«Navalny» staŭ najlepšym dakumientalnym filmam, «Usio ŭsiudy i adrazu» atrymaŭ siem «Oskaraŭ», u tym liku za najlepšy film
U Łos-Andželesie prajšła 95-ja cyrymonija ŭručeńnia ŭznaharod Amierykanskaj kinaakademii. «Oskar» za najlepšy film atrymaŭ «Usio ŭsiudy i adrazu» režysioraŭ Dena Kvana i Denieła Šajnierta.
Den Kvan i Denieł Šajniert, jakija źniali «Usio ŭsiudy i adrazu», taksama atrymali ŭznaharodu za najlepšuju režysuru i stali ŭładalnikami «Oskara» za najlepšy aryhinalny scenar.
Najlepšym akcioram staŭ Brendan Frejzier, jaki syhraŭ u filmie «Kit» režysiora Darena Aranofski.
Najlepšaja aktrysa — Mišel Joŭ za «Usio ŭsiudy i adrazu».
Premiju Kinaakademii za najlepšyja žanočuju i mužčynskuju rolu druhoha płana atrymali Džejmi Li Kiercis i Kie Chiui Kuan, jakija syhrali ŭ filmie «Usio ŭsiudy i adrazu». Jašče adzin «Oskar» u hetaha filma ŭ naminacyi «Najlepšy mantaž» (Poł Rodžers).
«Oskar» za najlepšy zamiežny film atrymaŭ «Na Zachodnim froncie bieź źmien» režysiora Edvarda Bierhiera. Taksama hety film pieramoh u naminacyjach «Najlepšaja apieratarskaja rabota» (Džejms Frend) i «Najlepšy aryhinalny saŭndtrek» (Folkier Biertelman).
U naminacyi «Najlepšy adaptavany scenar» pieramahła Sara Poli z «Havorać žančyny».
Najlepšym dakumientalnym filmam nazvany «Navalny» režysiora Denieła Roera. Na cyrymonii prysutničali žonka Navalnaha Julija, dačka Darja i syn Zachar.
Najlepšym poŭnamietražnym animacyjnym filmam nazvali «Pinokia Hiljerma del Tora».
Najlepšym dakumientalnym karotkamietražnym filmam stała praca «Zaklinalniki słanoŭ» Karciki Hansałviesa i Hucit Monhi ź Indyi.
«Oskar» za najlepšuju pieśniu atrymała «Naatu Naatu» (M. M. Kiravani, Chandrabos) ź indyjskaha filma «RRR: Pobač ravie revalucyja». U hetaj naminacyi, u liku inšych, byli pracy Ryjany i Łedzi Hahi.
«Avatar: Šlach vady» Džejmsa Kemierana i «Top Han: Mevieryk» Džozef Kasinski atrymali pa adnym «Oskary» — za najlepšyja vizualnyja efiekty i najlepšy huk adpaviedna.
Uznaharodaj Kinaakademii taksama była adznačana «Čornaja Pantera: Vakanda navieki», joj dastaŭsia «Oskar» u naminacyi «Najlepšy dyzajn kaściumaŭ».
«Trochkutnik smutku» Rubiena Estłunda, jaki atrymaŭ «Załatuju palmavuju halinu» Kanskaha kinafiestyvalu, «Ełvis» Baza Łurmana, «Banšy Inišeryna» Marcina Makdona, «Tar» Toda Fiłda i «Fabielmany» Styviena Śpiłbierha zastalisia biez uznaharod.
«Usio ŭsiudy i adrazu» byŭ lidaram pa kolkaści naminacyj na «Oskar» — film pretendavaŭ na ŭznaharody Kinaakademii ŭ 11 katehoryjach. U «Na Zachodnim froncie bieź źmien» i «Banšy Inišeryna» było pa dzieviać naminacyj, u «Ełvisa» — vosiem, u «Fabielmanaŭ» — siem.
Ciapier čytajuć
Biełaruska kliča na viasielle zorku «Univiera», jaki za vajnu. Uprehsia ŭvieś Threads13
Kamientary