŭ prakacie, i stužka «Niaviesta!» (The Bride!) Mehi Džylenchoł akazałasia finansava niaŭdałaj.
U hetym kantekście pravał «Dyhiera» staŭ simvaličnym finałam cełaj epochi. Heta apošni reliz, jaki lehiendarnaja Warner Bros. vypuściła ŭ jakaści całkam niezaležnaj kampanii, zaviaršajučy svoj 103‑hadovy šlach pierad zakryćciom uhody pa jaje źlićci ź miedyjahrupaj Paramount i stvareńni novaj struktury Skydance.
Ciapier čytajuć
Aryštavany sienatar Karpicki, hałoŭny doktar Bresckaj abłasnoj balnicy4
Kamientary