«Našy movy źlivalisia ŭ adnu». U Łodzi biełarusy i palaki razam sustreli Vialikdzień
Supolnaja vielikodnaja imša ŭ kaściole Śviatoha Juzafa pravodziłasia pa-biełarusku i pa-polsku. Dvuchmoŭnaje nabaženstva ŭ Łodzi stała ŭnikalnym relihijnym dziejstvam dla katalickaj Polščy.
«Heta adzinaja śviataja imša ŭ polskim kaściole, jakaja adrazu prachodziła i pa-polsku, i pa-biełarusku. Heta najvažniejšaja śviataja imša, jakaja adbyvajecca na praciahu ŭsiaho liturhičnaha hoda ŭ kaściole», — tłumačyć admietnaść nabaženstva ajciec Dźmitryj Prystupa.
Śviatar kaža, što pravieści dvuchmoŭnuju vielikodnuju imšu prapanavali palaki.
«Kab nie malicca paasobku, a razam sabracca na słužbu palakam i biełarusam, što vierujuć u Chrysta. Biełarusy z entuzijazmam, zaanhažavańniem, padziakaj i radaściu padtrymali takuju prapanovu», — adznačaje jon.
U Łodzi asieła bahata biełarusaŭ, jakija vymušana pakinuli radzimu. Supolnaje polska-biełaruskamoŭnaje nabaženstva sabrała bolš za sto viernikaŭ.
«Było kruta. Kali daznałasia, što takaja malitva budzie pravodzicca, to sumniavałasia, jak takoje moža być, ale vyjšła pryhoža i ŭźniosła. Movy harmaniravali adna z adnoj, i zdavałasia, što źlivalisia navat u adnu. I słovy patrebnyja havarylisia: pra mir, spakoj, radzimu, vieru, nadzieju i luboŭ», — padzialiłasia ŭražańniami adna ź viernic.
Letaś u listapadzie była padtrymana inicyjatyva biełaruskaj katalickaj supołki, kab raz na tydzień u kaściole Śviatoha Juzafa ładzilisia nabaženstvy na biełaruskaj movie. Ciapier biełaruskaja parafija pry hetaj śviatyni hurtuje da troch dziasiatkaŭ viernikaŭ. Na nabaženstvy prychodziać i pravasłaŭnyja biełarusy, kab čuć svaju movu.
«Abjadnoŭvaje nas viera ŭ Chrysta. My molimsia za našu tryvałaść i kab nie stracić našaj nadziei, umacavać sercy. My vierym, što Chrystos uvaskres i ŭskładajem na jaho našyja nadziei», — kaža ajciec Dźmitryj.
Pravodzić bohasłužeńni dla biełarusaŭ 31-hadovy ajciec Dźmitryj Prystupa. Jon z Baranavičaŭ. Da 2020 hoda śviatarstvavaŭ na Brestčynie. Jamu daviałosia pakinuć radzimu paśla incydentu z vajskoŭcam, jaki razhaniaŭ pratest. Suprać śviatara była raspačata kryminalnaja sprava za «naŭmysny hvałt nad supracoŭnikam unutranych spraŭ», i jon u vyšuku.
U Łodzi, akramia praviadzieńnia biełaruskamoŭnych nabaženstvaŭ, biełaruski śviatar zaniaty spravami parafii, adpiavaje pamierłych, viančaje dy vykładaje relihiju ŭ siaredniaj škole.
U adnym ź intervju ajciec Dźmitryj Prystupa kazaŭ, što jaho parafijanie — nieabyjakavyja maładyja ludzi, jakija kłapociacca pra svaju Baćkaŭščynu, i bolšaść ź ich razmaŭlaje stała pa-biełarusku.
Vielikodnaje nabaženstva zaviaršałasia vystupleńniem biełaruskaha hurta Znak stop.
«Naša Niva» — bastyjon biełaruščyny
PADTRYMAĆHladzicie taksama:
Minskija ŭłady zabaranili pravodzić vielikodnyja słužby kala zakrytaha Čyrvonaha kaścioła
U kaściołach na Dzień Kanstytucyi na zahad uładaŭ buduć malicca za jadnańnie
Kamientary
rasiejskaj.