Jak ciapier možna pieravieści hrošy ź Biełarusi ŭ Litvu i naadvarot
Pahladzieli, jakija zastalisia mahčymaści, kab pieravieści hrošy ź Litvy rodnym u Biełaruś ci raźličycca za niejki tavar u Litvie.
SWIFT
U adroźnieńnie ad Polščy, litoŭskija banki jašče letaś spynili pryjom SWIFT-pieravodaŭ ad biełaruskich bankaŭ, tamu pieravod hrošaj pa numary rachunku niedastupny. Niemahčymaść rabić SWIFT-pieravody ŭ Litvu ŭ pieršuju čarhu ŭskładniaje žyćcio biznesu, jaki pracuje z hetaj krainaj. A voś dla fizičnych asob heta nie tak strašna. Kaniešnie, kali razmova idzie pra pieravody na sumu da 1000 jeŭra.
Z kartki na kartku praz bank
Pierakinuć hrošy z kartki na kartu pa-raniejšamu možna.
Biełarusbank pry pieravodzie pa numary kartki spahaniaje kamisiju ŭ pamiery 2,5% ad sumy pieravodu.
Alfa-Bank za takuju apieracyju biare kamisiju ŭ 1%, plus try rubli. Maksimalnaja suma na adzin pieravod — 1000 jeŭra. Pry pieravodzie hrošaj ź Litvy na biełaruskuju kartku Alfa-Bank kamisiju nie biare.
U Pryjorbanku kamisija za pieravod pa numary kartki składaje 1,2% ad sumy. Maksimalnaja suma adnaho pieravodu razam z kamisijaj banka składaje 2962 rubli.
Adnak nie ŭsie banki hatovyja adpraŭlać pa numary kartki hrošy ŭ valucie. Naprykład, BSB-Bank adpraŭlaje zamiežnym bankam tolki biełaruskija rubli, tamu raźličyć vydatki na taki pieravod niemahčyma, bo nieviadoma, pa jakim kursie budzie ličyć bank-karespandent.
Taksama varta ŭličvać, što litoŭski bank, jaki prymaje hrošy, taksama moža spahaniać kamisiju.
Paysend i inšyja servisy
Aproč pieravodaŭ praz banki pa numary kartki, u Biełarusi praciahvaje pracavać servis Paysend, jaki dazvalaje rabić mižnarodnyja hrašovyja pieravody na kartki Visa i Mastercard. Pieravieści hrošy ź Litvy ŭ Biełaruś možna, zapłaciŭšy kamisiju ŭ 1,5 jeŭra. Naprykład, kali ź Litvy vy adpravicie 200 jeŭra, to z ulikam kamisii atrymalniku dastaniecca 208 dalaraŭ. Ale bank karespandent moža zdymać i dadatkovuju kamisiju.
U ideale hrošy buduć pieraličanyja za niekalki chvilin, ale servis papiaredžvaje, što na heta moža syści da troch pracoŭnych dzion. Bazavy limit — 1000 jeŭra.
Jašče adzin servis, jaki dazvalaje pieravodzić hrošy ŭ miežach sistem Visa i Mastercard, zaviecca fin.do.
Servis abiacaje imhnienny pieravod hrošaj, ale i kamisija ŭ fin.do nie takaja małaja, jak u Paysend. Naprykład, pry pieravodzie 200 jeŭra ź Litvy ŭ Biełaruś hublajecca 3 jeŭra, a ź Biełarusi ŭ Litvu — 6,40 jeŭra. Limity ŭ fin.do nastupnyja — da $1500, ale nie bolš za $7000 u miesiac.
Taksama adpravić hrošy ź Litvy ŭ Biełaruś možna z dapamohaj sistemy «Załataja Karona» praz dadatak Korona Pay. Pryčym biez kamisii. Valuta adpraŭki ź Litvy — jeŭra. U Biełarusi možna atrymać hrošy ŭ dalarach ZŠA abo rasijskich rublach — nie tolki na kartku, ale i najaŭnymi ŭ punktach vydačy «Załataja Karona». Takija pieravody dasiažnyja tolki ź Litvy ŭ Biełaruś. U advarotnym kirunku sistema nie pracuje.
Čytajcie taksama:
Jak možna pieravieści hrošy ź Biełarusi ŭ Polšču i naadvarot
Karty jašče adnaho biełaruskaha banka znoŭ buduć pracavać za miažoj
Kamientary