Byłyja źniavolenyja zaklikajuć zakryć hruzavy ruch na miežach Biełarusi, pakul nie buduć vyzvalenyja palitviaźni
U niadzielu 21 maja, u Dzień salidarnaści z palitviaźniami, kala tysiačy biełarusaŭ vyjšli na akcyju ŭ Varšavie, kab nahadać pra bolš za 1500 suajčyńnikaŭ, jakija znachodziacca za kratami praz palityku. Tam ža, na mitynhu, prahučaŭ sumiesny zvarot apazicyi da Jeŭrapiejskaj Kamisii, uradaŭ krain ES, u pryvatnaści, Polščy, Litvy, Łatvii, a taksama da Dziarždepartamienta ZŠA z zaklikam dziejničać bolš rašuča, kab vyzvalić palitviaźniaŭ u Biełarusi. Anałahičny zvarot byŭ ahučany i na mitynhu ŭ Vilni.
U zvarocie apisvajecca žachlivaja situacyja z pravami čałavieka ŭ Biełarusi, dzie ludzi sutyknulisia z masavymi represijami.
«Režym utrymlivaje kala 1500 palitviaźniaŭ va ŭmovach žorstkaha staŭleńnia, jakoje prynižaje čałaviečuju hodnaść, masava vykarystoŭvaje mietady hvałtu, što pryvodzić da čałaviečych achviar, — havorycca ŭ zvarocie. — Palitviaźni źnikajuć u turmach, pra ich los nie mohuć atrymać infarmacyju navat blizkija. Režym addaŭ zahad pazbavić palitźniavolenych prava atrymlivać leki. Dapamoha advakataŭ adsutničaje».
Apazicyja zaklikaje Zachad dziela vyzvaleńnia palityčnych źniavolenych u Biełarusi ŭzmacnić sankcyjny cisk i pryniać nacyjanalnyja pakiety sankcyj ZŠA, Polščy, Litvy i Łatvii.
Spynić ruch na ŭsich pamiežnych punktach propusku na miažy Biełarusi z Polščaj, Litvoj i Łatvijaj, za vyklučeńniem pasažyrskich punktaŭ propusku, i vysunuć patrabavańnie ab vyzvaleńni ŭsich palitźniavolenych dla adkryćcia ruchu.
Stvaryć Śpiecyjalny mižnarodny trybunał pa faktach złačynstvaŭ suprać čałaviečnaści ŭ Biełarusi i pačać vykarystoŭvać instrumienty ŭ miežach nacyjanalnaha zakanadaŭstva krain ES, kab pryciahnuć da adkaznaści vinavatych.
Da zvarotu dałučylisia inicyjatyŭnaja hrupa byłych palitźniavolenych Biełarusi na čale z Alaksandram Kabanavym, Narodnaje antykryzisnaje ŭpraŭleńnie na čale z Paŭłam Łatuškam, «Bajpoł», jaki pradstaŭlaje Alaksandr Azaraŭ, pradstaŭnica pa Nacyjanalnym adradžeńni Abjadnanaha Pierachodnaha Kabinieta Alina Koŭšyk. A taksama pradstaŭniki Narodnaj ambasady Biełarusi ŭ Polščy, Muziej Volnaj Biełarusi i siabry Kaardynacyjnaj rady Arciom Bruchan i Volha Paŭłava.
Ciapier čytajuć
Pamiatajecie Asol Śliviec? Žyćcio frystajlistki źmianiłasia da niepaznavalnaści, ciapier jana Abihal1
Kamientary