Što značyć prypynieńnie ŭdziełu Rasii ŭ Damovie ab stratehičnych nastupalnych uzbrajeńniach?
Padčas pasłańnia Fiederalnamu schodu Uładzimir Pucin abjaviŭ, što Rasija prypyniaje ŭdzieł u Damovie ab stratehičnych nastupalnych uzbrajeńniach. «Paŭtaru, nie vychodzić z damovy, nie, a mienavita prypyniaje svoj udzieł», — padkreśliŭ jon. Ekśpiertka ŭ mižnarodnym pravie Kaciaryna Dejkała razabrała hety krok ź jurydyčnaha punktu hledžańnia.
SNU-3 — rasijska-amierykanskaja damova ab stratehičnych nastupalnych uzbrajeńniach. Damova abmiažoŭvaje kolkaść jadziernych bojezaradaŭ z kožnaha boku da 1550, a kolkaść mižkantynientalnych balistyčnych rakiet, balistyčnych rakiet na padvodnych łodkach i ciažkich bambavikach — da 700.
SNU-3 byŭ padpisany Barakam Abamam i Dźmitryjem Miadźviedzievym u 2010 hodzie i ŭstupiŭ u siłu ŭ lutym 2011-ha. Zimoj 2021 hoda Rasija i ZŠA pradoŭžyli dziejańnie dahavora da 5 lutaha 2026 hoda.
Da hetaha byli zaklučany SNU-1 i SNU-2.
Pieršaja damova — pamiž SSSR i ZŠA ŭ 1991 hodzie ŭ Maskvie, jana ŭstupiła ŭ siłu 5 śniežnia 1994 hoda, užo paśla raspadu SSSR i pieradačy Rasii jadziernaj zbroi, jakaja zastałasia ŭ Biełarusi, Kazachstanie i Ukrainie.
U 1993 hodzie Barys Jelcyn i Džordž Buš padpisali Damovu SNU-2. Jana była ratyfikavana ŭ ZŠA ŭ 1996 hodzie, u Rasii — u 2000-m, adnak paśla vychadu ZŠA 13 červienia 2002 hoda z Damovy pa supraćrakietnaj abaronie Rasija na nastupny ž dzień abjaviła ab vychadzie z SNU-2.
Kaciaryna Dejkała adznačaje, što ŭ artykule 14 damovy ab stratehičnych nastupalnych uzbrajeńniach napisana, što kožny z bakoŭ maje prava vyjści ź jaje, kali vyrašyć, što źviazanyja sa źmiestam damovy abstaviny pastavili pad pahrozu vyšejšyja intaresy krainy.
«Adznačaju, što Pucin padkreśliŭ, što Rasija ź jaje nie vychodzić. Značyć, hety artykuł vyklučajecca. Damova nie praduhledžvaje jaje prypynieńnie.
U adpaviednaści ź Vienskaj kanviencyjaj ab pravie mižnarodnych damoŭ, prypyniać dziejańnie damovy možna tolki tady, kali heta prapisana ŭ samoj damovie abo kali ŭsie baki z hetym zhodny. Atrymlivajecca, što hetaje rašeńnie Pucina niepravamiernaje.
Na moj pohlad, hetaha «prypynieńnia» jaho pramova nie praduhledžvała. Takoje rašeńnie, chutčej, reakcyja na vizit Bajdena va Ukrainu. Niečym treba było adkazać.
U cełym takoje «prypynieńnie» moža značyć, što Rasija nie źbirajecca vykonvać niejkija abaviazacielstvy z hetaj damovy. Tam, naprykład, praduhledžany inśpiekcyi kožnaha z bakoŭ na abjekty. Heta značyć, damova praduhledžvaje nie prosta skaračeńnie ŭzbrajeńnia, a kantrol za vykanańniem», — tłumačyć ekśpiertka.
Heta damova nie rehuluje jadziernyja vyprabavańni, tolki abmiežavańnie i skaračeńnie ŭzbrajeńniaŭ.
«Damova, jakaja zabaraniaje vypraboŭvać jadziernuju zbroju, była pamiž SSSR, Vialikabrytanijaj i ZŠA. Jana zabaraniaje heta rabić u troch śfierach: kosmas, pad vadoj i ŭ atmaśfiery, ale nie pad ziamloj. Jana dziejničaje dla Rasii i ciapier, — kaža Kaciaryna. —
Heta značyć, što kali i mohuć jana pravodzić vyprabavańni, to tolki padziemnyja. U 1996 byŭ zaklučany Dahavor ab usieahulnaj zabaronie jadziernych vyprabavańniaŭ, ale jon nie ŭstupiŭ u siłu, tamu što nieabchodnaj umovaj źjaŭlajecca jaho ratyfikacyja peŭnymi dziaržavami. Nie ŭsie ź ich, u tym liku i jadziernyja, dahavor ratyfikavali».
Čytajcie taksama:
Padčas vizitu Bajdena ŭ Kijeŭ Rasija praviała niaŭdały zapusk mižkantynientalnaj rakiety
«Heta histaryčnaje prava Rasii — być mocnaj». Pucin vystupiŭ z pasłańniem
Raźviedka Estonii: Pucin ciahnie čas, miarkujučy, što Ukraina i Zachad źniasilacca raniej, čym Rasija
Vyjšaŭ na svabodu biełarus, jakoha ŭ svoj čas prysudzili da pažyćciovaha źniavoleńnia. Heta pieršy viadomy taki vypadak9
Kamientary