Jak ułady buduć davać dazvoł biełarusam na emihracyju — raspracavana pracedura
Dla vyjezdu za miažu na PMŽ, biełarusam treba padać adpaviednuju zajavu. Kali dazvolać, pastaviać štampik u pašpart.
Novy paradak afarmleńnia vyjezdu dla pastajannaha pražyvańnia za miažoj zaćvierdžany Savietam ministraŭ pastanovaj numar 798 ad 20 listapada. Dakumient aficyjna apublikavany na Nacyjanalnym pravavym interncie-partale. Jon adrazu ŭstupaje ŭ siłu.
Ciapier paŭnaletni hramadzianin padaje adpaviednuju zajavu pra žadańnie vyjechać i nieabchodnyja dakumienty ŭ adździeł pa hramadzianstvie i mihracyi. Zajavu i dakumienty ad imia niepaŭnaletnich padaje zakonny pradstaŭnik.
Rabotnik padraździaleńnia pa hramadzianstvie i mihracyi rastłumačyć pravavyja nastupstvy afarmleńnia vyjezdu i pačniecca pravierka dakładnaści źviestak. Taksama buduć praviarać, ci niama ŭ zajaŭnika abmiežavańniaŭ na vyjezd, ci jość jon u banku pravaparušeńniaŭ.
Taksama čynoŭniki zrobiać zapyty:
ab vykanańni padatkovych abaviazacielstvaŭ,
ab spynieńni dziejnaści indyvidualnaha pradprymalnika,
ab najaŭnaści zhody vajennaha kamisaryjata (u dačynieńni da pryzyŭnikoŭ i hramadzian va ŭzroście 18-27 hadoŭ, jakija znachodziacca ŭ zapasie),
ab vykanańni alimientnych abaviazacielstvaŭ,
ab źviestkach pa kampiensacyi raschodaŭ, zatračanych dziaržavaj na ŭtrymańnie dziaciej (u adnosinach da abaviazanych asob).
Na padaču zapytaŭ čynoŭnikam dajecca try dni z momantu padačy zajavy.
Adpaviednym dziaržorhanam dajecca 20 dzion na ich vykanańnie.
Rašeńnie pa zajavie ab vyjeździe prymuć nie paźniej za 15 dzion z dnia atrymańnia infarmacyi ab vynikach pravierak. U dzień pryniaćcia rašeńnia jašče raz praviarać najaŭnaść abmiežavańniaŭ na vyjezd i prysutnaść hramadzianina ŭ banku hetych pravaparušeńniaŭ.
U dazvole na vyjezd mohuć admović, kali jość:
abmiežavańni na vyjezd,
jość źviestki ab niavykananych abaviazacielstvach,
padadzieny iłžyvyja i niapoŭnyja źviestki, padroblenyja dakumienty,
kali ŭ krainie biez zakonnaha pradstaŭnika zastaniecca niepaŭnaletni albo niepaŭnaletniamu budzie aformleny vyjezd biez zakonnaha pradstaŭnika.
Pra rašeńnie zajaŭniku paviedamiać na praciahu troch dzion paśla jaho pryniaćcia. To-bok usia pracedura moža zaniać bolš za miesiac.
Kali ž zhoda ad dziaržavy atrymanaja, u pašpart pastaviać adznaku ab dazvole na afarmleńnie vyjezdu dla pastajannaha pražyvańnia.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2121
Kamientary