Pytajucca, čym zajmaŭsia ŭ 2020-m, i patrabujuć viedać asnovy ideałohii biełaruskaj dziaržavy. Što treba, kab uładkavacca na pracu ŭ dziaržustanovu
Vyhladaje, što dla pracaŭładkavańnia na dziaržaŭnyja pradpryjemstvy hałoŭnaje — nie kvalifikacyja i adukacyja, a ŭzrovień łajalnaści da režymu. Ideałahična vyvieranym musić być navat śpiecyjalist pa prodažach.
Što treba viedać śpiecyjalistu pa prodažach?
Siarod bolš čym 15 tysiač vakansij na sajcie praca.by jość vakansija ad dziaržaŭnaha pradpryjemstva «Ekśpierymientalny zavod». Ustanova šukaje śpiecyjalista pa prodažy z akładam ad 2500 rubloŭ da vypłaty padatkaŭ (2150 rubloŭ «na ruki»).
Ad kandydata patrabujecca dośvied pracy ad dvuch hadoŭ i vyšejšaja techničnaja adukacyja.
Nastupnym patrabavańniem idzie viedańnie asnoŭ ideałohii biełaruskaj dziaržavy.
I tolki paśla hetaha — viedańnie zakanadaŭstva, jakoje rehuluje źniešnieekanamičnuju dziejnaść.
Pad vyhladam zacikaŭlenaj u pracy asoby my adhuknulisia na vakansiju. Na pytańnie, što aznačaje hetaje patrabavańnie, nam adkazali, što, napeŭna, jaho pakinuli ŭ śpisie patrabavańniaŭ farmalna. Śpiecyjalist adkazała, što ŭ lubym vypadku pierad abmierkavańniem kandydatury treba spačatku dasłać reziume na poštu.
Adnak, vyhladaje, što na spravie łajalnaść da režymu i adsutnaść sudzimaściaŭ pa palityčnych artykułach bolš važnaja za prafiesijnuju kvalifikacyju supracoŭnika.
«Što vy rabili ŭ 2020 hodzie?»
Mužčyna, jaki apošnim časam šukaje pracu ŭ stalicy, raspavioŭ, što, choć u abjavach ideałahičnych patrabavańniaŭ zvyčajna nie pakidajuć, na spravie ŭsio vyhladaje inakš.
Haradžanin kaža, što na sumoŭjach pry pracaŭładkavańni ŭ dziaržaŭnyja ŭstanovy abaviazkova pytajucca, što ty rabiŭ u 2020 hodzie, jakoje ŭ ciabie staŭleńnie da ŭłady, što dumaješ pra biahučuju situacyju.
Mužčyna kaža, što paśla niekalkich takich razmoŭ z patencyjnymi pracadaŭcami žadańnie pracaŭładkavacca ŭ dziaržaŭnyja ŭstanovy źnikła.
Raniej «Naša Niva» z roznych krynic atrymlivała infarmacyju pra toje, što ŭ dziaržaŭnym siektary praciahvajuć zvalniać ludziej, nie pradaŭžajuć kantrakty z «palityčna nienadziejnymi hramadzianami». A pierad tym, jak nakiravać niekaha na pavyšeńnie, pravodziać pahłyblenyja pravierki na łajalnaść da režymu. Pieraškodaj dla pavyšeńnia moža stać navat podpis za vyłučeńnie alternatyŭnych kandydataŭ na vybarach 2020 hoda.
Ciapier čytajuć
Kaleśnikava: U 2020‑m ja zmahałasia nie suprać Łukašenki, a za ludziej, svabodu i svabodnyja vybary60
Kamientary