Ukrainski hienierał ličyć, što Łukašenka śviadoma abmiežavaŭ vajskovaje supracoŭnictva z Rasijaj paśla niaŭdač na froncie. Ale ci ŭ jaho chto pytajecca?

Na pytańnie, čamu ŭ ciapierašni čas praktyčna niama vyletaŭ rasijskaj avijacyi z aeradromaŭ Uzbrojenych siłaŭ Biełarusi dla naniasieńnia ŭdaraŭ pa terytoryi Ukrainy, Siarhiej Najeŭ adkazaŭ nastupnaje:

«Nie latajuć, tamu što paśla niaŭdałaha ŭvarvańnia armii Rasii z terytoryi Biełarusi, nastupnych niaŭdač na našym uschodzie i poŭdni kiraŭnictva Biełarusi abmiežavała svajo supracoŭnictva z Rasijaj da pastaŭki ŭzbrajeńnia, bojeprypasaŭ, a taksama nadańnia palihonaŭ dla padrychtoŭki mabilizavanych».

Zychodziačy z pryviedzienaha vyšej adkazu ŭ biełaruskaha i ŭkrainskaha hramadstva, piša Matolka, moža skłaścisia łžyvaje ŭjaŭleńnie, što «abmiežavańnie supracoŭnictva» z RF adbyłosia vyklučna dziakujučy dziejańniam režymu Łukašenki i stała vynikam niaŭdač Rasii ŭ vajnie z Ukrainaj.

Adnak takaja pazicyja, padkreślivaje jon, pamyłkovaja i navat škodnaja.

Tak, kali ŭviesnu 2022 hoda rasijanie nie pa svajoj dobraj voli, a praź jaŭnuju niemahčymaść dasiahnuć na hetym kirunku pastaŭlenych zadač adstupili z Kijeŭskaj vobłaści na terytoryju Biełarusi, bolšaść ź ich adrazu byli pierakinutyja na ŭschod Ukrainy dla ŭdziełu ŭ «bitvie za Danbas».

U hetym, na dumku Matolki, niama nijakaj zasłuhi Łukašenki — prosta znachodžańnie hetych vajskoŭcaŭ u abstavinach, jakija skłalisia, stała ŭ Biełarusi biessensoŭnym.

Što tyčycca rakietnych udaraŭ, to aeradromy US Biełarusi dla hetych met vykarystoŭvalisia ŭ pieryjad nastupleńnia US RF u Kijeŭskaj vobłaści, a ŭ dalejšym praktykavałasia naniasieńnie rakietnych udaraŭ samalotami PKS RF, jakija zalatajuć z terytoryi Rasii ŭ pavietranuju prastoru Biełarusi.

Apošni taki dakładna zafiksavany rakietny ŭdar z terytoryi Biełarusi byŭ naniesieny pa Ukrainie 6 kastryčnika 2022 hoda.

I ŭ tym, što paśla hetuju praktyku spynili, Matolka taksama nie bačyć upłyvu Łukašenki: prosta dla RF takija ataki pierastali mieć vajennaje značeńnie, a kali b pa-raniejšamu mieli, to nijaki Łukašenka im by nie pieraškodziŭ.

Taksama dyviersija na aeradromie «Mačuliščy» pakazała ŭraźlivaść aeradromaŭ US Biełarusi, i ŭ suviazi z hetym vykarystoŭvać terytoryju Biełarusi dla ažyćciaŭleńnia jakich-niebudź udaraŭ stała mienš biaśpiečnym, čym heta było raniej.

Pry hetym Matolka nie sumniavajecca, što ŭ vypadku ŭźniknieńnia takoj nieabchodnaści avijacyjnuju hrupoŭku PKS RF, raźmieščanuju ciapier na terytoryi Biełarusi, mohuć prymianić suprać Ukrainy, i ŭ Łukašenki ŭ takim razie pytacca dazvołu nichto nie budzie.

«Ahułam padtrymka ahresii Rasii suprać Ukrainy režymam Łukašenki budujecca vyklučna zychodziačy ź ciapierašnich patreb US RF.

Treba było nastupać RF na Kijeŭ — kali łaska, voś vam płacdarm dla nastupu. Pačałasia ŭ Rasii mabilizacyja, a miescy dla navučańnia ŭsim «mobikam» nie chapiła — kali łaska, voś vam palihony i instruktary. Uźnikła patreba ŭ technicy i bojeprypasach — kali łaska, składy i arsienały ŭ vašym rasparadžeńni. Łukašenka zakryvaje lubyja patreby Kramla, jakija ŭźnikajuć.

Takim čynam, dziejańni režymu Łukašenki nie majuć ničoha ahulnaha z tym, ci stralajuć ci US RF pa ŭkrainskich haradach z terytoryi Biełarusi abo nie», — kanstatuje Matolki.

Tamu, upeŭnieny jon, kiraŭnictva Ukrainy (jak vajskovaje, tak i palityčnaje) pavinna ŭsprymać piersonu Łukašenki vyklučna jak vajennaha złačyncu, jaki razam z Pucinym paniasie adkaznaść za svaje złačynstvy. A nie jak čałavieka, jaki svaimi dziejańniami imkniecca niejak dapamahčy Ukrainie.

Čytajcie taksama:

«Razam z rasijskaj zbrojaj moža źjavicca i rasijskaja vajskovaja baza. A vypierci ich budzie składana». Jakija nastupstvy atrymaje Biełaruś praz raźmiaščeńnie jadziernaj zbroi na svajoj terytoryi

Dzie raźmieściać rasijskuju jadziernuju zbroju, vybuch jakoj moža źniščyć ceły horad?

Łukašenka zajaviŭ, što Rasija była hatovaja zaklučyć «dahavor ab urehulavańni kanfliktu» va Ukrainie

• 27
• 0
• 2
• 0
• 1
• 0
• 2
• 0