Manumient «Radzima-maci» ŭ Kijevie pierajmianujuć — budzie «Ukraina-maci»
Adzin z hałoŭnych manumientaŭ Kijeva — hihanckaja statuja žančyny ź miačom i ščytom, ustalavanaja na bierazie Dniapra, atrymaje novuju nazvu, paviedamiŭ dyrektar Nacyjanalnaha muzieja historyi Ukrainy ŭ Druhoj suśvietnaj vajnie Juryj Saŭčuk.
Adkrytaja ŭ saviecki čas skulptura nazyvajecca «Radzima-maci», ale nieŭzabavie jana atrymaje nazvu» Ukraina-maci», skazaŭ Saŭčuk, jaki ŭznačalvaje muziej, na terytoryi jakoha ŭstalavany manumient, paviedamlaje Bi-bi-si.
Raniej ukrainskija ŭłady vyrašyli pamianiać simvoliku na ščycie, jaki trymaje ŭ ruce žanočaja fihura: zamiest hierba SSSR tam maje źjavicca tryzubiec — hierb sučasnaj Ukrainy.
«Kali my składziem usie pazły, to ŭbačym karcinu absalutna novaha žyćcia manumienta, jakaja abapirajecca na fakty, jakija dla mianie źjaŭlajucca vyznačalnymi: jon stvorany va Ukrainie, stvorany namahańniami ŭkrainskich rabotnikaŭ, inžynieraŭ, navukoŭcaŭ. Jon źjaŭlajecca ŭnikalnym pomnikam navuki i techniki. Hety manumient siońnia atrymlivaje druhoje žyćcio», — kaža Saŭčuk
Pavodle słoŭ Saŭčuka, pastanova ab pierajmienavańni jašče maje być zaćvierdžanaja ŭkrainskim Ministerstvam kultury.
Tryzubiec zamiest Savieckaha hierba maje źjavicca na manumiencie da 24 žniŭnia, kali Ukraina budzie adznačać čarhovy Dzień niezaležnaści.
Pomnik «Radzima-maci» — samaja vysokaja manumientalnaja skulptura Jeŭropy i piataja ŭ śviecie. Vyšynia manumienta z pastamientam — 102 mietry.
U Kijevie zamieniać saviecki hierb na hierb Ukrainy na pomniku «Radzima-maci».
Statuja adlustroŭvaje žančynu, jakaja padymaje ŭvierch ščyt i mieč.
U siaredzinie krasavika hetaha hoda Viarchoŭnaja Rada pryniała zakon, pavodle jakoha va Ukrainie zabaraniajucca źviazanyja z rasijskaj impierskaj palitykaj simvały i taponimy, u tym liku aficyjnaja simvolika Rasii (z časoŭ Maskoŭskaha carstva da sučasnaj Rasijskaj Fiederacyi).
Kamientary