Cichanoŭskaja vystupiła ŭ Jeŭraparłamiencie i papiaredziła, što pryjdzie ŭ kožny ŭrad z prośbaj pryznać novy pašpart
13 vieraśnia biełaruskaja lidarka Śviatłana Cichanoŭskaja vystupiła ŭ Jeŭraparłamiencie. Jana raspaviała pra biełaruskich hierojaŭ, paprasiła harantavać Biełarusi jeŭrapiejskuju budučyniu, raspaviała pra novy biełaruski pašpart i zaklikała da trybunała nad Łukašenkam.
«U adroźnieńnie ad vajny va Ukrainie, naša vajna — cichaja. Meta Kramla ŭ hetaj vajnie takaja ž, što i va Ukrainie: pieratvaryć Biełaruś u kałoniju Rasii. Pucinu ŭ hetaj spravie dapamahaje Łukašenka — jon pa častkach pradaje niezaležnaść našaj krainy», — zajaviła Cichanoŭskaja.
Jana raspaviała pra hierojaŭ hetaj «cichaj» vajny — rejkavych partyzanaŭ, kalinoŭcaŭ, pravaabaroncaŭ i inšych.
«U našaj cichaj vajnie pakazała siabie mnostva cichich hierojaŭ. Nastaŭniki, što admaŭlajucca vučyć dziaciej «dziaržaŭnaj ideałohii». Sumlennyja čynoŭniki, jakija dzielacca kaštoŭnaj infarmacyjaj. Biznesmieny, što tajemna dapamahajuć siemjam represavanych. Piensijaniery, jakija źviarnulisia da mianie z prośbaj «pieradać jeŭrapiejcam, što my nie zdamosia», — skazała Cichanoŭskaja.
Jana zajaviła, što ES — heta budučynia, da jakoj biełarusy imknucca.
«My chočam viarnucca dadomu. Dadomu ŭ Jeŭropu. Biełaruskija demakratyčnyja siły pryniali sumiesnuju dekłaracyju, što akreślivaje našu stratehičnuju metu — uvachodžańnie Biełarusi ŭ ES. Viedaju, što heta doŭhi praces, i jon nie budzie lohkim. Adnak dla nas niama zvarotnaha šlachu. Jeŭrapiejski sajuz — heta budučynia, da jakoj my imkniomsia i ŭ jakoj prahniem zastacca nazaŭsiody.
Jana raspaviała, što APK pracuje nad tym, kab pačać vydaču nacyjanalnych biełaruskich pašpartoŭ. «Vielmi chutka my pryjdziem da vašych uradaŭ z prośbaj pryznać našy novyja pašparty», — skazała jana.
Taksama jana zaklikała nie spyniać baraćby z dyktaturami.
«Dapamažycie nam pryciahnuć Łukašenku da adkaznaści. Za zabojstva apanientaŭ «eskadronami śmierci». Za katavańni mirnych pratestoŭcaŭ. Za vykradańnie ŭkrainskich dziaciej. Za viadzieńnie vajny suprać biełarusaŭ i supracoŭnictva ŭ vajnie suprać Ukrainy. U jaho na plačach doŭhi śpis złačynstvaŭ. Jon nie zasłuhoŭvaje nijakaha miesca na mižnarodnych forumach. Adzinaje, čaho jon zasłuhoŭvaje, — heta kvitok u adzin kaniec u Haahu.
I mnie sapraŭdy cikava, jak niekatoryja ludzi da hetaha času śmiejuć nazyvać jaho prezidentam? Davajcie rastłumačym: jon machlar!» — skazała jana.
Jana zaklikała jeŭraparłamientaryjaŭ padtrymać rezalucyju z pryznańniem jeŭrapiejskich pamknieńniaŭ biełarusaŭ, jakuju ŭnios Piatras Aŭštravičus. «Ja prapanuju vyvieści adnosiny pamiž demakratyčnaj Biełaruśsiu i Jeŭraparłamientam na novy ŭzrovień i instytucyjanalizavać našu supracu», — skazała jana.
Jeŭraparłamientaryi vitali jaje vystup stojačy.
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary