U biełarusa-dobraachvotnika Alaksandra Caruka ankałohija. Prosiać dapamohi
Alaksandr baraniŭ Kijeŭ ad rasijskaha našeścia. Kali ŭ jaho vyjavili razbureńnie tazaściohnavaha sustava, Alaksandr syšoŭ z vojska i paźniej stvaryŭ arhanizacyju, jakaja zajmajecca dapamohaj vieteranam i dziejučym dabraachvotnikam. Ciapier u jaho inšaja biada.
«U 2020 hodzie ja byŭ naziralnikam na vybarach prezidenta ad Abjadnanaj hramadzianskaj partyi (AHP). U adkaz na falsifikacyi ja vyjšaŭ na vulicy i dałučyŭsia da masavych pratestaŭ. Maja aktyŭnaść pryviała da niekalkich zatrymańniaŭ i praviedzienych ahułam 40 sutak za kratami, — raskazvaje Alaksandr Caruk.
— U lutym 2022 hoda, kali pačałasia vajna va Ukrainie, ja dałučyŭsia da Bataljona Kalinoŭskaha. Ja byŭ u padparadkavańni kamandzira Vołata. Majo žyćcio karenna źmianiłasia, kali Vołat zahinuŭ. Ja byŭ adnym z apošnich, chto bačyŭ jaho žyvym. Kali kamandzira Vołata evakujavali, ja prykryvaŭ evakuacyju hrupy», — piša Alaksandr.
Jon zaznačaje, što prablemy sa zdaroŭjem stali pryčynaj, čamu jon viarnuŭsia ŭ Vilniu ŭ červieni 2022 hoda.
«Dyjahnaz — razbureńnie tazaściehnavaha sustava — prymusiŭ mianie štodnia prymać mocnyja abiazbolvajučyja. Ale žyćcio padrychtavała jašče adnu składanaść: u mai 2023 hoda abśledavańni vyjavili ŭ mianie ankałohiju (płoskakletkavaja karcynoma hałavy i šyi). 10-hadzinnaja apieracyja vyratavała mnie žyćcio. Ciapier maja doŭhaja daroha akryjańnia patrabuje prachodžańnia kursa radyjapramianiovaj terapii.
Bolš za hod ja nie mahu pracavać. Ciapier ja sam, apynuŭšysia ŭ ciažkim stanoviščy, prašu vašaj padtrymki na čas lačeńnia», — zaznačaje aktyvist.
Suma zboru: €5000.
U suviazi z praciahłaściu pieryjadu lekavańnia, jaki zapatrabuje pryznačeńnia miedykamientoznaj harmonazamiaščalnaj terapii, chimijaterapii i doŭhaterminovaj reabilitacyi, prybliznyja vydatki na miesiac:
- Arenda žylla: 400€
- Nieabchodnyja leki i vitaminy: 100€
- Enteralnaje charčavańnie: 100€
Zbor praz Bajsoł. Pryčym nahadvajem, što na Bajsoł nielha danacić ź biełaruskich ci rasijskich rachunkaŭ ci kartak, źviestki pra ich dastupnyja represiŭnym orhanam
«Ja pieršamajskaje bydła i limita, bazaru nul. Ale blizki da centra pryniaćcia rašeńniaŭ». Što Tur piša pad psieŭdanimam u «ekstremisckim» čacie19
Kamientary