Milicyja admoviłasia šukać vinavatych u vandaliźmie ŭ «viciebskich Kurapatach»
U mai hetaha hoda nieviadomyja vandały kala vioski Chajsy Viciebskaha rajona pałamali niekalki kryžoŭ, źniščyli miemaryjalnyja šyldy i pakazalniki da jamin u lesie, dzie ŭ 1930-ja hady adbyvalisia rasstreły tak zvanych «vorahaŭ naroda». Pa hetym fakcie ŭ milicyju byŭ nakiravany zvarot, ale siłaviki admovilisia reahavać na fakty vandalizmu, piša «Viciebskaja viasna».
Zvarot u milicyju nakiravaŭ pravaabaronca Pavieł Levinaŭ. Jon prasiŭ dać pravavuju acenku dziejańniam nieviadomych, jakija papsavali miemaryjał, stvorany ŭdzielnikami inicyjatyvy «Chajsy — viciebskija Kurapaty» i nieabyjakavymi hramadzianami, jakija šanujuć histaryčnuju pamiać.
Adkaz Paŭłu Levinavu byŭ karotki: maŭlaŭ, supracoŭniki milicyi praviali pravierku i nie znajšli padstaŭ dla praviadzieńnia raźbiralnictva. Inakš kažučy, Viciebski RAUS admoviŭsia raspačynać administracyjnuju abo kryminalnuju spravu pa fakcie vandalizmu ŭ «viciebskich Kurapatach».
Sioletni vypadak vandalizmu — nie pieršy ŭ historyi narodnaha miemaryjała ŭ Chajsach. U 2015-m hodzie stvaralnik inicyjatyvy Jan Dziaržaŭcaŭ užo źviartaŭsia ŭ milicyju Viciebskaha rajona z nahody źniknieńnia niekalkich kryžoŭ. Tady jon napisaŭ zajavu jak ułaśnik majomaści, jakuju skrali nieviadomyja. Była zaviedziena administracyjnaja sprava, na miesca vyjazdžali supracoŭniki milicyi, i ź ich dapamohaj navat udałosia znajści niekalki kryžoŭ, złamanych i patoplenych u bałacinie.
Adnak vinavatych nie stali šukać i tady: Janu Dziaržaŭcavu dali adkaz, što administracyjnuju spravu spyniajuć, bo jon panios niaznačny materyjalny ŭron.
Čytajcie taksama:
U Kurapatach kamunalniki śpiłoŭvali drevy, tyja padali na kryžy
Pamiatny znak Vacłavu Łastoŭskamu ŭ Kurapatach ačyścili ad nadpisaŭ vandałaŭ
Kamientary