Nijakich DNŽ u blizkich svajakoŭ i palihraf. Dla dypłamataŭ uviali novyja praviły pryjomu na słužbu
Učora Alaksandr Łukašenka padpisaŭ ukaz №334, jaki ŭnosić źmieny ŭ Pałažeńnie ab dypłamatyčnaj słužbie. Jon uvioŭ dadatkovyja abmiežavańni dla pryniaćcia i znachodžańnia na słužbie.
Raniej pieraškodaj stać dypłamatam było zamiežnaje hramadzianstva žonki ci muža. Zaraz na pasadu nie mohuć pretendavać i tyja, u kaho muž ci žonka majuć zamiežny dazvoł na žycharstva ci inšy dakumient, jaki daje prava na pastajannaje pražyvańnie za miažoj ci lhoty tam u suviazi z palityčnymi, relihijnymi pohladami ci nacyjanalnaj prynaležnaściu.
Rašeńnie ab pryjomie na dypłamatyčnuju słužbu (ci praciahnieńni znachodžańnia na joj) čałavieka, u čyich blizkich svajakoŭ jość taki zamiežny dakumient uzhadniajecca z KDB.
Pry pryjomie na pracu dypłamataŭ buduć abaviazvać prachodzić palihraf.
Da pryčyn, ź jakich mohuć adklikać z pasady, dadali parušeńnie patrabavańnia zakanadaŭstva ab dziaržaŭnych sakretach, a taksama vydavańnie słužbovaj infarmacyi abmiežavanaha raspaŭsiudu. Zvolnić dypłamata mohuć, kali ŭ jaho muža ci žonki akažacca DNŽ inšaj dziaržavy (ci padobny dakumient). Abo kali DNŽ jość u kahości ź blizkich svajakoŭ i KDB paličyŭ heta nieprymalnym.
Raniej biełarusaŭ, jakija atrymali DNŽ ci kartu palaka, abaviazali paviedamlać pra heta biełaruskim uładam. Viadomy vypadki, kali na pradpryjemstvach rabotnikaŭ z kartami palaka vyklikali da kiraŭnictva i prymušali admovicca ad dakumienta, jaki daje prava žyć za miažoj.
Jak tłumačać ułady, abnoŭlenyja normy ŭličvajuć źmianieńnie mižnarodnaj abstanoŭki, padychody i daručeńni Łukašenki da arhanizacyi raboty orhanaŭ dypłamatyčnaj słužby i charaktar zadač na hetym etapie.
Ciapier čytajuć
«Biełaruś jany bačać častkaj Rasii». Što značyć uzdym «Alternatyvy dla Hiermanii», nakolki daloka heta moža zajści i jak siabie pazicyjanavać biełarusam4444
Kamientary