«Rasfarmiravany kančatkova». U Dziarždumie abviaścili, što «Vahniera» bolš nie isnuje
Rasijskija čynoŭniki nazvali fejkam infarmacyju ab adnaŭleńni nabora ŭ PVK «Vahnier» u rasijskich haradach i zajavili, što ciapier u vahnieraŭcaŭ nie budzie anijakich samastojnych struktur, asabliva pad kamandavańniem svajakoŭ Pryhožyna.
«PVK «Vahnier» kančatkova rasfarmiravana. Bolšaść jaje bajcoŭ ciapier znachodziacca ŭ pracesie pierachodu ŭ inšyja miescy słužby: chtości idzie va Uzbrojenyja siły, chtości ŭ Minabarony, a chtości ŭ Rashvardyju», — zajaviŭ staršynia kamiteta Dziarždumy Rasii pa abaronie Andrej Kartapołaŭ rasijskamu vydańniu «Parłamienckaja hazieta».
Jon adznačyŭ, što nijakaha pahłynańnia «Vahniera» inšymi siłavymi viedamstvami być nie moža, bo jaho ŭžo nie isnuje ŭ jakaści asobnaj struktury. Tamu byłyja vahnieraŭcy mohuć iści na vajskovuju słužbu tolki jak «samastojnyja dobraachvotniki na ahulnych umovach», skazaŭ Kartapołaŭ.
Toje ž mierkavańnie vykazaŭ i staršynia IT-kamiteta Dziarždumy Alaksandr Chinštejn, kamientujučy niadaŭni artykuł «Mieduzy» ab adnaŭleńni nabora ŭ PVK «Vahnier» u rasijskich haradach i jaho ŭvachod u skład Rashvardyi pad kamandavańniem Paŭła Pryhožyna, syna pamierłaha kiraŭnika vahnieraŭcaŭ Jaŭhiena Pryhožyna.
Čynoŭnik nazvaŭ hetuju infarmacyju fejkam.
«U sacsietkach i telehram-kanałach u apošni čas źjaviłasia navina ab uvachodžańni «Vahniera» u skład Rashvardyi ŭ jakaści novaha padraździaleńnia. Paŭtarusia znoŭ, pahłynańnie pryvatnaj vajennaj kampanii Rashvardyjaj pa zakonie niemahčyma. Byłyja vahnieraŭcy mohuć zaklučać kantrakty tolki ŭ jakaści dobraachvotnikaŭ u indyvidualnym paradku», — paviedamiŭ Chinštejn.
Čynoŭniki ŭ kamientarach da «Parłamienckaj haziety» taksama padkreślili, što ŭ bližejšaj pierśpiektyvie nie idzie havorki ab stvareńni anałahu «PVK» Vahnier, bo heta nie adpaviadaje rasijskim zakonam ab pryvatnych vajennych kampanijach.
Kamientary